Aydın Mirzəzadə: "Onlar bu hərəkətlərinə görə cəzasını alır və alacaq"
Məlum olduğu kimi, Ermənistan silahlı qüvvələri Tovuz rayonunun Qaralar kəndini atəşə tutublar. Nəticədə bir dinc sakin yaralanıb. Belə ki, yaralanan şəxs 2004-cü il təvəllüdlü Yusifov Ramin Sabir oğludur. O öz həyətlərində olarkən həyətə mərmi düşüb. Mərminin qəlpələri Ramini ağır şəkildə yaralayıb. Bədənində çoxsaylı qəlpə yarası alan Ramin dərhal təcili tibbi yardım maşını ilə xəstəxanaya aparılıb. Yeniyetmə həkimlər tərəfindən əməliyyat olunub. Vəziyyətinin orta ağır olduğu bildirilir.
Artıq neçənci dəfədir erməni işğalçıları yaşlı, uşaq demədən dinc sakinləri qanına qəltan edir. Bundan əvvəl iyulun 4-də Ermənistan silahlı qüvvələrinin Füzuli rayonunun Alxanlı kəndini ağır silahlardan hədəfli şəkildə və qəsdən atəşə tutması nəticəsində 51 yaşlı Sahibə Allahverdiyeva və onun 2 yaşlı nəvəsi Zəhra Quliyeva qətlə yetirildi, 52 yaşlı Səlminaz Quliyeva isə ağır yaralandı. Ermənistanın bu vəhşiliyinin, xüsusilə azyaşlı uşağı və qadınları hədəfə almasının beynəlxalq ictimaiyyət tərəfindən kəskin şəkildə pislənilməsinə baxmayaraq, Ermənistan bu çirkin əməllərindən nəticə çıxarmayaraq, 7 avqustda 13 yaşı Raminin yaralanması ilə nəticələnən növbəti barbar əməli törətdi.
2016-cı ilin aprelində Ermənistan rəhbərliyinin törətdiyi hərbi avantüra nəticəsində cəbhə xətti boyunca 34 mülki şəxs yaralandı, arasında uşaq olmaqla 6 nəfər həlak oldu.
Görünən odur ki, Ermənistan silahlı qüvvələri tərəfindən dinc insanların qətlə yetirilməsi adi hala çevrilir. Sözügedən məsələyə münasibət bildirən millət vəkili Aydın Mirzəzadənin fikrincə, dinc əhali və azyaşlıları atəşə tutması Ermənistan üçün insan haqlarının mövcud olmadığını bir daha sübuta yetirir: "Orta əsrlər təfəkkürü, vəhşi, insanlığa yaraşmayan bütün xüsusiyyətlərin hamısı Ermənistan silahlı qüvvələri üçün xarakterikdir. Bu ordu Azərbaycan əsgəri ilə üzbəüz gəlməkdən qorxur, ordumuzun gücünü hiss edir. Buna görə də dinc əhalini, körpələri, uşaqları öldürməyə üstünlük verir. Bu zaman da xaricdəki müəyyən havadarlarına, beynəlxalq birliyin regionda münaqişələrin baş verməməsi ilə bağlı həyata keçirdiyi tədbirlərə arxalanır. Onların Tovuzun dinc yaşayış məntəqəsini atəşə tutması Ermənistanın ancaq dinc əhalilə vuruşmağa meylli olduğunu göstərir. Ermənistan silahlı qüvvələrinin bir ay əvvəl Zəhra Quliyevanı nənəsi ilə birlikdə öldürməsi, srağagün 13 yaşlı uşağı yaralaması Ermənistanın apardığı siyasətin bütün vəhşiliyini göstərir. Azərbaycan Ordusu və xalqının səbri heç də tükənməz deyil. Ermənistan bu hərəkətlərinə görə cəzasını alır və alacaq. Mətbuatda işğal edilmiş zonada hərbi komandirlərdən birinin prokurora yazdığı məktubun surətini oxudum. Komandir Alxanlıda Azərbaycan Ordusunun cavab tədbirindən sonra Ermənistan əsgərlərinin böyük həyəcan yaşadığını və kütləvi surətdə hərbi hissəni tərk etdiyini yazıb. Çox təəssüf ki, biz ikili standartların hökm sürdüyü dövrdə yaşayırıq. Hər hansı məqam Ermənistan üçün böyük bir məsələ olduğu halda, Azərbaycan üçün unudulur, susdurulur. Nə iki yaşlı Zəhranın ölümü, nə də on üç yaşlı Raminin yaralanması böyük dövlətlərin reaksiyasına səbəb oldu. Nədənsə Minsk Qrupu, beynəlxalq təşkilatlar bu məsələyə susur. Ermənistanı məsuliyyətə çağırmaq istəmirlər. Bəlkə də bununla da məsələni onilliklərlə unutdurmağa nail olacaqlarını düşünürlər. Lakin Ermənistan bu hərəkətlərinin cavabını alacaq. Azərbaycan xalqı onun suverenliyi, ləyaqətinə yönələn təhdidləri qəbul etməyəcək".
Vidadi ORDAHALLI
