Aqşin Əliyev: "Harada zəif bənd tapırlarsa, ondan istifadə edirlər"
Çexiyadakı Səfirliyimiz Azərbaycan vasitəsilə Yaxın Şərqə silahın çatdırılması haqqında çex KİV-ində dərc olunan yazılarla bağlı bəyanatla çıxış edib. Səfirlikdən qeyd ediblər ki, Azərbaycan NATO, həmçinin, ABŞ-la beynəlxalq terrorizmlə və radikal qruplarla mübarizə çərçivəsində sıx əməkdaşlıq edir. Eləcə də Əfqanıstanda və başqa ölkələrdə sülh missiyasının reallaşdırılması üçün silah nəqlində alyansa köməklik göstərir.
Bəyanatda deyilir ki, qanunsuz silah daşınmasında Azərbaycanın iştirakı haqqında istənilən yalan erməni təbliğatının təsiri altında formalaşdırılır.
Bəyanatda vurğulanır ki, beləliklə, "Silk Way Airlines"in hərbi texnikanın daşınmasında iştirakı haqda deyilənlər uğursuz dezinformasiya cəhdidir: "Belə informasiyanın cəfəngiyyat olduğunu o fakt da təsdiqləyir ki, hərbi texnikanın tranzitinə xüsusi icazə olmadan diplomatik kanallar vasitəsilə silah daşınması mümkün deyil".
Qeyd edək ki, bir müddət əvvəl oxşar cəfəng iddia ilə Bolqarıstan mətbuatı çıxış etmişdi. Heç bir əsası olmayan bu tip məlumatların yayılması hansı qüvvələrin marağına xidmət edə bilər?
Ekspert Aqşin Əliyevin sözlərinə görə, təbii ki, bu, Azərbaycanı istəməyən şər qüvvələrin məkrindən irəli gələn bir təbliğatdır: "Şübhəsizdir ki, bizə atılan istənilən böhtanın arxasında ilk olaraq erməni barmağını axtarmalıyıq. Burda da eynilə. Çünki bələ məsuliyyətsiz məlumatları yalnız düşmən bizim barəmizdə yaya bilər. Təəssüf edirəm ki, bəzi Avropa KİV-ləri bu məsələdə onların alətinə çevrilir. Azərbaycan terrorla ciddi şəkildə mübarizə aparan ölkədir, ona dəstək verən yox. Belə ittihamlar bizim ölkəyə yapışan deyil. Çünki bütün dünya bilir ki, biz ən aktiv antiterror koalisiyasında yaxından iştirak etmişik. Yaxın Şərqə silah daşımaq asan məsələ deyil. Çünki bu dəqiqə bütün dünyanın xüsusi xidmət orqanlarının diqqəti məhz həmin yerədir. Fikir verirsinizsə, belə sərsəm iddialar hər dəfə bir ölkənin mətbuatında çıxır. Yəni harada zəif bənd tapırlarsa, ondan istifadə edirlər. Təbii ki, bütün kanallarımızla həmin KİV-lərə etiraz etməliyik. Yeri gəlsə, məhkəmə iddiaları qaldırmalıyıq ki, bizi bu cür ağır cinayətdə ittiham edənlərə dərs olsun. Azərbaycan terrordan əziyyət çəkən ölkədir. Biz bütün varlığımızla çalışırıq ki, dünya ictimaiyyəti bizim erməni terrorçularının əlindən qurtarmağımıza kömək etsin. Belə ölkə heç vaxt terrorçularla əlaqədə ola bilməz. Ermənistan isə terrordan hər zaman öz dövlət siyasətini həyata keçirməkdə bəhrələnib".
Məhəmmədəli QƏRİBLİ
