Elçin Mirzəbəyli: "Azərbaycan yalnız substantiv danışıqlar bərpa olunacağı halda prosesdə iştirak edəcəyini bəyan edir"
Hərbi əməliyyatlar üçün əlverişli olan yay mövsümü davam etsə də, hələ ki, genişmiqyaslı toqquşmaları önləmək mümkün olur. Bu isə heç də sülh danışıqlarında hansısa ciddi dönüşlə bağlı deyil. Belə bir dönüş, irəliləyiş əfsuslar olsun ki, yoxdur. Bu da o anlama gəlir ki, əslində, böyük toqquşma hər an baş verə bilər.
Bütövlükdə, Dağlıq Qarabağ münaqişəsi zonasında yeni müharibə risqi olduqca böyükdür. Yaranmış durumda ərazisinin 20 faizi işğal altında olan Azərbaycanın özünün hərbi qüdrətini artırmaq və işğalçıya qarşı informasiya-təbliğat savaşını gücləndirməkdən savayı yolu qalmır.
Bu arada ABŞ-ın özəl kəşfiyyat araşdırmaları mərkəzi "Stratfor"un məruzəsində bildirilir ki, Azərbaycan münaqişənin nizamlanmasından ümidini üzüb və silahlanmanı davam etdirir, öz arsenalını gücləndirir. Rusiya və İsraildən milyardlarla dollarlıq silah alır. Ermənistan isə münaqişəyə görə getdikcə daha çox təcrid vəziyyətinə düşür: "Dördgünlük müharibə Rusiyanın dəstəyinin hüdudlarını göstərdi, İrəvanın Moskvanın dəstəyi məsələsində ümidləri doğrulmadı. Azərbaycan regionda Rusiyanın əsas tərəfdaşı olmaq məsələsində Ermənistanı sıxışdırdıqca, Yerevanda narahatlıq artır ki, Moskva Dağlıq Qarabağ üzərində nəzarəti Bakıya verə bilər".
Bütün bunların fonunda belə fikirlər var ki, ya Ermənistan substantiv danışıqlara məcbur ediləcək, ya da Azərbaycan müharibəyə başlayacaq. Maraqlıdır, bunlardan hansı daha realdır?
Məsələyə münasibət bildirən politoloq Elçin Mirzəbəyli belə bir situasiyada müharibə variantını istisna etmədi: "Son zamanlar Ermənistanın cəbhə xəttində mütəmadi olaraq təxribat törətməsi və Azərbaycanın mülki əhalisini atəşə tutması sübut edir ki, rəsmi Yerevan danışıqların pozulmasında maraqlıdır. Azərbaycan da yalnız substantiv danışıqlar bərpa olunacağı halda prosesdə iştirak edəcəyini bəyan edir. Bu aspektdən, təbii ki, Ermənistana qarşı ATƏT-in Minsk Qrupunun həmsədri olan ölkələr tərəfindən təzyiqlər olmayacaqsa, işğalçı ölkə sanksiyalara məruz qalmayacaqsa, şübhəsiz, müharibə ehtimalı indiki şəraitdə daha yüksəkdir. Bu aspektdən Azərbaycan ilk növbədə özünün mülki əhalisinin təhlükəsizliyini təmin etmək, digər tərəfdən də uzun illərdir davam edən işğala son qoymaq üçün konkret addımlar atmaq məcburiyyətindədir. Fikrimcə, Xarici İşlər Nazirliyi ilə Müdafiə Nazirliyinin bir neçə gün öncə verdiyi bəyanat da, əslində, beynəlxalq birliyə xatırlatma idi. Yəni proseslər bu cür davam edəcəksə, işğalçının ram edilməsi üçün konkret addımlar atılacaq".
Vidadi ORDAHALLI
