Elşən Həsənov: "Bu həm Türkiyənin özünün, həm də Naxçıvanın təhlükəsizliyi üçün önəmlidir"
Türkiyə ilə Rusiya arasında S-400 raketlərinin təchizatına dair əldə edilmiş razılaşma Ermənistan siyasi-hərbi dairələrində böyük narahatlıqla izlənməkdədir. Bu sövdələşmədən çıxış edərək Ermənistandakı anti-Rusiya dairələri Moskvanın ermənilərə növbəti xəyanəti barədə danışmağa başlayıblar.
Bu dairələrdə deyirlər ki, Rusiya Azərbaycanla kifayətlənməyib ermənilərin digər düşməninə - Türkiyəyə də müasir silahlar satmağa başlayıb. Bu da uzunmüddətli planda Ermənistana təhlükə yaradacaq.
Ermənistandakı Beynəlxalq münasibətlər və təhlükəsizlik məsələləri institutunun rəhbəri Stefan Səfəryan erməni KİV-lərindən birinə müsahibəsində deyib ki, Türkiyə Rusiyadan almağa hazırlaşdığı S-400 "Triumf" zenit-raket komplekslərindən birini Naxçıvanda yerləşdirə bilər. Onun sözlərinə görə, Türkiyə Naxçıvan əlahiddə ümumqoşun ordusuna təlim keçir və dəstək verir.
"Başqa yerlərdə Türkiyə Azərbaycana kömək edə bilməsə də, olduqca əlçatan olan Naxçıvanda hava hücumundan müdafiə sistemləri yerləşdirə bilər. Naxçıvan isə Türkiyə və Azərbaycan tərəfindən möhkəmləndirildikdən sonra İrəvanı və bütün Ararat vadisini təhdid edəcək" - Səfəryan deyib.
Erməni ekspert Türkiyə tərəfinin S-400 sistemlərindən birinin Ermənistanla sərhəddə yerləşdiriləcəyi haqda bəyanatını xatırladıb. Deyib ki, həmin sistemlər təkcə Türkiyənin müdafiəsi üçün deyil, Azərbaycanın maraqları üçün də istifadə olunacaq. "Azərbaycanla Türkiyə arasında hərbi əməkdaşlıq ağlasığmaz dərəcədə dərindir. Deməli, bu planda S-400 sistemlərinin verilməsi Ermənistanı narahat etməlidir", - Səfəryan bildirib. Onun sözlərinə görə, bu sistemlər Ermənistanın malik olduğu "İsgəndər" raketlərinə də problem yarada bilər.
"Mən bilmirəm Rusiyada nə dərəcədə əmindirlər ki, həmin S-400 sistemləri onun bilavasitə maraq sferasında, o cümlədən Cənubi Qafqazda, Ermənistana qarşı istifadə olunmayacaq. Ancaq Rusiyanın hərbi müdafiəsi Ermənistan üçün o qədər də etibarlı olmayıb və tarix də bunu göstərib. Və təkcə bəyanatlarda deyil, praktiki hərəkətlərdə. Əlbəttə, bu cavabı olmayan sualdır" - Səfəryan əlavə edib.
Qeyd edək ki, Naxçıvanın təhlükəsizliyinin qarantiyası ilə bağlı mövcud olan beynəlxalq müqavilələrdə Türkiyənin rolu ilə əlaqədar müddəa var. Həmin müddəada bildirilir ki, Naxçıvana hər hansı bir təhdid-müdaxilə olarsa, Türkiyə həmin anda söz sahibidir. Bu baxımdan da ermənilərin narahatlığını əbəs saymaq olmaz. Türkiyə həmin raketləri harada yerləşdirə bilər?
Təhlükəsizlik məsələləri üzrə ekspert Elşən Həsənov qəzetimizə bildirdi ki, Ermənistan Türkiyənin əldə etdiyi bu silah partiyası ilə bağlı olduqca narahatdır: "Hələ raketlərin hara yerləşdirilməsinin müzakirə edilməsindən əvvəl Ermənistanın daxili ictimai rəyində Rusiyanın Türkiyəyə silah satması müttəfiqə edilən xəyanət kimi dəyərləndirildi. Ancaq Rusiya dəfələrlə bu məsələdə Ermənistanın ağzından vurub ki, onun kimə silah satmağı ilə bağlı məsələ öz daxili işidir. S-400 raketləri olduqca funksional və müasirdir. Ermənistan buna görə ciddi narahatlıq keçirir. Ermənistanın daxilində Rusiyadan alınma "İsgəndər" tipli raketlər var. Onlar bir neçə dəfə onunla Naxçıvanı hədələyiblər. Naxçıvanın öz daxilində olan silah növləri bir neçə dəqiqəyə İrəvanı darmadağın etmək imkanına malikdir. Hansısa xarici ölkənin Azərbaycan ərazisində hərbi baza qurma, silah yerləşdirmə məsələsinə bizim qanunvericiliyimiz icazə vermir. Buna baxmayaraq, istərdik ki, həmin raketlərdən bir neçəsi Ermənistan-Naxçıvan-Türkiyə sərhədinə yaxın ərazidə yerləşdirilsin. Yəqin ki, Türkiyə belə bir addım atacaq. Çünki bu həm Türkiyənin özünün, həm də Naxçıvanın təhlükəsizliyi üçün önəmlidir. Bilirsiniz ki, Qars müqaviləsinin şərtləri Naxçıvanın təhlükəsizliyi məsələsində Türkiyənin cavabdehliyini yaradır. Sevindirici haldır ki, Türkiyə heç vaxt belə bir məsuliyyəti üzərindən atmayıb".
Məhəmmədəli QƏRİBLİ
