Yeganə Hacıyeva: "Artıq görülən işlərin işartıları aydın hiss edilir ki, cənab Prezident bu məqamı xüsusi vurğuladı"
Prezident İlham Əliyev jurnalistlər üçün inşa edilmiş ikinci binanın açılışı zamanı bir sıra vacib məqamlara toxunub. Ölkə başçısı, həmçinin, son illər ərzində Dağlıq Qarabağ problemilə bağlı beynəlxalq arenada yaranan informasiya dönüşündən bəhs edib:
"Biz Azərbaycan həqiqətlərini dünya ictimaiyyətinə daha da geniş şəkildə çatdırırıq və çatdırmalıyıq. Mən burada medianın rolunu yüksək qiymətləndirirəm, işlər davam etdirilməlidir. Əlbəttə, mən görürəm, bilirəm və buna sevinirəm ki, biz Ermənistan-Azərbaycan, Dağlıq Qarabağ münaqişəsi ilə bağlı ciddi dönüş yarada bildik. Çünki əvvəlki dövrlərdə vəziyyət belə idi - hökumətlərarası, dövlətlərarası münasibətlərdən, mənim həmkarlarımla çoxsaylı görüşlərimdə hamı bilirdi, etiraf edirdi və xəritəyə baxanda hər şey bəlli idi ki, kim işğalçıdır, kim işğalın qurbanıdır. Ancaq bu məlumat, demək olar ki, siyasi elitanın inhisarında qalırdı. Xarici ölkələrin media nümayəndələri ya bilməyərəkdən, ya da qəsdən ictimai fikrə bu münaqişə ilə bağlı yalan və təhrif edilmiş informasiyalar ötürürdülər. Burada, əlbəttə ki, erməni lobbisinin də böyük rolu var. Çünki onlar hər gün bizim əleyhimizə işləyirlər, hər dəqiqə onlar üçün birinci hədəf Azərbaycandır. Çünki bilirlər ki, Azərbaycan güclənir, Azərbaycanın böyük imkanları var, Azərbaycan dövləti və Azərbaycan xalqı heç vaxt bu işğalla barışmayacaq, öz ərazi bütövlüyünü bərpa edəcək. Ona görə erməni lobbisi və onlara yaxın olan siyasi xadimlər, xüsusilə erməni lobbisinin pulu ilə idarə olunan dırnaqarası siyasətçilər ictimai fikrə Azərbaycanla və Dağlıq Qarabağ münaqişəsi ilə bağlı yalan informasiyalar ötürürlər.
Biz bu meyli sındıra bildik. Bu gün həm dövlətlərarası münasibətlərdə, həm ictimai rəydə Azərbaycanın mövqeyi daha çox dəyər qazanır. Təsadüfi deyil ki, mənim son səfərlərim çərçivəsində imzalanan sənədlərdə Ermənistan-Azərbaycan, Dağlıq Qarabağ münaqişəsi ilə bağlı xüsusi müddəa var və orada göstərilir ki, ölkələrin ərazi bütövlüyü, suverenliyi, sərhədlərin toxunulmazlığı BMT Təhlükəsizlik Şurasının qətnamələri əsasında həll edilməlidir. Bu artıq o ölkələrin ictimai fikrində yaranmış dönüşün təzahürüdür. Əlbəttə ki, biz də, ilk növbədə, çalışırıq və çox israrla, təkidlə deyirik ki, sənədlərdə mütləq bu bənd olmalıdır. Yəni ictimai fikirdə bu dönüş yaradıldı, münaqişə ilə bağlı Azərbaycanın haqq işi, haqlı mövqeyi daha da böyük üstünlük təşkil edir. Düşmən bundan çox narahatdır, demək olar ki, təşvişdədir, döyüş meydanında məğlubiyyətə uğrayıb, hüquqi müstəvidə bizim mövqeyimiz çox möhkəmdir".
Göründüyü kimi, Prezident bildirir ki, Dağlıq Qarabağla bağlı həqiqətlər yalnız siyasi elitaların inhisarında qalmır. Artıq dünya ictimaiyyəti də bu istiqamətdə xeyli maariflənib. Ölkə başçısının bu fikirlərini necə dəyərləndirmək olar?
Politoloq Yeganə Hacıyeva qəzetimizə bildirdi ki, ölkə başçısı bu vacib məqama çox doğru olaraq toxunub: "Biz xarici ölkələrdə tez-tez oluruq və deyilən istiqamətdəki fərqi çox aydın hiss edirik. Mən bu məsələdə dövlət qurumları, səfirliklər və diaspor təşkilatlarının rolu ilə yanaşı, jurnalistlərin rolunu xüsusi olaraq qeyd etmək istəyirəm. Son vaxtlar Azərbaycanın informasiya resursları aktiv fəaliyyət aparır. Bizim bir çox informasiya resurslarımızın xarici dildə yayım imkanları yaradılıb ki, bu da olduqca vacibdir. Çünki biz həm səngərdə, həm də informasiya sahəsində mübarizə aparırıq. Artıq görülən işlərin işartıları aydın hiss edilir ki, cənab Prezident bu məqamı xüsusi vurğuladı. Fürsətdən istifadə edib bütün jurnalistləri peşə bayramı münasibətilə ürəkdən təbrik edirəm. Qələminiz həmişə doğru yazsın və düşmənə qarşı süngü olsun. Sizi əmin edirəm ki, Dağlıq Qarabağ və digər həqiqətlərlə bağlı informasiya siyasəti bu şəkildə aparılsa, biz daha ciddi uğurlara imza ata biləcəyik. Tempi bir qədər də artırmaq olar. Bizim üçün çox sevindiricidir ki, Dağlıq Qarabağ problemilə bağlı müxalifətlə iqtidarın münasibətlərində ziddiyyət olmur. Bütün bunların prosesə mühüm təsiri var".
Məhəmmədəli QƏRİBLİ
