Vəfa Heydərli: "Diplomatiyamızın yeni qitələri kəşf etməsi sevindiricidir"
Azərbaycanda yaxın zamanlarda Kosta-Rika Səfirliyi açılacaq. Səfirliyin açılması avqustun ortalarında gözlənir. Bununla əlaqədar yaxın günlərdə Kosta-Rikanın Azərbaycanda müvəqqəti işlər vəkili Hayro Fransisko Lopes Bolanos Bakıya gələrək səfirlik üçün müvafiq yerin axtarışı və digər inzibati məsələlərlə məşğul olacaq.
Qeyd edək ki, bu məsələ bir müddət əvvəl xarici işlər naziri Elmar Məmmədyarovun Azərbaycanda səfərdə olan Kosta Rikanın xarici işlər və etiqad naziri Manuel Qonzalez Sanz ilə görüşü zamanı da müzakirə olunub.
Nazirlər bu il Kosta Rika və Azərbaycan arasında diplomatik münasibətlərin qurulmasının 20 illiyinin qeyd olunduğunu deyərək, keçən dövr ərzində siyasi dialoq və qarşılıqlı anlaşmanın müsbət inkişafından məmnunluq ifadə ediblər.
E.Məmmədyarov iyun ayında Kosta Rikaya rəsmi səfərini xoş təəssüratlarla xatırlayaraq keçirilmiş məhsuldar görüşlərin ikitərəfli münasibətlərin daha da inkişaf etdirilməsi baxımından əhəmiyyətindən bəhs edib. E.Məmmədyarov, həmçinin, Kosta Rikaya səfəri çərçivəsində baş tutmuş siyasi məsləhətləşmələrin iki ölkə arasında münasibətlərin müxtəlif sahələrdə irəliləməsinə töhfə verəcəyinə ümidvar olduğunu qeyd edib.
M.Q.Sanz ölkələr arasında siyasi dialoqun və dostluğun inkişafının məmnunluq doğurduğunu nəzərə çatdırıb.
Nazirlər hər iki ölkədə diplomatik missiyaların mübadiləsinin qarşılıqlı əməkdaşlığın gücləndirilməsinə yeni bir təkan verəcəyinə əminlik ifadə ediblər. E.Məmmədyarov Kosta Rikanın Azərbaycanda səfirlik təsisetmə qərarının yüksək qiymətləndirildiyini diqqətə çatdırıb.
Ucqar bir qitədə yerləşən ölkənin Azərbaycanda səfirlik açmaq niyyəti ölkəmizin artan nüfuzunun göstəricisi sayıla bilərmi?
Politoloq Vəfa Heydərli qəzetimizə bildirdi ki, bu, Azərbaycanın artan nüfuzundan xəbər verir: "Belə olmasaydı hansısa Latın Amerikası ölkəsi gəlib bizdə səfirlik açmazdı. Azərbaycanın özü də Latın Amerikası ölkələri ilə siyasi və iqtisadi əlaqələrin genişləndirilməsində maraqlıdır. Hətta bizim diplomatlarımız da bildirir ki, Latın Amerikası ölkələri ilə əməkdaşlığın inkişafı hazırda Azərbaycanın xarici siyasətinin prioritetidir. Çünki əksər Latın Amerikası ölkələri beynəlxalq arenada Azərbaycanın maraqlarını dəstəkləyir. Azərbaycan bir sıra Latın Amerikası ölkələrində səfirliklərini açıb və müvafiq olaraq Latın Amerikasının bir çox ölkələri Azərbaycanda diplomatik missiyalarını açıb. Kosta Rikanın istəyini də bu qəbildən saymaq olar. Vaxtaşırı müxtəlif səviyyələrdə qarşılıqlı səfərlər edilir.
Azərbaycanın bu coğrafiyanın ölkələri ilə münasibətləri xüsusilə iqtisadi sahədə inkişaf edir. Latın Amerikası ölkələri, xüsusilə də Meksika, Honduras, Peru, Kolumbiya və digərləri qanunvericilik orqanları səviyyəsində Xocalı soyqırımı üzrə qətnamə qəbul ediblər. Bu baxımdan da diplomatiyamızın yeni qitələri kəşf etməsi sevindiricidir".
Məhəmmədəli QƏRİBLİ
