Rəsul Cahangirli: "Dünyanın aparıcı maliyyə qurumlarının Ermənistandakı layihələri maliyyələşdirməkdə maraqlı olmasından söhbət gedə bilməz"
Avropa İttifaqına daxil olan zəif regionların iqtisadi baxımdan dəstəklənməsi üçün 1958-ci ildə Avropa İnvestisiya Bankı yaradılıb. Onun əsas məqsədləri iqtisadi cəhətdən zəif olan regionları uzun müddətə maliyyələşdirmək idi. Həmçinin, bu məqsədlərə onların 40 il müddətinə kreditlə təmin edilməsi də daxil idi. Beləliklə, effektiv faiz dərəcəsi digər banklarla müqayisədə nəzərəçarpacaq dərəcədə aşağı enmişdi. Bu, iqtisadi cəhətdən zəif olan ölkələrə dirçəlmək imkanı yaratdı.
Bankın idarə olunması İdarə Heyəti tərəfindən həyata keçirilir. Onun tərkibinə layihəyə üzv ölkələrdən maliyyə nazirləri daxildir. Nizamnamə kapitalının əksər hissəsi İngiltərə, Fransa, İtaliya, Almaniya kimi ölkələrdə yerləşir. Digər dövlətlərin diqqətini cəlb etmək məqsədilə Avropa İnvestisiya Bankı istiqrazların emissiyası ilə məşğul olur. Avropa İnvestisiya Bankının verdiyi kreditlər nəqliyyatın, energetikanın və sairənin inkişafına xərclənir. İnkişaf etməkdə olan ölkələr bu bankın maraq dairəsinə daxildir. Bank Avropa Birliyi xaricində də birliyin üzvü olmayan ölkələrə yönəlmiş əməkdaşlıq siyasətinin həyata keçirilməsinə kömək edir.
Bu arada erməni saytlarının yaydığı məlumata görə, Avropa İnvestisiya Bankı Ermənistanla əməkdaşlıq çərçivəsində orada bir sıra layihələrə investisiya ayırmağı nəzərdən keçirir. Həmçinin, Ermənistanla əlaqələri genişləndirmək istəyir.
Maraqlıdır, səslənən fikirlər nə dərəcədə reallığı əks etdirir?
Məsələyə münasibət bildirən ekspert Rəsul Cahangirli bunu istisna etdi: "Düzdür, Ermənistan istərdi ki, Avropa İnvestisiya Bankı və digər nüfuzlu maliyyə qurumları onlarla əməkdaşlıq etsin. Eyni zamanda, Ermənistanda həyata keçirilən layihələri maliyyələşdirməkdə maraqlı olsunlar. Ancaq bu yalnız arzudan ibarət ola bilər. Çünki Ermənistanın həyata keçirdiyi militarist siyasət bu ölkəni təcrid edib. Bir sıra enerji və nəqliyyat layihələrindən adıçəkilən ölkə kənarda qalıb. İstənilən ölkəyə sərmayə qoyan bank bu sərmayəni sonra nə cür götürməyi də hesablayır. O baxımdan aydın məsələdir ki, Ermənistana qoyulan sərmayə geri qayıdan deyil. Belə olan halda, əlbəttə ki, dünyanın aparıcı maliyyə qurumlarının Ermənistandakı layihələri maliyyələşdirməkdə maraqlı olmasından söhbət gedə bilməz. Çünki bu ölkə iqtisadi baxımdan beynəlxalq maliyyə qurumları üçün cəlbedici deyil. Nəzərə almaq lazımdır ki, Ermənistandan köçənlərin böyük hissəsini əmək qabiliyyətli əhali təşkil edir. İqtisadi baxımdan ölkənin geriləməsi davamlı xarakter alıb".
Vidadi ORDAHALLI
