Arzu Nağıyev: "Bu, Rusiyaya bir xəbərdarlıq mesajıdır"
Məlum olduğu kimi, Rusiyanın Federasiya Şurası Ermənistanla qoşunların birgə qruplaşmasına dair sazişi ratifikasiya edib. "Birgə qruplaşma Qafqaz regionunda kollektiv təhlükəsizliyə dair hərbi təhlükəsizliyin təmin edilməsi məqsədini daşıyır", - sənədə əlavə olunan izahlı materiallarda deyilir.
Qruplaşmanın tərkibinə mümkün təcavüzü dəf etmək üçün tərəflərin idarəetmə orqanları və silahlı qüvvələrin qoşunları daxil ediləcək.
Xatırladaq ki, Ermənistan parlamenti bu sazişi hələ ratifikasiya etməyib. Parlamentin bu məsələyə payızda baxacağı gözlənir.
Ermənistanın məhz belə bir məqamda NATO ilə əməkdaşlığı genişləndirməsi onu göstərir ki, İrəvan iki cəbhə boyunca oynamağa çalışır. Bunu Rusiya prezidentinin səlahiyyətli nümayəndəsi, Rusiya İctimai Palatasının üzvü, politoloq Sergey Markov deyib. Onun sözlərinə görə, bu gün Gürcüstanda başlayan və NATO-nun himayəsi altında keçirilən çoxmillətli hərbi təlimlərdə iştirak etməklə Ermənistan Rusiya ilə yanaşı, Qərb koalisiyası ilə də münasibətləri qoruyub saxlamağa çalışır: "Məlumdur ki, bu gün bir çox ölkə NATO ilə əməkdaşlığı dəstəkləyir. Biz görürük ki, Gürcüstan tam şəkildə alyansın müttəfiqidir. Azərbaycan, Qazaxıstan, Belarus Qərb koalisiyası ilə sıx münasibətlər saxlayır. Bununla belə, bu ölkələrin heç biri NATO təlimlərində iştirak etmir".
S.Markov qeyd edib ki, Ermənistan isə Rusiya ilə müttəfiq olduğunu desə də, əslində, başqa siyasət, digər sözlə, NATO ilə geniş əməkdaşlıq siyasəti yeridir. Onun sözlərinə görə, Ermənistan öz müttəfiqi qismində Rusiyadan mənafeləri üçün istifadə edir: "Bu yolla da Ermənistan rəhbbərliyi nümayiş etdirir ki, onlar Rusiyanın Azərbaycanla əməkdaşlığından, xüsusilə də Rusiya silahlarının Azərbaycana satışından məmnun deyil".
Qeyd edək ki, Gürcüstanda NATO-nun "Layiqli tərəfdaş-2017" çoxmillətli hərbi təlimləri start götürüb. Bu təlimlərdə erməni hərbçiləri də iştirak edir.
Ermənistanın bu cür ikibaşlı oyunu nəyə hesablana bilər?
Təhlükəsizlik məsələləri üzrə ekspert Arzu Nağıyev qəzetimizə bildirdi ki, birgə ordu birləşməsi və ya komandanlıq deyəndə ilk növbədə Rusiya qoşunları başa düşülür: "Sadəcə olaraq Rusiya bunu leqallaşdıraraq daha münasib hüquqi müstəviyə keçirir. Məhz buna görə də Dumada bu ratifikasiya olunmalıdır. Çünki gələcəkdə bu qoşun növünə komandanlıq belə təyin ediləndə, bu, Rusiya tərəfindən ediləcək. Ermənistan da bunu başa düşür və bilir ki, parlamentdə bu asanlıqla həll edilən məsələ deyil. Məhz buna görə də Ermənistan prezidenti heç bir səlahiyyət sahibi ola bilməyəcəyini, olsa da ikinci dərəcəli fiqur ola biləcəyini dərk edir. Yəni hazırda ali baş komandan kimi Sarkisyan ancaq erməni ordusuna təyinat həyata keçirə bilər, birləşmiş orduya yox. Eyni zamanda bu ordunun yaradılmasında məqsəd heç də Ermənistanı müdafiə etmək deyil, NAT0-Rusiya sərhədinin, Türkiyə-Ermənistan sərhədinin qorunmasıdır. Belə alınır ki, Rusiya öz sərhədlərində bufer zona yaradır. Qeyd etmək istərdim ki, bu gün Ermənistanın həm quru sərhədi, həm də hava məkanı Rusiya tərəfindən qorunursa və ərazidə olan 102 saylı hərbi baza Ermənistanın daxili işlərinə, siyasi, iqtisadi və hətta ictimai işlərinə müdaxilə etmək hüququna malikdirsə, KTMT-nin üzvüdürsə, bu dövlət artıq hərbi cəhətdən tam asılı olan bir subyektə çevrilir.
Ermənistan bunu dərk etdiyi və Rusiyaya artıq güvənmədiyi üçün NATO-ya, daha doğrusu, Qərbə meyllənir. Bu həm Rusiyaya bir xəbərdarlıq mesajıdır, həm də Soçi görüşündən sonra keçirdikləri qorxu hissidir".
Məhəmmədəli QƏRİBLİ
