Elşən Mustafayev: "Ermənilərin bu davranışı prosesi uzatmağa qadir deyil, əksinə, müharibənin başlanmasını sürətləndirə bilər"
İyulun 30-na keçən gecə və səhər saatlarında Qazax rayonunun Bala Cəfərli, Quşçu Ayrım, Ağstafa rayonunun Köhnəqışlaq və Tovuz rayonunun Qaralar kəndləri Ermənistan silahlı qüvvələri tərəfindən iriçaplı silahlardan intensiv atəşə məruz qalıb. Müdafiə Nazirliyinin mətbuat xidmətindən bildiriblər ki, yaşayış məntəqələrindəki mülki obyektlərə, əkin sahələrinə və əhalinin şəxsi təsərrüfatına ziyan dəyib.
Düşmən atəşinin qarşısı alınarkən Silahlı Qüvvələrimizin hərbi qulluqçusu Əkbərli Hüseyn Zakir oğlu şəhid olub.
Hazırda cəbhə xətti boyu əməliyyat şəraiti qoşunlarımızın nəzarəti altındadır.
Müdafiə Nazirliyi bir daha bəyan edir ki, düşmənin bu təxribatına qarşı qoşunlarımız tərəfindən daha sərt cavab tədbirləri görüləcək.
Göründüyü kimi, erməni silahlı birləşmələrinin harınlığı yalnız Dağlıq Qarabağ ərazisində davam etmir. Artıq onlar bütün cəbhə boyu, hətta Ermənistan-Azərbaycan sərhədində belə aktivləşməyə başlayıb. Bu addımları ilə Ermənistan hansı məqsədi güdür?
Ekspert Elşən Mustafayev qəzetimizə bildirdi ki, Ermənistan bu təxribatları təsadüfən törətmir: "Təxribatların miqyasının Dağlıq Qarabağdan kənarlara sıçraması Ermənistanın növbəti məkrindən xəbər verir. Ermənistanın istəyi odur ki, hər vəchlə Azərbaycanı mövcud durumla razılaşmağa məcbur etsin. Çalışırlar ki, beynəlxalq müşahidəçilər və ya faktaraşdırıcı missiya gəlib orada otursunlar. Beləliklə, onlar işğal etdiyi Azərbaycan ərazilərində rahat otura bilsin, mövcud vəziyyəti saxlasınlar. Ancaq bu cür təxribatlarla onlar nəyəsə nail ola bilməyəcək. Çünki Azərbaycanın son proseslərlə bağlı mövqeyi bəllidir. Biz ən ali səviyyədə bəyan etmişik ki, mahiyyəti üzrə danışıqlar aparılmalıdır. Atəşkəs onun üçün elan olunmuşdu ki, hərbi münaqişə başa çatsın və ermənilər işğal etdiyi torpaqlardan geri çəkilsin. Lakin ermənilər öz iddialarından geri çəkilmir. Ermənistanın provokasiyaları genişmiqyaslı döyüşlərin bərpasına gətirib çıxara bilər. Onlar bütün mühüm danışıqlar ərəfəsində belə provokasiyalara əl atır. Xarici işlər nazirlərinin görüşü ərəfəsində Alxanlıda dinc əhalini gülləbaran etdilər. İndi də prezidentlərin növbəti görüşü gözlənir. Münaqişənin gərginləşməsini bilərəkdən Ermənistan-Azərbaycan sərhədinə keçirirlər ki, dünyaya fərqli mənzərənin olduğunu göstərsinlər. Desinlər ki, heç də Dağlıq Qarabağda status-kvonu dəyişməklə problem həllini tapan deyil. Münaqişə daha geniş əraziləri əhatə edir. Ancaq ermənilərin bu davranışı prosesi uzatmağa qadir deyil, əksinə, müharibənin başlanmasını sürətləndirə bilər".
Məhəmmədəli QƏRİBLİ
