Məhəmməd Əsədullazadə: "Rəsmi Kreml bununla yaxın qonşularına təzyiq etmək, Qərbin Şərqə yaxınlaşma siyasətini önləmək istəyir"
Yayılan məlumatlara görə, Rusiya prezidenti Vladimir Putin avqustun 8-də Gürcüstanın separatçı Abxaziya bölgəsinə səfər edəcək. Səfərin hazırlanmasının gedişi ilə tanış olan mənbələr deyiblər ki, Putinin səfəri qısamüddətli olacaq, Rusiya prezidenti separatçı bölgənin "prezidenti" Raul Hadjimba ilə görüşəcək və Abxaziyanı tərk edəcək. Bu arada Rusiya prezidentinin mətbuat katibi Dmitri Peskov bu informasiyanı şərh etməyib.
Gürcüstan rəsmiləri Putinin işğal altında olan Abxaziyaya gözlənilən səfərini təxribat adlandırıblar. Məlumata görə, Gürcüstan prezidentinin xarici siyasət məsələləri üzrə müşaviri Tengiz Pxaladze deyib ki, Putinin Abxaziyaya səfəri Rusiyanın işğalçılıq siyasətinin davamıdır: "Gözlənilən səfər Rusiyanın tarixi ədalətsizliyi leqallaşdırmaq cəhdidir. Gürcüstanın işğal olunmuş əraziləri tanımamaqla bağlı siyasəti çox güclüdür. Əminəm ki, Gürcüstan bu münaqişədə qalib gələcək və ədalət bərqərar olacaq".
Məlumat üçün qeyd edək ki, 2008-ci il avqustun 8-də Rusiya qoşunları Gürcüstana qarşı hərbi əməliyyatlara başlayıb və 5 gün davam edən müharibə nəticəsində separatçı Abxaziya ilə Cənubi Osetiya bölgəsi tamamilə rus qoşunlarının nəzarətinə keçib. Həmin müharibə Gürcüstan ordusunun Cənubi Osetiya üzərində nəzarəti bərpa etmək cəhdindən sonra başlamışdı.
Postsovet məkanında bir sıra separatçı bölgələrin olmasını nəzərə alsaq, Putinin tanınmamış bölgəyə səfər etməsi arzuedilən deyil. Bu, müəyyən mənada, digər separatçı bölgələr üçün presedent yarada bilər. Düzdür, qondarma Abxaziyanın "müstəqilliyi" Rusiya tərəfindən tanınıb. Ancaq nəzərə almaq lazımdır ki, digər dövlətlər və beynəlxalq birlik oranı Gürcüstanın ərazisi hesab edir. O baxımdan Putinin belə bir bölgəyə səfər etməsi nə dərəcədə doğrudur?
Məsələyə münasibət bildirən politoloq Məhəmməd Əsədullazadənin sözlərinə görə, separatçı bölgəyə dövlət başçısı səviyyəsində səfər etmək əsla doğru deyil: "Rusiyanın postsovet məkanında separatizmi qızışdırması və dəstək verməsi hər keçən gün aktuallığını artırır. Rəsmi Kreml bununla yaxın qonşularına təzyiq etmək, Qərbin Şərqə yaxınlaşma siyasətini önləmək istəyir. Rusiyanın Ukrayna, Moldova və Gürcüstanda açıq münaqişə tərəfi olması bu ölkəni iqtisadi sanksiyalarla üz-üzə qoyur. Ancaq ABŞ-ın tətbiq etdiyi yeni sanksiyalar Rusiyanın MDB məkanında daha da aqressiv siyasət aparmasına səbəb olacaq. Rusiya prezidenti V.Putinin Gürcüstan ərazisinin tərkib hissəsi olan Abxaziyaya qanunsuz səfəri separatizmə dəstək və ölkələrin ərazi bütövlüyünə qəsddir. Hesab edirəm ki, Rusiya bununla Gürcüstana qarşı təzyiqlər həyata keçirir. Çünki Gürcüstanın avrointeqrasiya kursu rəsmi Kremli öz sərhədləri yaxınlığında ciddi narahat edir. Ona görə də Gürcüstana qarşı hərbi təzyiqlərini artırır. Təbii ki, avqustun 8-də Putinin Abxaziyaya səfəri digər separatçı qurumları ruhlandıracaq. Moskva bu təxribatçı, analoji addımları digər separatçı qurumlarda da ata bilər. Sirr deyil ki, Qarabağ münaqişəsinin həllinin uzanmasında Rusiyanın böyük siyasi xətti var. Bu ölkənin siyasi gedişləri imperiya maraqlarına əsaslanır və Qafqzı öz həyati maraq dairəsi hesab edir. Ona görə də Moskvanın separatçı bölgələrlə bağlı siyasəti Azərbaycanı ciddi narahat edir. Qeyd edim ki, Putin Abxaziyaya səfər etməklə Rusiyaya etimad mühitini sarsıtmış olur".
Vidadi ORDAHALLI
