Son zamanlar işğalçı Ermənistanda ciddi narahatlıq yaradan məqamlardan biri də Azərbaycanın müxtəlif ölkələrdən, o cümlədən Rusiyadan, Türkiyədən, İsraildən, Pakistandan hərbi təyinatlı müasir texnikalar almasıdır. Amma düşmənin bu xüsusda narahatlıq və narazılığı hansısa ciddi əhəmiyyət kəsb etmir. Əksinə, Azərbaycan adları çəkilən, eləcə də çəkilməyən ölkələrdən hərbi texnika alışını davam etdirir. Bütün bunlar isə ölkəmizin Ermənistan üzərində hərbi üstünlüyünü daha da artırır.
Belə görünür, əslində erməni tərəfi qarşıdakı günlər ərzində Azərbaycanın hərbi texnika alışından daha çox narahat olmağa başlayacaq. Çünki Azərbaycan bu qəbildən olan yeni texnikaların alışına növbəti hazırlıq görür. Belə bir vaxtda yayılan məlumatlara əsasən, Pakistan aviasiyasının marşalı Ərşad Malik və Azərbaycan Hərbi Hava Qüvvələrlərinin komandanı, general-leytenant Ramiz Tahirov Azərbaycan Hərbi Hava Qüvvələrinə on ədəd "Super Muşak" təyyarəsinin çatdırılması haqqında razılaşma imzalayıb. Müqavilə, təyyarələrin çatdırılmasından başqa, həm də texniki dəstəyi, pilotların praktiki hazırlığına köməyi nəzərdə tutur. Məsələ ilə bağlı Pakistan Müdafiə Nazirliyinin press-relizində deyilir: "Bu tarixi razılaşma iki qardaş ölkə arasında ikitərəfli əlaqələrin daha da möhkəmlənməsinə imkan yaradacaq".
Məlumat üçün bildirək ki, "Super Muşak"ın hazırlanmasına 1995-ci ildə başlanıb. Təyyarə ilk uçuşunu 1996-cı ilin avqustunda yerinə yetirib. Pakistanın Hərbi Hava Qüvvələrlərinin silahlandırılmasına isə 2001-ci ilin mayında qəbul edilib. "Super Muşak " "MFİ-17 Muşak "ın modernləşdirilmiş variantı olan ilkin təlim-döyüş təyyarəsidir. "Super Mushshak" təlim təyyarəsi bu gün dünyada öz sinfinə aid olanlardan təhlükəsizliyinə, imkanlarına və qiymətinə görə fərqlənir. Uçuş hazırlığı üçün ideal olan bu təlim təyyarəsinin ekipaj üzvü 2-3 nəfər olur."Super Muşak" Səudiyyə Ərəbistanı, Oman, İran, Türkiyə və Cənubi Afrika Silahlı Qüvvələrinin silahlanma sisteminə də daxildir. Amma Azərbaycanı təkcə "Super Muşak" təyyarələri maraqlandırmır. Məlumatlara əsasən, Azərbaycan və Pakistan hazırda ikitərəfli hərbi əməkdaşlığın gücləndirilməsi üzərində işləyir. Hələ ötən ilin oktyabr ayında Pakistan baş naziri Nəvaz Şərif Bakıda səfərdə olub və Prezident İlham Əliyevlə bu xüsusda danışıqlar aparıb. Tərəflər hərbi-texniki əməkdaşlıq, müasir silahların alınması və birgə istehsalı barədə anlaşma əldə edib. Bu anlaşma çərçivəsində ölkəmiz Pakistandan müasir "JF-17 Thunder" qırıcıları da almağı düşünür. "JF-17 Thunder" qırıcılarını Pakistanla Çin birgə istehsal edir. Bildirilir ki, Azərbaycan bu qırıcıları özünün hərbi hava qüvvələrinin sərəncamında olan MiQ-21, MiQ-25, Su-25 qırıcılarının güclü davamçısı kimi görür. Təyyarə 23 millimetrlik avtomatik topla, "hava-yer" və "hava-hava" tipli raketlərlə, habelə idarəolunan bombalarla təchiz edilib. Bir reyddə 4 bomba daşıya bilir. "JF-17 Thunder" müxtəlif hava missiyalarını yerinə yetirməyə imkan verən çoxfunksiyalı təyyarədir. Bu qırıcılar hədəfə görünmə məsafəsindən çox aralıdan "hava-hava" raketləri ilə zərbə endirə bilir, yüksək manevr qabiliyyətinə malikdir. Müasir radioelektron mübarizə sistemləri ilə təchiz olunub. Azərbaycan bu qırıcıları almağa bir neçə il əvvəldən maraq göstərmişdi, lakin daha sonra danışıqlar dayanmışdı. İndi isə Azərbaycan Pakistandan bu müasir qırıcıları da almağa hazırlaşır.
Azərbaycan Pakistandan orta və yaxın mənzilli müasir ballistik raketlər almaqda da maraqlıdır. Söhbət ilk olaraq Pakistan istehsalı olan "Şahin-1" raketlərindən gedir. Bu raketlər 750 kilometr məsafədə hədəfi vurur. "Hatf-1" raketinin də alınması istisna olunmur. O, "Şahin-1"in təkmilləşdirilmiş formasıdır və daha uzaq məsafədə hədəfi vura bilir. Bu raketlər yüksək dəqiqliyə malikdir və Hava Hücumundan Müdafiə (HHM) sistemləri onu tuta bilmir. Raketlər strateji obyektlərin, komanda məntəqələrinin və infrastrukturun məhv edilməsi üçün nəzərdə tutulub. Azərbaycanın Pakistandan almaq istədiyi ballistik raketlər regionda qüvvələr balansını daha radikal şəkildə ölkəmizin lehinə dəyişəcək. Bir daha xatırladaq ki, operativ-taktiki raketlər düşmən ərazilərinin dərinliklərində yerləşən hədəfləri vurmaq üçün istifadə olunur. Həmçinin operativ-taktiki raketlərdən dərinliklərdə yerləşən aerodromlara, silah anbarlarına zərbə endirmək olar. Bütün bunlar isə Azərbaycanın Ermənistan üzərində hərbi üstünlüyünü daha da artırır. Təbii ki, belə vəziyyət Qarabağ münaqişəsinin gedişinə də təsirsiz ötüşməyəcək.
Tahir TAĞIYEV
