Arzuxan Əlizadə: "Ən iyrənc "dedovşina" halları məhz qarşı tərəfin silahlı qüvvələrində baş verir"
Son zamanlar Ermənistan ordusunda artmaqda olan ölüm və ağır bədən xəsarətləri ilə nəticələnən cinayət tərkibli hadisələrdən erməni ictimaiyyətinin diqqətini yayındırmaq məqsədilə düşmən planlaşdırılmış təxribatlar həyata keçirir.
Belə tədbirlərdən biri də Ermənistan tərəfindən sosial şəbəkələrdə azərbaycanlı adı altında saxta profillər yaratmaqla, guya Azərbaycan Ordusunda müxtəlif hadisələrin baş verdiyini iddia edən yalan məlumatların vaxtaşırı yayılmasıdır. Müdafiə Nazirliyinin məlumatına görə, aparılan araşdırma nəticəsində məlum olub ki, "Facebook" sosial şəbəkəsində Ermənistanın xüsusi xidmət orqanları tərəfindən yaradılan "Tofiq İbrahimov" adlı saxta profil Azərbaycan Ordusu barədə yalan, iftira, təxribat məqsədli xəbərlər yayır. Həmin profildə paylaşılan bütün hadisələr uydurmadır, ad və soyadları çəkilən şəxslərin Silahlı Qüvvələrə heç bir aidiyyəti yoxdur.
Əslində, reallıq ondan ibarətdir ki, son zamanlar məhz Ermənistan ordusunda neqativ halların sayının artması müşahidə olunur. Əsgərlərin yaxın qohumları və dostlarının sosial şəbəkələrdə yaydığı məlumatlar bunu təsdiq edir. Bir müddət əvvəl Azərbaycanın işğal olunmuş ərazilərində yerləşən hərbi hissələrin birində müddətli hərbi xidmət keçən üç hərbi qulluqçu arasında əlbəyaxa dava ilə nəticələnən münaqişə baş verib. Münaqişəyə səbəb kimi zabitlərin laqeyd münasibəti nəticəsində əsgərlər arasında "dedovşina" hallarının artması göstərilir.
Görünən odur ki, ermənilər öz ordularında müşahidə olunan başıpozuqluq və digər neqativ hallardan diqqəti yayındırmaq, saxta profillərdə diqqəti Azərbaycan Ordusuna yönəltmək istəyirlər.
Məsələyə münasibət bildirən AMİP-in baş katibi Arzuxan Əlizadənin sözlərinə görə, ermənilərin bu kimi təxribatları hər zaman gözləniləndir: "Çünki qarşı tərəf çox məkrli və hiyləgər olduğu üçün, bütün vasitələri işə salır. Əslində, müşahidələr göstərir ki, Ermənistan ordusunda neqativ hallar daha çoxdur. Ən iyrənc "dedovşina" halları məhz qarşı tərəfin silahlı qüvvələrində baş verir. Bununla bağlı epizodlar zaman-zaman Ermənistan və digər ölkələrin mətbuatında öz əksini tapıb. "Dedovşina" və digər bu kimi səbəblər üzündən Ermənistan ordusunda ölən hərbçilərin çox vaxt sayı gizlədilir. Ancaq sözügedən ölkədə fəaliyyət göstərən təşkilatların yaydığı hesabatlardan məlum olur ki, belə hallar düşmən ordusunda kütləvi baş verir. Dəfələrlə bununla bağlı Ermənistanda əsgərlərin valideynləri etiraz ediblər. Ona görə də Ermənistan öz ordusunda baş verən neqativ hallardan diqqəti yayındırmaqdan ötrü bu cür dezinformasiyalar yayır. Hesab edirəm ki, belə hallara qarşı dərhal adekvat cavab verilməlidir".
Vidadi ORDAHALLI
