Cəbhə təxribatlarına son qoymayan Ermənistan silahlı qüvvələri müharibə qanunlarını belə pozaraq mülki əhalini hədəfə almaq kimi bəd əməllərinə hələ də son qoymur. Bunun nəticəsində mülki əhali arasında erməni gülləsinə tuş gələnlərin də sayı artır. Onlar arasında uşaqların olması isə erməni vəhşətinin pik nöqtədə olduğunun real təsdiqi sayılır. Məhz belə bir vaxtda erməni silahlı bölmələrinin Tovuz rayonunun Qaralar kəndini atəşə tutması nəticəsində baş verənlər düşmən azğınlığını göstərən daha bir fakt oldu.
Qeyd edək ki, atılan mərmilərdən biri kənd sakini, 2004-cü il təvəllüdlü Yusifov Ramil Sabir oğlunun yaralanması ilə nəticələnib. Kənddə olan həkimlər tərəfindən uşağa ilkin tibbi yardım göstərilib. Qəlpə yaraları aldığı məlum olandan sonra isə o, Tovuz rayon Mərkəzi Xəstəxanasına göndərilib.
Beləliklə, Füzuli rayonunun Alxanlı kəndində 2 yaşlı Zəhra Quliyeva və nənəsi Sahibə Quliyevanın öldürülməsindən təxminən bir ay keçməmiş Ermənistan ordusu yenə də kiçikyaşlı uşaqlara qarşı silaha əl atıb. Xatırladaq ki, iyulun 4-də axşam saatlarında erməni silahlı birləşmələri Füzuli rayonunun Alxanlı kəndini minaatanlardan atəşə tutmuş, nəticədə Alxanlı kənd sakinləri - 1966-cı il təvəllüdlü Quliyeva Sahibə İdris qızı və onun nəvəsi, 2016-cı il təvəllüdlü Quliyeva Zəhra Elnur qızı həlak olmuşdu. Həmin hadisədən az sonra daha bir uşaq erməni gülləsinə tuş gəlib. Bu bir daha göstərir ki, dinc əhali və azyaşlıların atəşə tutulması Ermənistan üçün adi haldır və bu ölkə üçün müharibə qanunları, insan haqları mövcud deyil. Eyni zamanda o da aydın olur ki, vəhşi, insanlığa yaraşmayan bütün xüsusiyyətlər Ermənistan silahlı qüvvələri üçün xarakterikdir. Bu ordu Azərbaycan əsgəri ilə üzbəüz gəlməkdən qorxaraq dinc əhalini, körpələri, uşaqları öldürməyə üstünlük verir. Düşmənin Tovuzun dinc yaşayış məntəqəsini atəşə tutması Ermənistanın ancaq dinc əhalilə vuruşmağa meylli olduğunu göstərir. Erməni silahlı qüvvələri bu fonda Azərbaycan kəndlərinin mülki vətəndaşlarını daim atəş altında saxlayır və nəticədə uşaqlar, qadınlar, qocalar qətlə yetirilir. Digər tərəfdən, Ermənistan hərbi-siyasi rəhbərliyinin məqsədi ondan ibarətdir ki, cəbhəyanı kəndlərdə yaşayan əhalinin gözünü qorxutsun və onların bu ərazilərdən köçməsinə nail olsun. Təsadüfi deyil ki, Alxanlı olayı da məhz Azərbaycan Ordusunun aprel müharibəsində azad etdiyi və Ölkə başçısının xeyir-duası ilə bərpa olunmuş Cəbrayıl rayonunun Cocuq Mərcanlı kəndinə böyük köçün başlaması ərəfəsində törədilmişdi. Amma düşmən məqsədinə nail ola bilmədi və bilməyəcək də. Ordumuz hər zaman düşmənin layiqli cavabını verir. Lakin buna rəğmən, proseslər göstərir ki, cəbhə xətti boyunca Ermənistan silahlı qüvvələri tərəfindən sıx məskunlaşmış ərazilərimizdə yaşayan, aralarında qadınlar, uşaqlar və ahılların olduğu mülki əhaliyə qarşı qəsdən hədəflənən hücumlar sistematik xarakter almağa başlayır. Dünya Qarabağ münaqişəsinin dinc yolla həllinə dair çağırışlar etdiyi halda, Ermənistan tərəfi mülki şəxslərin və uşaqların qəsdən öldürülməsinə yönəlmiş alçaq və şərəfsiz təxribatlara əl atır. Elə indinin özündə də baş vermiş hadisə bir daha Ermənistan tərəfindən beynəlxalq hüquqa riayət olunmadığını, çoxtərəfli qurumların normalarının sistematik pozulduğunu göstərir. Yusifov Ramil Sabir oğlu ətrafında yaşanan olaylar fonunda hesab edilir ki, bu cür faciələrin təkrar olunmaması, dünyada körpələrin öldürülməməsi üçün dünya ictimaiyyəti, büynəlxalq təşkilatlar artıq Ermənistana qarşı səfərbər olmalıdır. Əks halda Azərbaycan məsələni güc yolu ilə həll etməyə məcburdur.
Tahir TAĞIYEV
