Vüqar Qədirov: "Ermənilərə ayrılan yardımın təyinatı isə həmin imici tamamilə darmadağın edir"
Birləşmiş Ştatlar Ermənistana ayrılan maliyyə yardımını üç dəfədən də çox azaldıb, lakin əvəzində ona Suriya qaçqınları üçün vəsait ayırmağı planlaşdırıb.
ABŞ 2018-ci il üçün Ermənistana 6,2 milyon dollar maliyyə yardımı ayırıb. Bu barədə Amerika Erməni Assambleyasının (AAA) rəsmi saytında məlumat verilib.
Xatırladaq ki, ABŞ Ermənistana 2016-cı ildə 20,4 milyon dollar məbləğində yardım ayırıb. ABŞ 2018-ci il üçün Ermənistana maliyyə yardımını 3 dəfədən çox azaldıb.
Bununla belə, Ermənistan ABŞ-dan Suriya qaçqınlarına yardım məqsədilə maliyyə alacaq.
AAA bildirib ki, ABŞ-ın Nümayəndələr Palatasının Vəsaitlər Komitəsi 2018-ci il üçün "Dövlət, xarici əməliyyatlar və onlarla bağlı proqramlar üzrə ayırmalar haqqında" (SFOPS) qanun layihəsi qəbul edib. Layihəyə əsasən, ABŞ SFOPS çərçivəsində o ölkələrə 47 mlrd. dollar ayıracaq ki, onlar Suriyada hərbi əməliyyatların başlanmasından etibarən suriyalı qaçqınları qəbul edib. Qanun layihəsi eyni zamanda Suriya və onun qonşuluğundakı dövlətlərdə yaşayan xristian azlıqlar üçün ayrılan vəsaitləri də artırmağı nəzərdə tutur.
AAA öz bəyanatında qeyd edib ki, Suriyadakı erməni icması "ən müdafiəsiz etnik və dini azlıq" olaraq qalır və münaqişə nəticəsində dünyanın hər yerinə səpələndiyi üçün, Suriya ermənilərinin bu gün yardıma çox böyük ehtiyacı var.
Məlumatda o da qeyd olunur ki, guya Ermənistan Suriya böhranı başlayandan bu günə qədər 20 min suriyalı qaçqını qəbul edib. Bu ilin aprelində ABŞ Konqresinin Erməni-Amerika dostluq qrupu və Amerikanın Ay Data Komissiyası Ermənistanı "qaçqınlar üçün xüsusi təhlükəsiz ərazi" elan etmək təşəbbüsü ilə çıxış ediblər. Bu isə Ermənistana digər ölkələr və beynəlxalq donor təşkilatlar tərəfindən maliyyə yardımı ayrılmasını özündə ehtiva edir.
Layihə ilə bağlı maraqlı detal üzə çıxır. Bir çox qurumlar təkidlə iddia edir ki, Ermənistanın Dağlıq Qarabağa yerləşdirdiyi adamlar terroristlərdir. Hətta onların həmin ərazilərdə təlim düşərgələrinin olduğu da bildirilir. Belə olan təqdirdə, ABŞ niyə terrorla əlaqəli olan şəxslərin maliyyələşməsinə maraq göstərir?
Ekspert Vüqar Qədirov qəzetimizə bildirdi ki, Dağlıq Qarabağın nəzarətdən kənar olan ərazilərində ermənilərin hansı əməllərdən çıxdığını ABŞ hamıdan gözəl bilir:
"Türkiyədə fəaliyyət göstərən Əsassız Erməni İddialarına Qarşı Mübarizə Dərnəyinin başqanı Göksəl Gülbəy Ermənistanın PKK/PEJAK terror təşkilatı ilə işbirliyinə dair yeni sensasion iddia irəli sürüb. G.Gülbəy Ermənistanın Sevan gölü yaxınlığındakı Vardenis bölgəsində və işğal altındakı Qarabağ torpaqlarında PKK-çılar üçün 12 təlim-yerləşmə düşərgəsi qurduğunu deyir.
ASİMDER rəhbərinin sözlərinə görə, ötən ilin aprel döyüşlərindən sonra kürd terror qruplaşmalarına mənsub olan 400-dən çox yaraqlı Türkiyənin Ağrı bölgəsinin Tendürek kəndi istiqamətindən Ermənistana keçib. Onlardan 150-si Suriya erməniləri, qalanları Suriya, Türkiyə, İran və İraq kürdlərindən təşkil olunub. Həmin qrup Vardenisdəki düşərgədə əvvəldən yerləşən 80 PKK-çı ilə birləşib. G.Gülbəy iddia edir ki, qrupun Qarabağa keçməsini əks etdirən videogörüntülərə malikdir və onları tezliklə yayacaq. Mən bu sitatları təsadüfən gətirmədim. Bundan əvvəl də müxtəlif nüfuzlu qurumlar tərəfindən oxşar bəyanatlar səsləndirilib. Terrorizmlə mübarizəni özünün prioriteti elan edən ABŞ-ın belə bir yanlışlığa yol verməsi təəccüblü görünür. Hesab edirəm ki, Dağlıq Qarabağdakı terrorçulara qaçqın adı ilə ayrılan vəsait ilk növbədə ABŞ-ın özünün imicinə ciddi zərbə vuracaq.
2001-ci ilin 11 sentyabr hadisələrindən sonra sivil dünya terrorizmlə mübarizə şüarı altında Əfqanıstan və İraqa müdaxilə etdi. Həmin koalisiyanın başında ABŞ dururdu. Elə həmin vaxtdan da ABŞ terrorla mübarizənin önündə gedən ölkə kimi özünü göstərir. Ermənilərə ayrılan yardımın təyinatı isə həmin imici tamamilə darmadağın edir".
Məhəmmədəli QƏRİBLİ
