Ermənistanın Qafqazda təkcə Azərbaycan yox, əslində digər region ölkələri üçün də təhlükə mənbəyi olması heç kimə sirr deyil. İlk növbədə ona görə ki, məhz Ermənistanın sayəsində regionda terrorçuluq çiçəklənir, narkotik maddələrin qanunsuz dövriyyəsi həyata keçirilir. Eyni zamanda yenə Ermənistanın üzüdən regionda işğal siyasəti davam edir, Azərbaycan ərazilərinin bir hissəsi hələ də düşmənin nəzarətində saxlanır. Enyi zamanda Türkiyə və Gürcüsütana qarşı da ermənilərin ərazi iddiaları davam edir.
Son proseslər isə Gürcüstan üçün erməni təhlükəsinin daha da böyüyüdüyünü göstərir. Ümumiyyətlə, hadisələrin gedişi göstərir ki, ermənilər Gürcüstana qarşı ərazi məsələsində daha aktiv fəaliyyətə keçiblər. Elə bir neçə gün əvvəl Ermənistan Gürcüstan sərhədlərini pozaraq bu ölkənin qədim Hucabi monastırını zəbt etmək istiqamətində müəyyən addımlar atıb. Məlumat üçün bildirək ki, Hucabi monastırı Gürcü Pravoslav kilsəsinin ən böyük ziyarətgahlarından biridir. Amma indi faktiki olaraq, bu ziyarətgah Ermənistan tərəfindən zəbt edilib. Ümumiyyətlə, SSRİ dağılandan sonrakı dövrdə Ermənistan sərhədi tədricən 400 metr irəli çəkərək, monastrı və onun yerləşdiyi ərazini mənimsəyib. Halbuki, bu monastr gürcülərə aiddir və onun arxitekturası da XIII əsr gürcü memarlıq üslubunun məhsuludur. Lakin ermənilər bunu qəbul etmək istəmir və gürcü torpaqlarını zəbt etməkdə davam edir. Amma təkcə sərhədləri irəli çəkməklə yox. Gürcüstan torpaqlarında ermənilərin separatçı ocaqlar yaratması da məlum həqiqətdir və bu xüsusda Samsxe-Cavaxetiya bölgəsində hadisələrin istənilən an nəzarətdən çıxa biləcəyi rəsmi Tiflisə də yaxşı məlumdur. Son məlumatlar isə həm Ermənistanın, həm də erməni lobbisinin artıq hərəkətə keçdiyini göstərir. Məsələ ilə bağlı "kavkazplus" saytı həm Rusiyada, həm də ABŞ-dakı erməni lobbisinin bu məsələdə xeyli aktivləşdiyini bildirir: "İndi ermənilərin Gürcüstanda yaratdığı təhlükənin miqyası daha da böyüyür. Əslində onu da aydın demək olar ki, Gürcüstanın bütün bədbəxtliklərinin arxasında erməni lobbisi dayanır. ABŞ-da erməni lobbisi yəhudi lobbisindən sonra ikinci nüfuzlu güc hesab olunur. Ermənilər super gücün xarici siyasətinə təsir edə bilirlər. Bu baxımdan, erməni lobbisinin ABŞ, ümumilikdə Qərb ölkələrinin köməyilə Gürcüstanda öz maraqlarını həyata keçirdiyi şübhəsizdir. Gürcüstanda ABŞ və Qərb ölkələrinin nümayəndələri yüksək səviyyədə qəbul olunur, onlara bütün qapılar açılır. Bu faktoru erməni lobbisi yaxşı anlayır və Vaşinqtondakı nüfuzlarından Gürcüstana qarşı dağıdıcı hücum üçün faydalanır. Gürcüstan üzərində cari hədəf Samsxe-Cavaxetiya bölgəsini ələ keçirməkdir. Erməni millətçilər bu bölgəni tarixi erməni torpağı hesab edir. Bundan başqa, Ermənistanın əsas hədəflərindən biri də Abxaziya və Tsxinvali üzərindən tranzit əldə etməkdir. İrəvan bu plan üçün Rusiya və bu ölkədəki erməni diasporundan istifadə etdi. Lakin gürcü rəsmilər qəti şəkildə belə tranzitə yol verməyəcəklərini bildirdilər. Görünür, hədəfə gedən yolda vasitə dəyişib. Ermənilər hədəfə çatmaq üçün indi də ABŞ və Avropa İttifaqı üzərindən Gürcüstana hücum etməyə qərar verib". Aparılan araşdırmada "Gürcüstanın erməni icması"nın saytında "ABŞ-dan qonaqlar Axaltsıxa gəldilər" başlığı ilə yayımlanan materiala diqqət çəkilir. Həmin materialda belə bir cümlə var: "ABŞ-dan, Amşendan və Ermənistandan qonaqlar Axaltsıxa gəldi və bir sıra şəhər tədbirlərində iştirak etdi".
"Kavkazplus" yazır ki, dünya xəritəsində Amşen adlı yer yoxdur və bu ada yalnız erməni millətçilərinin xəritələrində rast gəlmək olar: "Necə ki, Azərbaycanın işğal edilmiş Dağlıq Qarabağ bölgəsinə "Arstax" deyirlər, bu da ermənilərin özlərindən uydurduğu adlardan biridir. Dünyanın müxtəlif ölkələrində yaşayan bəzi erməni icmalarına amşen deyilir və onların tarixi torpağı kimi Gürcüstanın Samsxe-Cavaxetiya, həmçinin Axalkalaki, Axaltsıx, ümumilikdə Abxaziya bölgəsi göstərilir. Amşen erməniləri Gürcüstanın tarixində faciəli rol oynayıb. İndi Amerikadan gələn nümayəndə heyətinin tərkibində amşen ermənilərinin olması nə deməkdir? Hesab etmək olar ki, onlar Samsxe-Cavaxetiya bölgəsində yaşayan ermənilər arasında gizli şəkildə separatçılığı təbliğ edirl. Ən pisi odur ki, bu ermənilərin gəlişinə gürcü hakimiyyəti heç bir pis niyyət görmədən dəstək verib. Ermənilər öz məqsədlərini gizlətmir. Lakin bütün bunlar Gürcüstan üçün ikinci "Qarabağ ssenarisi" ola bilər". Beləliklə, Gürcüstanda da ermənilər gedərək təhlükəli bir vəziyyət yaradır. Bunun ciddi fəsadlarına qarşı Tiflis indidən qəti hərəkətə keçməsə, qonşu ölkəni daha ciddi problemlər gözləyir. Hər halda, ermənilərin kifayət qədər xəbis niyyətlərinin hansı mənfi nəticələrə gətirib çıxardığını gürcülər Qarabağ məsələsindən yaxşı bilirlər.
Tahir TAĞIYEV
