ABŞ-ın Rusiyaya qarşı yeni sanksiyalarının ətrafında müzakirələr davam edir. Sanksiyalardan ən çox təsirlənəcək sahələrdən biri qaz sektorudur. Elə bu mənada yeni ABŞ sanksiyalarının Rusiya qazının əsas alıcısı olan Avropaya da təsirləri qaçılmaz olacaq.
Sanksiyaların Moskva baxımından ən pis nəticəsi isə Avropaya göndərilən Rusiya qazının qiymətini artırması, yeni layihələri ləngitməsi və Avropanın qapılarını mayeləşdirilmiş ABŞ qazına açması ola bilər. Əslində ABŞ-ın istədiyi də elə budur. Ancaq görünən odur ki, ucuz Rusiya qazı əvəzinə öz bahalı qazını Avropaya çıxarmağa çalışan ABŞ-ın bu sanksiyalarına Avropa da səssiz qalmayacaq. Xüsusilə Almaniya və Fransadan yeni ABŞ sanksiyalarına qarşı artıq səslər yüksəlməyə başlayıb.
Dünyanın ən böyük iki reytinq agentliklərindən olan "Standard&Poors" (S&P) və "Moody's" yaydığı hesabatlardan da görünür ki, Rusiya ilə Qərb arasında kəskinləşən münasibətlər "qlobal enerji müharibəsi"nə də yol aça bilər. S&P hesabatında, Rusiyanın sanksiyalara baxmayaraq, "Türk Axını" və Şimali Axını-2 layihələrində maliyyə problemini aşacağı, lazım gələrsə, Rusiya dövlət banklarının maliyyə dəstəyi verə biləcəyi vurğulanır. "Qazprom"un da bu layihələri təkbaşına reallaşdıra biləcəyi qeyd edilir.
Hesabatda bu layihələrin gecikmələrinin Avropaya satılan rus qazının qiymətini artıra biləcəyi ilə bağlı xəbərdarlıq da edilir. Digər tərəfdən, Rusiyaya artan təqyiqlər fonunda Azərbaycanın Avropa qaz bazarında mövqeləri də güclənəcək. Hesabatda vurğulanır ki, Rusiyaya artan təqyiqlər Azərbaycanın "Şah Dəniz-2" layihəsinin qarşısını tam açacaq.
Digər tərəfdən, bir çox analitiklərin fikrincə, ABŞ Avropanın Rusiyadan aldığı qazın yerini tankerlərlə ABŞ-dan daşınacaq sıxılmış maye qazla doldurmağı hədəfləyir. Bu isə "yeni enerji müharibəsi"nin başlanacağına işarə edir.
"Moody's" mütəxəssislərinin fikrincə isə, sanksiyalar üzündən Rusiyanın yeni böyük enerji layihələrində problem yaşansa, bu, xüsusilə qaz qiymətlərində artıma səbəb olacaq və Rusiyadan enerji ixracatına da ciddi zərbə vuracaq.
TAHİR
