Elşən Həsənov: "Ermənilər bunları bizdən yaxşı bilir"
Dağlıq Qarabağ ərazisində müvəqqəti olaraq fəaliyyət göstərən qondarma qurumun rəhbərliyi hərdənbir "maraqlı" ideya ortaya atmaqla diqqəti özlərinə cəlb edir. Artıq keçirilən saxta "seçki"lər və "referendum"ların heç bir effekt vermədiyini gördükdən sonra, fərqli sahələr üzrə insanların beynini məşğul etməyə çalışırlar.
Bir neçə gün bundan əvvəl qondarma qurumun rəhbərliyi Dağlıq Qarabağ ərazisində nərə balığı yetişdirmək niyyətində olduğunu bildirdi. Bunun ardınca isə elə həmin rəhbərlik bildirir ki, Qarabağda zeytun plantasiyaları salmaq niyyətindədir. Bütün bu qeyri-ciddi bəyanatlar nəyə hesablana bilər?
Ekspert Elşən Həsənovun sözlərinə görə, bunlar diqqəti cəlb etməyə hesablanıb: "Başqa sözlə, buna ucuz şou da deyə bilərik. Çünki qondarma qurumun adı daim terrorçulara dəstək verməkdə, narkotik plantasiyaları əkməkdə hallanır. Atdıqları siyasi addımların heç biri effekt vermir. Əksinə, özlərinə qarşı işləyir. Buna görə də cəlbedici ideyalarla özlərini diqqətdə saxlamağı hədəfləyirlər. Təsəvvür edin ki, əvvəllər bunlar işğal altında olan torpaqların, gözəl yerlərin turizm imkanlarını təbliğ edirdilər. Həmin zonanı turizm məkanına çevirmək istəyirdilər. Əvəzində nə oldu? Hazırda qorxusundan ora heç kim getmir. Çünki Azərbaycan elə iş aparır ki, ora bizim icazəmiz olmadan səfər edənləri ağır cəzalar gözləyir. Dünyanın 3 tanınmış ölkəsinin vətəndaşı olan Lapşinin aqibəti hamıya görk oldu. Bütün bu uğursuzluqlar erməniləri utopiyadan danışmağa sövq edir. Nərə balığı dənizdə, iri hövzəli sularda olur. Azərbaycanın Xəzər nərəsi həm də bizim brendimizdir. Ermənilər bizə məxsus olan cəlbedici adları, dadları oğurlamağa öyrəncəlidir. Bu vasitə ilə nərəni də özününküləşdirmək istəyirlər. Alınan deyil. Zeytun da Azərbaycanın Abşeron yarımadasında yetişdirilir. Həmin məhsul Dağlıq Qarabağın iqlimi üçün xarakterik deyil. Ermənilər bunları bizdən yaxşı bilir. Sadəcə, boş qaldıqları üçün, belə perspektivsiz işlərə vaxt ayırırlar".
Məhəmmədəli QƏRİBLİ
