Məhəmməd Əsədullazadə: "Hələ ki, Dağlıq Qarabağ münaqişəsindən istifadə edən böyük güclər..."
"Türkiyənin Dağlıq Qarabağ münaqişəsinin həlli ilə heç bir əlaqəsi yoxdur". Bunu mətbuata açıqlamasında Ermənistan parlamentinin vitse-spikeri Eduard Şarmazanov deyib. O iddia edir ki, Türkiyə Azərbaycanın mövqeyini dəstəkləyir. O üzdən, Türkiyə bu prosesdə iştirak edə bilməz.
Qeyd edək ki, Türkiyənin xarici işlər naziri Mövlud Çavuşoğlu Ermənistan silahlı qüvvələrinin işğal olunmuş ərazilərdən çıxarılmasının vacib olduğunu bildirib.
E.Şarmazanov Türkiyənin bu tələbinə ikrah hissi ilə yanaşıb.
Ancaq o da məlumdur ki, Ermənistan zaman-zaman Türkiyənin Dağlıq Qarabağ münaqişəsinin sülh yolu ilə həlli prosesində iştirak etməsinə qarşı çıxıb. Hər dəfə müxtəlif vasitələrlə Türkiyəni bu prosesdən kənarda saxlamağa çalışıblar. Qonşu ölkənin bu yöndə vasitəçilik səylərini ümumiyyətlə yaxın buraxmayıblar.
Maraqlıdır, niyə Ermənistan Türkiyənin sülh danışıqları prosesində iştirakını istəmir?
Sözügedən məsələni "Bakı-Xəbər"ə şərh edən politoloq Məhəmməd Əsədullazadənin sözlərinə görə, Ermənistan Türkiyənin haqlı mövqeyin bildiyi üçün belə edir: "Ermənistanın Azərbaycana qarşı işğalçı siyasəti davam edir. Münaqişənin həlli ilə bağlı yaradılan ATƏT-in Minsk Qrupunun fəaliyyəti, demək olar ki, qənaətbəxş deyil. Sirr deyil ki, Minsk Qrupunun həmsədrləri - üç ölkə Ermənistana dəstək verir. İşğalın sona çatması üçün yetərincə siyasət aparmırlar. Təəssüf ki, Minsk Qrupunda Azərbaycanın haqlı mövqeyini müdafiə edəcək Türkiyə və Almaniya isə həmsədrlikdə təmsil olunmur. Sadəcə, üzv kimi təmsil olunurlar. Azərbaycan daim Türkiyənin həmsədrlikdə olmasını qabardır. Ancaq Ermənistan, ABŞ və Rusiya Türkiyənin Qarabağ münaqişəsinin həllində fəaliyyətinə ciddi şəkildə narahat olur. Ermənistan Türkiyənin haqlı mövqeyini bildiyi üçün, qəti şəkildə bu ölkənin vasitəçi olmasını qəbul etmir. Türkiyə beynəlxalq qanunlara əsaslanaraq konfliktin həllinə böyük töhfə verə bilər. Ona görə ki, bu ölkə Fransadan fərqli olaraq region ölkəsidir. İki ölkə ilə sərhədlərə malikdir. Hesab edirəm ki, Türkiyənin Qarabağ münaqişəsinin həllində maraqlı olması sülhə və sabitliyə nail olmaq deməkdir. Hələ ki, Dağlıq Qarabağ münaqişəsindən istifadə edən böyük güclər münaqişəni dondurmaqla regionu təzyiq altında saxlamağa çalışır. Türkiyə-Rusiya yaxınlaşması da hələ ki, regionda münaqişələrin həllinə gətirib çıxarmır. Görünür, əsas problem məhz Ermənistan-Rusiya tandemi olmaqla, Qarabağ probleminin həlli üzrə hər hansı bir vasitəçilik missiyasını yerinə yetirə bilən ölkəni yaxına buraxmaq istəmirlər".
Vidadi ORDAHALLI
