Məhəmməd Əsədullazadə: "Bu təlimlərdə Azərbaycan iştirak etmədi. Çünki Ermənistanla eyni təlimlərdə iştirak qəbuledilməzdir"
Məlum olduğu kimi, iyulun 30-da Gürcüstanın Vaziani hərbi bazasında "Layiqli tərəfdaş -2017" çoxmillətli təlimlər başlayıb. Bu tədbir artıq üçüncü dəfədir Gürcüstanda keçirilir. Amma əvvəlki illərlə müqayisədə busəfərki ən genişmiqyaslısıdır. Gürcüstandan başqa, təlimlərdə NATO üzvü və tərəfdaşı olan səkkiz ölkə iştirak edir. 13 gün ərzində Gürcüstan hərbçiləri ABŞ, Böyük Britaniya, Almaniya, Türkiyə, Sloveniya, Ermənistan və Ukrayna hərbçiləri ilə birgə əməliyyat üzərində çalışacaqlar. Təlimlərin əsas mesajı - "Güc tərəfdaşlıqdadır". Bu təlimlərdə ümumilikdə 2800-dən çox hərbçi iştirak edir.
"Layiqli tərəfdaş - 2017" çoxmillətli təlimləri ABŞ-ın Avropadakı ordusunun Qara dəniz hövzəsində apardığı təlimlər silsiləsinin bir hissəsidir. Təlimlər yeddi dövlətin ərazisində aparılır. Gürcüstanda təlimlərin təşkilatçısı ölkənin silahlı qüvvələri və ABŞ ordusunun Avropa komandanlığıdır.
İkrah doğuran məqam ondan ibarətdir ki, NATO çərçivəsində keçirilən təlimlərə Ermənistan kimi militarist, işğalçı dövlət cəlb olunub. Bu da dünya KİV-lərində birmənalı qarşılanmayıb. Təlimlərin adı "Layiqli tərəfdaş"dır. Sual olunur, Ermənistanın ləyaqəti var ki, sözügedən ölkə belə təlimlərə dəvət olunub? Halbuki, NATO kimi qurum yaxşı bilir ki, Ermənistan işğal etdiyi Azərbaycan torpaqlarından çıxmayıb. Belə olan halda, işğalçı bir dövlətin sözügedən təlimlərə cəlb olunması biabırçılıqdır. Həyasızlığın dərəcəsinə bax ki, erməni mətbuatı Ermənistanın NATO təlimlərinə qatılması ilə Qarabağ məsələsində əlavə dividendlər əldə edəcəyini güman edir. İstənilən halda, NATO-nun Ermənistanla bağlı qərarı ikrah doğurur. Sözügedən məsələ ilə bağlı fikirlərini "Bakı-Xəbər"lə bölüşən politoloq Məhəmməd Əsədullazadə NATO-nun qərarına tənqidi prizmadan yanaşdı: "Ermənistanın NATO çərçivəsində "Layiqli tərəfdaş-2017" kod adlı hərbi təlimlərə cəlb edilməsi işğalçı ölkəyə qarşı Qərbin Rusiya əleyhinə siyasət formalaşdırmasından ibarətdir. Ondan əlavə, belə bir təlimlər işğalçıya dəstəyi artırır və Qarabağ münaqişəsinin həllində irəliləyişə mane olur. NATO Ermənistana təzyiq etmək əvəzinə, onunla birgə taktiki təlimlər keçirirsə, bu, ikili standartlardan yanaşmadır. Ona görə də sözügedən hərbi blokun bu cür yanaşması qəbuledilən deyil. Bu, NATO-nun yanlış siyasət aparmasının göstəricisidir. Hesab edirəm ki, rəsmi Yerevan bu təlimlərdən sonra daha da aqressiv siyasət sərgiləyəcək. NATO çox yanlış siyasət apararaq işğalçı ölkəyə meydan tanıyır. Bu təlimlərdə Azərbaycan iştirak etmədi. Çünki Ermənistanla eyni təlimlərdə iştirak qəbuledilməzdir".
Vidadi ORDAHALLI
