Məhəmməd Əsədullazadə: "Azərbaycan bu sənədin qəbulu üçün ciddi diplomatik iş aparmalı, ölkənin ərazi bütövlüyünün dəstək almasına nail olmalıdır"
Məlum olduğu kimi, "Azərbaycanın işğal olunmuş ərazilərindəki vəziyyət" və "GUAM məkanında dondurulmuş münaqişələr, onların sülh, beynəlxalq təhlükəsizlik və inkişaf üçün fəsadları" adlı qətnamə layihələri yenidən BMT Baş Assambleyasının 72-ci sessiyasının gündəliyinə salınıb.
Bununla bağlı yayılan məlumata görə, gündəliyin hələlik son versiyası təsdiqlənməyib.
Bildirilir ki, hər iki məsələ BMT Baş Assambleyasının 71-ci sessiyasının gündəliyində olsa da, müzakirəyə təqdim olunmadığı üçün, ötən il olduğu kimi, bu il də növbəti sessiyanın gündəliyinə daxil edilib.
Qeyd edək ki, BMT Baş Assambleyasının 72-ci sessiyası sentyabrın 12-25-də BMT-nin Nyu-Yorkda yerləşən mənzil-qərargahında baş tutacaq. Sessiya çərçivəsində ATƏT-in Minsk Qrupunun həmsədrlərinin iştirakı ilə Azərbaycan və Ermənistan xarici işlər nazirlərinin görüşü gözlənir.
İstənilən halda, "Azərbaycanın işğal olunmuş ərazilərindəki vəziyyət" adlı qətnamə layihəsinin yenidən BMT gündəliyinə salınmasının əhəmiyyətini ekspertlər necə dəyərləndirir? Sözügedən məsələni "Bakı-Xəbər"ə şərh edən politoloq Məhəmməd Əsədullazadənin sözlərinə görə, belə bir qətnamənin yenidən gündəliyə gəlməsi ölkəmizin ərazi bütövlüyü uğrunda diplomatik fəaliyyətin göstəricisidir: "BMT qətnaməsi səsverməyə çıxarılarsa, bu, Ermənistanın bir dövlət kimi dünyada işğalçı statusunu daha da gücləndirəcək və ölkəmizin ərazi bütövlüyü bir daha təsdiq ediləcək. Hesab edirəm ki, qətnamənin gündəlikdə olması regional münaqişələrin həlli istiqamətində mühüm addımdır. Qeyd edim ki, BMT-də Azərbaycan və Ermənistan xarici işlər nazirlərinin növbəti görüşü gözlənir. Bu görüşdə də hər hansı bir nəticənin olacağı gözlənilmir. Hesab edirəm ki, ölkəmizin ərazi bütövlüyü Assambleyada gündəlikdə səsə qoyulsa, yekdilliklə Azərbaycanın xeyrinə olacaq. Ölkələrin, demək olar ki, üç-dördü bitərəf olmaqla sənədə müsbət səs verirlər. Azərbaycan bu sənədin qəbulu üçün ciddi diplomatik iş aparmalı, ölkəmizin beynəlxalq aləmdə ərazi bütövlüyünün dəstək almasına nail olmalıdır. Beynəlxalq hüquq, təbii, imkan verir ki, ölkəmiz öz ərazilərini istənilən yolla azad etsin. Ancaq Azərbaycan həmişə sülhün bərqərar olması naminə bütün imkanlardan istifadə edib, diplomatik yolla münaqişənin həllinə çalışır. Ermənistanın BMT-də bu kimi qətnamlərə qarşı çıxacağı gözlənir. Qeyd edim ki, Azərbaycan Ermənistanın bu təxribatlarının qarşısını almalı və sənədin müzakirəyə çıxarılmasına nail olmalıdır".
Vidadi ORDAHALLI
