Qulu İsmayılov: "Azərbaycanın istehsal etdiyi silahlar həm keyfiyyətlidir, həm də çox da baha deyil"
Müdafiə sənayesi naziri Yavər Camalov MSN-nin müəssisələrində 2017-ci ilin birinci yarımilinin yekunlarına dair səyyar kollegiya iclasında deyib ki, cari ilin sonunadək xüsusi təyinatlı hücum pulemyotunun, avtomatik qumbaraatan kompleksinin, əl qumbaraatanının, avtomatların, müxtəlif tipli artilleriya atəş yığımlarının, VOQ-25P tipli atəş yığımının, artilleriya mərmiləri üçün partladıcıların və s. məmulatların silahlanmaya tövsiyə edilməsi nəzərdə tutulur.
O bildirib ki, birinci yarımildə istehsal olunan ümumi məhsulun 92 faizini müdafiə və xüsusi təyinatlı, 8 faizini isə mülki təyinatlı məmulatlar təşkil edir: "Ölkə Prezidentinin tapşırığına əsasən, idxalının yerli istehsalla əvəzlənməsi məqsədilə respublikanın müvafiq qurumlarının sifarişləri əsasında illik istehsal gücü 3000 ədəd olan "Dalma" tipli dərinlik su nasoslarının müəssisədə istehsalı sahəsi yaradılıb və məmulatın istehsal edilərək sifarişçilərə təhvil verilməsinə başlanıb. Hesabat dövründə nazirliyin qarşısında duran əsas prioritet məsələlərdən biri də dünyanın inkişaf etmiş ölkələrinin hərbi sənaye kompleksinə daxil olan şirkət və firmalarla mövcud əməkdaşlıq əlaqələrinin davam etdirilməsi və yeni əlaqələrin yaradılması olub. Bu istiqamətdə aparılan danışıqların nəticəsidir ki, bu gün Müdafiə Sənayesi Nazirliyinin müəssisələrində yaradılan və istehsal olunan milli məhsullar beynəlxalq müdafiə sərgilərində nümayiş etdirilir".
Nazir qeyd edib ki, bu gün nazirliyin müəssisələrində yaradılan və istehsal olunan xüsusi təyinatlı məhsullardan - döyüş sursatlarının, müasir atıcı və artilleriya silahlarının, pilotsuz uçuş aparatlarının, zirehli texnikaların və s. ixracı həyata keçirilir: "Hazırda 10-dan çox ölkəyə Azərbaycanın istehsalı olan müdafiə təyinatlı məmulatlar ixrac olunur".
Azərbaycanın 10-dan çox ölkəyə müdafiə təyinatlı məhsul ixrac etməsi nəyin göstəricisi sayıla bilər?
Ekspert Qulu İsmayılov qəzetimizə bildirdi ki, ölkə başçısı Müdafiə Sənayesi Nazirliyinin yaradılması ilə bağlı qərar verəndə bu istiqamətdə müsbət və mənfi bütün məqamları nəzərə aldı: "Hesab edirəm ki, Prezidentin bu qərarı çox düzgün qərar oldu. Çünki Azərbaycanın qısa müddətdə öz müdafiə sənayesini inkişaf etdirmək üçün çox imkanları var. Yəni müdafiə sənayesi xətti ilə Azərbaycan qısa bir müddətdə həm öz ordusunun daxili silah tələbatını və eyni zamanda da bizim istehsal etdiyimiz məhsullarla digər ölkələrin də ordusunun silah tələbatını ödəyə bilər.
Qeyd edim ki, Azərbaycan öz istehsal etdiyi silahları həm sərgilərdə, həm də dövlətlər arasında olan ikitərəfli münasibətlər çərçivəsində təklif edir. Yəni Azərbaycan ölkələrə öz imkanlarını təqdim edir və həmin yeni ixrac istiqamətlərindən biri də müdafiə sənayesi xətti ilə buraxılan silah ticarətidir. Onu da qeyd edim ki, bizim Müdafiə Sənayesi Nazirliyinin Bakıdakı, həm də regionlardakı müəssisələrində artıq çox böyük həcmdə məhsullar istehsal olunur. Yəni istehsal olunan məhsullar əvvəllər 600-800 adda idi, amma indi 1000-i keçib. Bu məhsullar da bir sıra ölkələrə ixrac olunur. Bildiyimiz kimi, silah ticarəti dünyada ən bahalı ticarətdən biri sayılır. Hətta əksər ölkələr öz büdcəsini silah ticarəti ilə doldurur. İndi Azərbaycan da bu fürsətdən yararlanır. Silah ticarəti elə bir sahədir ki, buraya qoyulan vəsait 2-3 qat özünü doğruldur. Artıq silah ticarəti Azərbaycana böyük həcmdə valyuta gətirir.
Azərbaycanın istehsal etdiyi silahlar həm keyfiyyətlidir, həm də, bəzilərindən fərqli olaraq, çox da baha deyil. Düşünürəm ki, dünya bazarlarında Azərbaycan məhsulları brend məhsullar sırasında özünə möhkəm yer tutacaq. İnanıram ki, bizim mütəxəssislərin istehsal etdiyi silahlar özünə geniş alıcı kütləsi toplayacaq.
Silahlar Azərbaycanın özündə istehsal olunur deyə, qiyməti də alıcılar üçün cəlbedici olur. Amma qeyd edim ki, biz ABŞ, Rusiya, Almaniya, İsrail kimi dövlətlərlə rəqabətə girmək fikrində deyilik və bu fikirdən də çox uzağıq. Çünki o ölkələrin yüzilliklərlə oturuşmuş imkanları var. Amma Azərbaycan yeni müstəqil dövlətdir. Buna baxmayaraq, bu qısa müddətdə Azərbaycan bacardığını edib. Azərbaycanın istehsal etdiyi silahlar kifayət qədər rəqabətədavamlıdır və bu məhsulların da öz alıcıları var".
Məhəmmədəli QƏRİBLİ
