Qabil Hüseynli: "Separatçı qurum elə zənn edir ki, bu tip addımlarla özünü gündəmdə saxlayır, ancaq ciddi şəkildə yanılır"
ABŞ Dağlıq Qarabağda keçirilən qondarma "prezident seçkiləri"nin nəticələrini tanımayacaq. Bu barədə Dövlət Departamentindən bildiriblər:
"Münaqişənin hərtərəfli nizamlanmasında biz Dağlıq Qarabağ əhalisinin öz gələcəyini müəyyənləşdirməkdə rolunu qəbul edirik. Lakin ABŞ Dağlıq Qarabağı müstəqil və suveren dövlət kimi tanımır və biz iyulun 19-da keçirilən qondarma seçkilərin nəticələrini tanımırıq. Bu seçkilər Dağlıq Qarabağın hüquqi statusuna təsir etməyəcək. Biz, həmçinin, vurğulayırıq ki, qondarma seçkilər Dağlıq Qarabağın yekun statusu və Dağlıq Qarabağa davamlı və sülh həlli gətirəcək mövcud danışıqların nəticəsini müəyyənləşdirmir".
Qeyd edək ki, Azərbaycan Prezidenti dəfələrlə öz müsahibələri və çıxışlarında separatçıların keçirdiyi belə qanundankənar "seçki"lərin Azərbaycanın mövqeyini dünyada möhkəmləndirdiyini deyib.
Bu kontekstdən yanaşdıqda, ABŞ Dövlət Departamentinin mövqeyini necə qiymətləndirmək olar?
Politoloq Qabil Hüseynli qəzetimizə açıqlamasında bildirdi ki, dünya həmin "seçki"ləri qəbul etmir: "Hətta Ermənistanın özü belə "seçki"lərin legitimliyini tanımağa cürət göstərmir. Ancaq paradoksa baxın ki, həmin quruma seçilən bundan əvvəlki iki "rəhbər" - Köçəryan və Sarkisyan sonradan Ermənistanın prezidenti olub. Hazırda seçilən Bako Saakyan isə, demək olar ki, Rusiyanın adamıdır. Çünki ömrünün əhəmiyyətli hissəsini həmin ölkədə yaşayıb və oranın təhlükəsizlik qurumunda çalışıb. Maraqlıdır ki, Rusiyanın özü də qondarama "seçki"ləri tanımasa da, indiyə kimi həmin məsələni tənqid edən münasibət də bildirməyib. Bəli, bu tip "seçki"lərlə ermənilər özlərinin separatçı olduğunu, təmsil olunduqları ölkəyə tabe olmadığını sübut etmiş olur. Azərbaycan diplomatiyası bu yöndə çox aktiv işləyir. Demək olar ki, bütün səfirliklər vasitəsilə ölkələrin məsələyə münasibəti öyrəniləcək. ABŞ Dövlət Departamenti bundan əvvəl də məsələyə belə məzmunda reaksiyalar verib. Başqa yeniliyin olması gözlənilən də deyildi. Çünki separatçı addımları özünə hörmət edən hansısa ölkə dəstəkləyə bilməz. Separatçı qurum elə zənn edir ki, bu tip addımlarla özünü gündəmdə saxlayır, ancaq ciddi şəkildə yanılır".
Məhəmmədəli QƏRİBLİ
