Son dövrlərdə Türkiyə hərbçilərinin terrorçu PKK-ya qarşı hərbi əməliyyatları daha intensiv hala gətirməsi müşahidə olunur. Bunun nəticəsində artıq xeyli sayda PKK terrorçusu zərərsizləşdirilib, onlarla yaraqlı könüllü şəkildə təslim olub. Türkiyə Hərbi Qüvvələri PKK terror təşkilatına qarşı əməliyyatlar çərçivəsində təkcə son bir həftə ərzində 46 terrorçunu məhv edib.
Əməliyyatlar ölkənin cənub-qərb vilayətlərində aparılıb. Bu gedişlə daha böyük itkilərə məruz qalacağını görən PKK məkan dəyişdirməyə çalışır. Sözügedən məsələdə terrorçular Ermənistanın yardımlarından da həmişəki kimi hərtərəfli istifadə edir.
Qeyd edilən xüsusda Beynəlxalq Əsilsiz Erməni İddiaları ilə Mübarizə Dərnəyinin (ASİMDER) rəhbəri Göksel Gülbey son günlərdə kifayət qədər maraqlı faktlar açıqlayıb. Elə bu günlərdə Gülbey Göyçə gölü yaxınlığındakı Ermənistanın Vardenis bölgəsində və işğal altındakı Qarabağ torpaqlarında PKK-çılar üçün 12 təlim-yerləşmə düşərgəsi qurduğunu bildirib. ASİMDER rəhbərinin sözlərinə görə, ötən ilin aprel döyüşlərindən sonra kürd terror qruplaşmalarına məxsus olan 400-dən çox yaraqlı Türkiyənin Ağrı bölgəsinin Tendürek kəndi istiqamətindən Ermənistana keçib. Onlardan 150-si Suriya erməniləri, qalanları Suriya, Türkiyə, İran və İraq kürdlərindən təşkil olunub. Həmin qrup Vardenisdəki düşərgədə əvvəldən yerləşən 80 PKK-çı ilə birləşib. Yaraqlıların Türkiyədən Ermənistana keçidinə terror təşkilatının "Ağrı qartalları" adlı birliyinin Livan Qaradağ, Hemaran Kervaçiyan və Servet Bagopşin adlı rəhbərləri başçılıq edib. Həmin terrorçular daha sonra Ermənistandan Qarabağa keçiblər. Bunun ardınca Göksel Gülbey indi daha bir maraqlı fakt açıqlayıb. Onun sözlərindən belə bəlli olur ki, PKK terror təşkilatı Gürcüstanda da ciddi şəkildə təşkilatlanmağa başlayıb. Özü də həmişəki kimi Ermənistanın yardımı ilə. ASİMDER rəhbərinin iddiasına görə, Tiflisdə təşkilatlanan terrorçular Azərbaycana da sızmaq istəyir: "PKK-nın Gürcüstanda təşkilatlanması ilə yanaşı, Tiflisdə Ermənistan dövləti və Ermənistan Diaspor Nazirliyi tərəfindən maddi dəstək verilən "Kürdüstan Yezidilər İttifaqı" da fəaliyyət göstərir. Həmçinin, özlərinə tərəfdar toplamaq və təbliğat aparmaq üçün Gürcüstanda "Gilavej" adlı jurnal da nəşr etdirirlər. Bütün bu təşkilatlanmanı PKK-nın Gürcüstan üzrə nümayəndəsi Abdülrehman Pariyev adlı şəxs həyata keçirir". G.Gülbey qeyd edib ki, PKK üzvləri Ermənistandakı düşərgələrdə təlim keçdikdən sonra Gürcüstanda təşkilatlanan yezidi kürdlərdən dəstək alaraq Qara dəniz bölgəsinə gəlirlər: "Ermənistanın işğal etdiyi Azərbaycanın Dağlıq Qarabağ ərazisində qərargah quran və Göyçə gölü yaxınlığındakı Vardenis düşərgəsində təlim keçən PKK üzvləri Gürcvüstandakı yezidi kürdlərin dəstəyi ilə Qara dəniz bölgəsinə keçir və terror aktlarının törədilməsi üçün kəşfiyyat aparırlar. Ermənistan Rize və Artvin bölgəsində yaşayan amşenlər üzərində də oyun oynayır. Belə ki, amşenlərin erməni əsilli olduğu iddia olunur və təəssüf ki, ermənilər bəzi amşenləri buna inandırmağı bacarıb. Erməni olduqlarına inanan amşenlər bölgədə HDP ilə birgə hərəkət edərək PKK-ya dəstək verirlər".
Xatırladaq ki, bu günlərdə "Kavkazplus" saytı da amşenlərlə bağlı maraqlı bir məqamı açıqlamışdı. Bildirilirdi ki, amşen adına yalnız erməni millətçilərinin xəritələrində rast gəlmək olar: "Necə ki, Azərbaycanın işğal edilmiş Dağlıq Qarabağ bölgəsinə "Arstax" deyirlər, bu da ermənilərin özlərindən uydurduğu adlardan biridir. Dünyanın müxtəlif ölkələrində yaşayan bəzi erməni icmalarına amşen deyilir və onların tarixi torpağı kimi Gürcüstanın Samsxe-Cavaxetiya, həmçinin Axalkalki, Axaltsıx, ümumilikdə Abxaziya bölgəsi göstərilir. Ermənilər öz məqsədlərini gizlətmir. Lakin bütün bunlar Gürcüstan üçün ikinci "Qarabağ ssenarisi" ola bilər". Bu isə Ermənistanın Qafqazda nə dərəcədə təhlükəli rol oynadığını aydın surətdə nümayiş etdirir. Belə görünür ki, PKK Ermənistanın dəstəyilə Qafqazda mövqelərini gücləndirməyə çalışır. Bu səbəbdən həm Ermənistana, həm də PKK-ya qarşı sərt tədbirlərin görülməsi vacib sayılır.
Tahir TAĞIYEV
