Samir Adıgözəlli: "İkinci kateqoriya ştatlar sırasına isə nisbətən ucqarları əlavə edə bilərəm"
Azərbaycan Respublikasının Prezidenti İlham Əliyev ABŞ-ın Arizona ştatının Nümayəndələr Palatasının sədri Mesnardı qəbul edib. Qonaq artıq bir neçə gündür Azərbaycana gəldiyini, Bakı və regionlarımızla tanış olduğunu qeyd edərək deyib ki, Azərbaycan çox gözəl ölkədir: "Mən ilk dəfədir buradayam. İnsanlar hər yerdə dostluq və qonaqpərvərlik nümayiş etdirir. Mən ABŞ-a geri döndükdə bu təəssüratlarımı hamı ilə bölüşəcəyəm". Mesnard Arizona ştatının qanunvericilərinin əksəriyyətinin Azərbaycan haqqında çox eşitdiyini bildirib.
Prezident İlham Əliyev qonağın Bakıda və regionlarda olmasının ölkəmiz haqqında daha geniş informasiya əldə edilməsi işinə kömək edəcəyini vurğulayıb. O qeyd edib ki, ABŞ-dan Azərbaycana daha çox səfərlərin həyata keçirilməsi insanlar arasında təmasların genişləndirilməsi və xalqlarımızın bir-birini daha yaxından tanıması baxımından önəmlidir və bu həm də ölkələrimiz arasında əməkdaşlığın möhkəmlənməsi işinə xidmət edəcək. Dövlət başçısı Azərbaycanla ABŞ arasında siyasi, iqtisadi, enerji, təhlükəsizlik sahələrində ikitərəfli münasibətlərin və eləcə də ölkəmizin ABŞ-ın ayrı-ayrı ştatları ilə əməkdaşlığının çox yaxşı səviyyədə olduğunu deyib. Prezident, eyni zamanda, ABŞ-ın bəzi regionlarında ictimaiyyətin ölkəmiz haqqında bir o qədər də dolğun məlumata malik olmadığını vurğulayaraq, Azərbaycan haqqında həqiqətlərin daha çox yayılmasının önəmini bildirib.
Göründüyü kimi, ölkə başçısı ABŞ-ın bəzi regionlarında ölkəmiz haqqında müfəssəl məlumatın olmadığına və bu istiqamətdə təbliğatın gücləndirilməsinin zəruriliyinə toxunur. İlham Əliyevin qeyd etdiyi ABŞ regionları hansılar ola bilər?
Dünya Azərbaycanlıları Konqresi icra aparatının rəhbəri Samir Adıgözəlli qəzetimizə bildirdi ki, ABŞ-da və dünyanın bir çox yerlərində belə problem mövcuddur: "Biz uzun illərdir Azərbaycanın Qarabağ dərdini, ermənilərin azərbaycanlılara qarşı törətdiyi təcavüzü dünyaya tanıtdırmağa çalışırıq. Ancaq elə ölkələr var ki, onların ərazisi genişdir. Fərqli seqmentlərində fərqli düşüncəli adamlar yaşayır. Bütün dünyanın diqqət mərkəzində olan və planetə ciddi təsir imkanına malik ölkələrdən biri Amerika Birləşmiş Ştatlarıdır. Həmin ölkədə Azərbaycanı tam tanıyırlarmı? ABŞ-ın əksər böyük şəhərlərində işlər aparılır. Dövlətin xəttilə bütün ölkəni əhatə etmək mümkün deyil. Bunun üçün xaricdə yaşayan soydaşlarımız və əsasən də imkanlılar lobbi, diaspor şəklində birləşməyə maraqlı olmalıdırlar. ABŞ-ın Azərbaycanı nisbətən az tanıyan regionlarında ölkəmizdə baş verən hadisələrə maraq yaratmaq üçün onların söz sahibləri, nüfuzlu şəxsiyyətləri ilə yaxşı münasibət qurmaq lazımdır. Doğrudan da elə ABŞ şəhərləri var ki, onların az sayda vətəndaşının Ermənistan-Azərbaycan münaqişəsindən xəbəri var. Bəllidir ki, ABŞ-da həm də güclü erməni lobbisi fəaliyyət göstərir. Bu da ABŞ-da ermənilərin təbliğatının müəyyən ştatlarda önə çıxmasına şərait yaradır.
Məsələn, Kaliforniya ştatında böyük bir şəhərcik onlarındır, hətta şəhərcikdəki əksər reklam lövhələri öz dillərində yazılıb. Həmin ştatda ermənilərin təsis etdiyi universitet var. Orada dünyanın hər yerindən tələbələr təhsil alır. Qeyd edim ki, ermənilər mitinq, nümayiş yoluyla deyil, şəxsi münasibətləri hesabına yerli söz sahiblərindən yararlana bilirlər. Məhz ermənilərin çox və kompakt yaşadığı ştatlarda Azərbaycanın lazımi şəkildə təbliğatına imkan vermirlər. İkinci kateqoriya ştatlar sırasına isə nisbətən ucqarları əlavə edə bilərəm. Bunun üçün orada yaşayan soydaşlarımız çox təşəbbüskar olmalıdırlar. Azərbaycanın tanıdılması və Qarabağ həqiqətlərinin ABŞ-da yayımlanmasında Azərbaycan səfirliyinin xidmətlərini danmaq olmaz. Ölkə başçısının nəzərdə tutduğu ABŞ regionları qeyd etdiklərimizdir ki, həmin istiqamətdə təbliğatı gücləndirməliyik".
Məhəmmədəli QƏRİBLİ
