Fikrət Sadıqov: "Ancaq reallıq ondan ibarətdir ki, Azərbaycanın Rusiya ilə yaxınlaşmasından narahat olan qüvvələr var"
Bu günlərdə Soçidə səfərdə olan Prezident İlham Əliyev həmkarı Vladimir Putinlə görüşərək bir sıra məsələləri müzakirə edib. Rusiya hökumətinə yaxın mənbələrdən məlum olub ki, Prezident İlham Əliyev həmkarı ilə görüşdə həm də Rusiya-Azərbaycan əlaqələrinə "üçüncü qüvvələr"in müdaxiləsindən danışıb.
Yəni Moskva ilə Bakı arasında strateji tərəfdaşlıq münasibətlərinin inkişafı erməni lobbisini və onun nəzarətindəki qüvvələri, Rusiyada dövlət orqanlarına soxulmuş və anti-Azərbaycan fəaliyyəti göstərən şəxsləri, bəzi beynəlxalq dairələri narahat edir. Bu münasibətlərə xələl gətirilməsinə cəhdlər göstərilir.
Bu arada, sabiq xarici işlər naziri Tofiq Zülfüqarov mətbuata müsahibəsində bildirib ki, iki ölkə əlaqələrinə ziyan gətirən üçüncü qüvvələrdən biri xarici işlər naziri Sergey Lavrovdur: "Bu üçüncü qüvvələrin bir hissəsi Rusiyanın daxilindədir. Bu müzakirə olunan çox vacib bir məsələ idi. Bu məlumatı qəbul edək. Hər halda, mən o adamlardan biriyəm ki, bu məlumatı həqiqətəuyğun məlumat kimi qəbul edirəm. Çünki doğrudan da bir neçə ay öncə yaranan gərginlik və onun mənbəyi elə bil Rusiyanın Xarici İşlər Nazirliyinin daxilində cəmləşib. Təhlillər onu göstərir ki, bu gərginliyə təkan verənlərdən biri Lavrovdur. Bilirsiniz ki, ictimaiyyət tərəfindən onun mövqeyi ciddi şəkildə tənqid olunur və mən də onun tənqidçilərindən biri idim. Hesab edirəm ki, etnik mənsubiyyət qeyri-balanslaşmış bir mövqeyə gətirib çıxarıb. Təbii ki, bu da, öz növbəsində, Ermənistan-Azərbaycan münaqişəsinin həlli prosesində böyük bir maneə olub".
Maraqlıdır, bu nə dərəcədə realdır?
Məsələyə münasibət bildirən keçmiş diplomat, politoloq Fikrət Sadıqov buna birmənalı prizmadan yanaşmadı: "Azərbaycan-Rusiya münasibətləri strateji partnyorluq formatında inkişaf edir. Bunu sonuncu Soçi görüşü də sübut etdi. Təbii ki, buna qısqanclıqla baxan, yanaşan qüvvələr var. Birinci növbətə Ermənistanın özü buna qısqanclıqla yanaşır. Onlar xüsusilə bizim Rusiya ilə hərbi-texniki əməkdaşlığımızdan narahatdır. Digər məsələlərdə də iki ölkənin yaxın olmasından narahatdırlar. Mən şübhə etmirəm ki, belə qüvvələr Rusiyada da var. Orada Azərbaycanafobiya ilə bağlı çıxışlar kifayət qədər çoxdur. Ancaq nəzərə almaq lazımdır ki, Rusiyada bizim tərəfdarlarımız da az deyil. Bununla bağlı konkret ad çəkmək istəmirəm. Lavrovun bu işdə neqativ rol oynadığını konkret demək çətindir. Ancaq reallıq ondan ibarətdir ki, Azərbaycanın Rusiya ilə yaxınlaşmasından narahat olan qüvvələr var".
Vidadi ORDAHALLI
