Elşən Həsənov: "Onun yeganə çıxış yolu Rusiyanın istədiyini həyata keçirməkdir"
Son vaxtlar Rusiya ilə Ermənistan arasında münasibətlərin normal məcrada davam etmədiyi nəzərə çarpır. Ermənistanın daxilindən Rusiya əleyhinə kifayət qədər sərt bəyanatların səsləndirildiyinin və eyni prosesin Rusiyada baş verdiyini görürük. Sanki bu iki müttəfiq ölkə arasında inam sarsılıb. Bunu nə ilə izah etmək olar?
Ekspert Elşən Həsənovun sözlərinə görə, bunun başlıca səbəbi Ermənistanın nümayiş etdirdiyi davranışlardır: "Xüsusilə də Azərbaycan Prezidenti ilə Putin arasında baş tutan son görüş ermənilərin bərk hiddətinə səbəb oldu.
Rusiya başa düşür ki, dövlət başçımızın orada qəbul olunması, Putinlə İlham Əliyevin görüşündə bir sıra məsələlərin müzakirəsi və strateji partnyorluq münasibətlərinin qabardılması, əlbəttə ki, bir sıra qüvvələri, xüsusən də Ermənistanı narahat edib, qıcıqlandırıb. Bunun ardınca isə Rusiya Duması Ermənistanla birgə qoşunun yaradılması ilə bağlı sənədi ratifikasiya etdi.
Moskva bir tərəfdən bu hərəkətlərlə bəyan edir ki, Ermənistanla müttəfiqlik münasibətlərini pozmaq fikrində deyil, amma eyni zamanda Azərbaycanla strateji partnyorluq münasibətlərini bundan sonra da, heç bir çətinliklərə, problemlərə baxmayaraq, inkişaf etdirəcək. Reallıq budur. Xatırladaq ki, Putin Rusiya və Ermənistan arasında birgə hərbi birləşmələrin yaradılması haqda 2016-cı ilin noyabrında imzalanan sazişi təsdiqləyib. Dövlət Duması sazişi bir müddət əvvəl ratifikasiya etmişdi. Bundan sonra Ermənistan dərhal Gürcüstanda keçirilən NATO təlimlərinə qatıldı. Birgə ordu ilə bağlı sənədi isə hələ ki, təsdiqləməyə tələsmir. Bütün bu gedişat Rusiyanın Ermənistana inamını sarsıdır. Eyni zamanda, Rusiya Dağlıq Qarabağ prosesində status-kvonun bir qədər dəyişdirilməsində marağını Ermənistanın diqqətinə çatdırır. Ancaq Ermənistan hərəkətlərilə göstərir ki, heç bir güzəştə getmək niyyətində deyil. Bir sözlə, öz yiyəsinin də üzünə ağ olmağa başlayıb. Bütün bu faktorlar münasibətlərdəki inamı sarsıdır. Əslində, hadisələrin bu axarda getməsi bizim üçün əlverişlidir. Düşünmürəm ki, Ermənistan Rusiyanın təzyiqlərinə tab gətirə bilər. Çünki həmin ölkənin bunu etməyə potensialı yoxdur. Onun yeganə çıxış yolu Rusiyanın istədiyini həyata keçirməkdir. Əks halda, Ermənistanın başı bərk ağrıya bilər".
Məhəmmədəli QƏRİBLİ
