Mehdi Mehdiyev: "Ermənilərin bu tip açıqlaması sırf provokasiya xarakteri daşıyır"
Dağlıq Qarabağdakı separatçıların qondarma "müdafiə naziri" mətbuata müsahibəsində növbəti iftiralar səsləndirib.
O bildirib ki, cəbhədə baş verənlərlə bağlı bir sıra yeni addımlar atmağa məhkum olublar: "Biz hərbi qulluqçularımızın təhlükəsizliyini təmin etmək üçün videomüşahidəni gücləndirmişik. Əminliklə deyə bilərik ki, biz təhlükəsizliyimizin təminatı üçün əlimizdən gələn nə varsa etmişik. Aprel döyüşləri zamanı biz Azərbaycanın ən müasir növ silahlardan istifadə etdiyinin şahidi olduq. Bu o anlama gəlir ki, Dağlıq Qarabağın təhlükəsizlik arealını istənilən vaxt genişləndirmək zərurəti ortaya çıxa bilər və biz bu addımları atarıq".
Qondara qurumun "müdafiə naziri" bununla demək istəyir ki, hazırda işğal altında olan 7 rayonun sayına bir neçəsini də əlavə edə bilərlər və bunun da adını təhlükəsizlik arealının genişləndirilməsi qoyurlar. Belə bir təhlükə nə dərəcədə realdır?
Ekspert Mehdi Mehdiyev qəzetimizə bildirdi ki, buna ermənilərin növbəti xülyası demək olar: "Bilirsiniz ki, hazırda Dağlıq Qarabağ və ona bitişik olan 7 rayon erməni silahlı qruplaşmalarının əlindədir. Ermənilər danışıqlar zamanı Dağlıq Qarabağa iddialarının olduğunu açıq ortaya qoyurlar. Ətraf rayonların işğalını isə təhlükəsizlik buferinin yaradılması ilə izah edirlər. Əslində isə, ermənilər işğal etdiyi əlavə rayonlardan danışıqlar prosesində vasitə kimi istifadə edirlər. Onların işğaldan azad olunmasının müqabilində Azərbaycandan əlavə güzəşt qoparmağa çalışırlar. Hazırkı dönəmdə qondarma qurumun rəsmisi tərəfindən oxşar açıqlamanın səsləndirilməsi təsadüfi xarakter daşıya bilməz. Əvvəla ermənilərin özləri də gözəl bilir ki, belə bir istəyi reallaşdırmaq istəsələr, Azərbaycan Ordusu onların lazımi şəkildə cavabını verəcək. Aprel döyüşlərində cəbhə boyu onların belə bir cəhdi oldu, ancaq nəticədə geri çəkilməli oldular. İndiki məqamda belə bir bəyanatın səslənməsi təsadüfi deyil. Onlar bununla dünyaya çatdırmaq istəyirlər ki, təhlükəsizlikləri üçün əlavə təminata ehtiyac var və cəbhədəki vəziyyət stabil deyil. Bunu prezidentlərin nəzərdə tutulan danışıqlarından öncə edirlərsə, deməli, sülh prosesini yenidən pozmağa kökləniblər. Azərbaycan heç vaxt bu işğal faktoru ilə barışmayıb və hər an torpaqlarını azad etməyə hazır olduğunu deyir. Ermənilərin bu tip açıqlaması sırf provokasiya xarakteri daşıyır. Çünki onlar deyiləni etmək gücündə deyillər. Bunu özləri hamıdan gözəl bilir. Yaxın zamanlarda görərik kim cəbhədə öz arealını genişləndirməyə qadir olacaq".
Məhəmmədəli QƏRİBLİ
