Günel Fərhadqızı: "Bu ideya barədə İran rəsmiləri indiyə kimi hansısa bəyanat verməyibsə, deməli, bunu da Sarkisyanın növbəti xülyası saymaq olar"
Ermənistan prezidenti Serj Sarkisyan İrana səfəri ərəfəsində həmin ölkənin İRNA agentliyinə müsahibə verib. Sarkisyan tarixi İran-Ermənistan dostluğundan danışıb və bildirib ki, iki ölkə arasındakı münasibətlər bundan sonra da artan xətt üzrə davam edəcək.
Ermənistan prezidenti daha sonra İranla aralarında olan iqtisadi layihələrdən söz açıb və bildirib ki, Xameneyi ilə görüşdə Fars körfəzi-Qara dəniz tranzit dəhlizi layihəsi ətrafında müzakirələr aparacaq. Sarkisyan bildirib ki, bu vasitə ilə onlar İranı Avropa ilə birləşdirə bilər. Fars körfəzi-Qara dəniz layihəsinin reallaşması iqtisadi cəhətdən İran üçün sərfəlidirmi?
İqtisadçı Günel Fərhadqızı qəzetimizə bildirdi ki, bunu da Sarkisyanın növbəti fantaziyası saymaq olar: "Ermənistanın yaxın qonşuları ilə münasibətləri gərgin və düşmənçilik həddindədir. Bu da həmin ölkəni regionu əhatə edən bütün infrastruktur layihələrdən məhrum edib. Ermənistanın mövcud rejimi normal siyasət aparsaydı, ölkənin yerləşdiyi coğrafi mövqe onun da layihələrdə iştirakını mümkün edərdi. Ancaq görünən budur ki, Ermənistan həm yürütdüyü siyasətdən əl çəkmək istəmir, həm də layihələrdən kənarda qalmağı həzm etmir. Bu səbəbdən də İranla müxtəlif müştərək layihələrin anonsunu verir. Birgə dəmir yolunun çəkilişi, avtomagistralın düzəldilməsi, Fars körfəzinə, Qara dənizə çıxış kimi layihələr yalnız Ermənistan tərəfindən səsləndirilib və ideya olaraq da masa üzərində qalıb. Belə deyilsə, İran və Ermənistanın iştirakı ilə reallaşan böyük layihələrdən birinin adını çəkin. Bunu Ermənistanın blefi də adlandırmaq olar. Məlumdur ki, o cür layihələrin reallaşması üçün külli miqdarda vəsait lazımdır. Həmin məbləğ dilənçi vəziyyətində yaşayan Ermənistanda yoxdur. İran üçün də təklif edilən layihələrin heç bir perspektivi və iqtisadi səmərəsi yoxdur. İran böyük və köklü dövlətdir. Onun sərhədləri çox genişdir. İstənilən qitəyə çıxmaq üçün alternativ variantları var. Demək istəyirəm ki, Ermənistan şirin vədlərilə İranı aldada bilməz. Fars körfəzinin özü dünyaya çıxış sayılır. Yəni İran istədiyi istiqamətə bu yolla çıxa bilirsə, onun Qara dənizə çıxışı nəyə lazımdır? Həmin marşrut üzrə heç bir boru kəməri və ya enerji layihəsi həyata keçirilmirsə, yalnız tranzit yoluna külli miqdarda vəsaitin yatırılması İran üçün rentabelli sayıla bilməz. Bu ideya barədə İran rəsmiləri indiyə kimi hansısa bəyanat verməyibsə, deməli, bunu da Sarkisyanın növbəti xülyası saymaq olar".
Məhəmmədəli QƏRİBLİ
