Məhərrəm Zülfüqarlı: "Orada həyata keçirilən iqtisadi layihələrdə ölkəmizin iştirakı müsbət göstəricidir"
Pakistanda tikiləcək 71 km qaz boru kəmərinin layihəsi üçün tenderdə (boruların təchizatı) Azərbaycan və Pakistan şirkətlərinin birgə iştirakı barədə ilkin razılaşmalar əldə edilib. Bu barədə İqtisadiyyat Nazirliyindən bildirilib.
Bundan əvvəl Sumqayıt Kimya Sənaye Parkının rezidenti "Azertexnolayn" şirkəti Türkmənistandan boru sifarişi alıb.
Bununla yanaşı, "Made in Azerbaijan" brendinin təşviqi ilə bağlı, Honq Konq da daxil olmaqla, Çinə, Birləşmiş Ərəb Əmirliklərinə, Almaniyaya, Əfqanıstana, Pakistana, Qətərə, Qazaxıstana 8 ixrac missiyası həyata keçirilib. Həmçinin, Pakistana mebel, pambıq çiyidi, nar, şokolad məhsulları, konservləşdirilmiş pomidor, göbələk üzrə sifarişlər qəbul olunub.
Prezident İlham Əliyev hələ aylar öncə İslamabadda İqtisadi Əməkdaşlıq Təşkilatının XIII Sammitində çıxışı zamanı və İƏT-in media orqanında fundamental məqaləsində qeyd etmişdi ki, Azərbaycan islam ölkələri ilə iqtisadi əməkdaşlığın gücləndirilməsinə xüsusi əhəmiyyət verir: "Qarşılıqlı ticarət və sərmayələrin artırılması, ixrac imkanlarının genişləndirilməsi və biznes dairələri arasında sıx əməkdaşlığın təşviqi bu məqsədə xidmət edəcək".
Prezident İlham Əliyev bildirmişdi ki, İslam dünyası daxilində iqtisadi əməkdaşlığı siyasi əməkdaşlığın hazırkı səviyyəsinə qaldırmaq qarşıdakı böyük vəzifələrdən biridir. İndi Pakistanla iqtisadi əlaqələrin dərinləşdirilməsi buna bariz nümunədir.
Sözügedən məsələni dəyərləndirən ekspert Məhərrəm Zülfüqarlının fikrincə, islam ölkələri ilə iqtisadi-ticarət əlaqələri nə qədər geniş olsa, bu bir o qədər ümumi inkişafa töhfə vermiş olar: "Bu baxımdan Azərbaycana dost, yaxın ölkə olan Pakistanla iqtisadi əlaqələrin genişlənməsi müsbət haldır. Orada həyata keçirilən iqtisadi layihələrdə Azərbaycanın iştirakı müsbət göstəricidir. İslam ölkələri müxtəlif səviyyələrdə Azərbaycanı dəstəkləyir. Bizim haqq işimizə dəstək verirlər. Biz elə etməliyik ki, bütün islam ölkələri ilə iqtisadi əlaqələrimiz olsun. Sözügedən əlaqələrin çoxşaxəli olması inkişafa, tərəqqiyə xidmət edir. Bu həm də Azərbaycanda neftdən kənar sahələrin inkişafına xidmət edir. İslam ölkələri ilə Azərbaycanın iqtisadi əlaqələri nə qədər geniş və çoxşaxəli olsa, bu bir o qədər ölkəmizin xeyrinədir".
Vidadi ORDAHALLI
