İşğal edilmiş Azərbaycan ərazilərinə Ermənistanın terrorçu qruplaşmalar yerləşdirməsi barədə dəfələrlə qeyd edilib, konkret faktlar göstərilib. Amma dünya birliyinin bu təhlükəli hala qarşı da zəruri addımlar atmaması ermənilərin bəd əməllərini davam etdirməsi ilə müşayiət olunur. Artıq yenə də ermənilərin PKK yaraqlılarını işğal altındakı Azərbaycan ərazilərinə gətirməsi barədə yeni məlumatlar səslənir.
Artıq bildirildiyi kimi, Türkiyədə fəaliyyət göstərən Əsassız Erməni İddialarına qarşı Mübarizə Dərnəyinin (ASİMDER) başqanı Göksel Gülbey Ermənistanın PKK və ona bağlı PEJAK terror təşkilatı ilə işbirliyinə dair yeni sensasion iddia irəli sürüb. Türkiyədə nəşr olunan "Vətən" qəzeti yazır ki, Göksel Gülbey Ermənistanın Göyçə gölü yaxınlığındakı Vardenis bölgəsində və işğal altındakı Qarabağ torpaqlarında PKK-çılar üçün 12 təlim-yerləşmə düşərgəsi qurduğunu deyib.
ASİMDER rəhbərinin sözlərinə görə, ötən ilin aprel döyüşlərindən sonra kürd terror qruplaşmalarına mənsub olan 400-dən çox yaraqlı Türkiyənin Ağrı bölgəsinin Tendürek kəndi istiqamətindən Ermənistana keçib. Onlardan 150-si Suriya erməniləri, qalanları Suriya, Türkiyə, İran və İraq kürdlərindən təşkil olunub. Həmin qrup Vardenisdəki düşərgədə əvvəldən yerləşən 80 PKK-çı ilə birləşib. Yaraqlıların Türkiyədən Ermənistana keçidinə terror təşkilatının "Ağrı qartalları" adlı birliyinin Livan Qaradağ, Hemaran Kervaçiyan və Servet Bagopşin adlı rəhbərləri başçılıq edib. Həmin terrorçular daha sonra Ermənistandan Qarabağa keçiblər. Göksel Gülbey iddia edir ki, qrupun Qarabağa keçməsini əks etdirən videogörüntülərə malikdir və onları tezliklə yayacaqlar.
Qeyd edək ki, Göksel Gülbey bundan əvvəl də PKK-çıların Ermənistan tərəfindən Qarabağa yerləşdirildiyinə dair iddialar irəli sürüb. Onun bildirdiyinə görə, Qarabağda cəmi 12 PKK düşərgəsi və həmin düşərgələrdə 1750 PKK-çı var. Bu günlərdə isə sosial şəbəkələrdə PKK-çıların Ermənistandan Qarabağa keçməsini əks etdirdiyi iddia olunan videogörüntülər yayılmışdı. Həmin görüntülərə əsasən, nizami ordu hissələrinə mənsub olmadığı görünən silahlı qrup, çox güman ki, Laçın istiqamətindən piyada irəliləyir. Türkiyəli politoloq Ömür Çelikdönmez də bundan əvvəl xəbərdarlıq etmişdi ki, PKK terror təşkilatı Qəndildəki düşərgəsini Dağlıq Qarabağ ərazisinə köçürür. Onun sözlərinə görə, PKK Dağlıq Qarabağda düşərgə qurmaq niyyətindədir: "PKK-nın uzun illər ərzində Qafqaz bölgəsindən qaçaqçılıq üçün istifadə etdiyi məlumdur. Erməni əsilli PKK üzvlərinin köməyi ilə narkotik qaçaqçılığından əldə edilən pullar da Qafqazda yuyulub. Yəni bu bölgəni yaxşı tanıyırlar. Hətta iddialara görə, PKK mərkəz olaraq Azərbaycanın işğal olunmuş Laçın şəhərini seçib. Məqsəd Laçın koridorundan istifadə edərək Ermənistan və Azərbaycanda fəaliyyət göstərməkdir. Cənubi Qafqaza qaçmaq istəyən PKK-çılar bu bölgədə özlərinə dəstək axtarışına çıxıblar".
Göksel Gülbey, terrorçu düşərgə ilə yanaşı, ermənilərin zəbt olunmuş ərazilərdə böyük narkotik plantasiyaları salması barədə də maraqlı fikirlər səsləndirmişdi. Onun sözlərinə görə, Ermənistan hakimiyyəti işğal etdiyi Azərbaycanın Dağlıq Qarabağ bölgəsindən narkotik plantasiyası olaraq istifadə edir: "Ermənistan tərəfindən işğal edilən Qarabağ bütün dünya üçün ciddi bir təhlükə bölgəsinə çevrilib. Çünki bu gün nəzarətsiz olan Qarabağ terror qruplarının təlim düşərgəsi və narkoticarət məkanı rolunu oynayır. Qarabağdan bütün dünyaya "ağ ölüm" təhlükəsinin yayıldığı həqiqəti inkar edilə bilməz. Bütün dünya yaxın zamanda Ermənistanın narkotik ixracatçısı olduğunu qəbul edəcək. Ermənistan bölgədə terrorçu, cinayətkar, narkotik və silah ticarəti həyata keçirən ölkə olaraq fəaliyyət göstərir". G.Gülbey Azərbaycan, Türkiyə və İran xüsusi xidmət orqanlarının apardığı araşdırmalara istinadən qeyd edib ki, narkotik və silah ticarəti aparan tacirlər ən təhlükəsiz yol olaraq Ermənistanı və işğal altındakı Dağlıq Qarabağı seçir: "Narkotrafik Əfqanıstan, İran, Qarabağ, Ermənistan və Rusiyadır. Bu narkoticarəti birbaşa Ermənistan rəhbərliyi himayə edir. Azərbaycan bunu dəfələrlə açıqlasa da, beynəlxalq ictimaiyyət heç bir reaksiya verməyib. Çünki dünyada ikili standartlar əsas rol oynayır". ASİMDER rəhbəri Dağlıq Qarabağın bu gün bölgədə "ikinci Əfqanıstan" rolunu oynadığına diqqət çəkib.
Araşdırmalar göstərir ki, nəzarətsiz qalan Dağlıq Qarabağ ərazisində aparılan narkoticarətdə Ermənistan hökumətinin böyük payı var. Hər il oradan daşınan narkotikdən əldə edilən gəlirin bir hissəsi Ermənistanda müxtəlif rəsmi şəxslərə verilir. Bununla yanaşı, İrandan Avropaya daşınan narkotikin böyük hissəsi də məhz Qarabağdan və Ermənistandan aparılır. Elə bu səbəbdən hesab edilir ki, ermənilərin bu bəd əməllərinə qarşı zəruri addımlar atmağın artıq vaxtı çatıb. Əks halda bundan dünya özü zərər çəkəcək.
Tahir TAĞIYEV
