Aydın Mirzəzadə: "Bu onu göstərir ki, doğrudan da bəşəriyyət mədəniyyətlərin, multikultural dəyərlərin cəmiyyətdə yer tutmasına böyük maraq göstərir"
Xəbər verildiyi kimi, mayın 4-də Bakıda IV Ümumdünya Mədəniyyətlərarası Dialoq Forumu işə başlayıb. "Mədəniyyətlərarası dialoqun inkişafı: İnsan təhlükəsizliyi, sülh və davamlı inkişaf üçün yeni imkanlar" mövzusunda forum UNESCO, BMT-nin Sivilizasiyalar Alyansı, Dünya Turizm Təşkilatı, Ərzaq və Kənd Təsərrüfatı Təşkilatı, Avropa Şurası, İSESCO-nun tərəfdaşlığı ilə keçirilir.
Forumun rəsmi açılışından sonra "Zorakı ekstremizmin qarşısının alınması üçün vasitə kimi dialoq və universal dəyərlərə dəstək" mövzusunda plenar sessiya çərçivəsində müzakirələr aparılıb, beynəlxalq təşkilatların yüksək səviyyəli görüşü keçirilib.
Ümumiyyətlə, forum çərçivəsində 40-dək sessiya və tədbirin keçirilməsi planlaşdırılıb.
Forumda iştirak etmək üçün 120-dək ölkə rəsmisi, 39 beynəlxalq təşkilatdan nümayəndələr, 50-dən çox qeyri-hökumət təşkilatı qeydiyyatdan keçib. Ümumilikdə, tədbirdə təqribən 800-dən çox xarici nümayəndə iştirak edir. Buraya yüksək səviyyəli dövlət və hökumət rəsmiləri, beynəlxalq təşkilatların rəhbərləri, parlament sədrləri, alimlər, səfirlər, tanınmış şəxslər, 30-dan çox nazir səviyyəsində iştirakçı daxildir. Ölkəmizdə ilk dəfədir 25-dən çox beynəlxalq təşkilat rəhbər səviyyəsində eyni tədbirdə iştirak edir və onlar dünyanın ən nüfuzlu beynəlxalq institutlarıdır.
Ümumilikdə, forumda 25-dən çox rəhbər şəxsin iştirak etməsi nə deməkdir? Bu, forumun nəticələrində özünü necə göstərəcək? Məsələyə münasibət bildirən millət vəkili, politoloq Aydın Mirzəzadənin sözlərinə görə, bu, sözügedən forumun beynəlxalq aləmdə yüksək reytinqə malik olması deməkdir: "İldən-ilə bu tədbirdə iştirak edən dövlətlərin sayı artır. Təsadüfi deyil ki, bu tədbirdə 120 ölkənin dövlət nümayəndəsi iştirak edir. Nümayəndə heyətlərinin statusu kifayət qədər yüksəkdir. Bu onu göstərir ki, doğrudan da bəşəriyyət mədəniyyətlərin, multikultural dəyərlərin cəmiyyətdə yer tutmasına böyük maraq göstərir. Bəşəriyyət sülh, əminamanlıq, bir-birinin milli, dini fərqinə hörmətlə yanaşılmasını arzulayır. Bəşəriyyət müharibədən, islamofobiyadan, Qərb-Şərq qarşıdurmasından artıq yorulub. Bakı Forumu daha çox ölkələrdə, siyasi dairələrdə dəstək tapıb. Hesab edirəm ki, eyni zamanda, Azərbaycanın bu sahədə qazandığı uğurlar da diqqəti cəlb edir. Həmçinin, iştirakçılar Azərbaycan təcrübəsini öyrənməkdə, nümunəsini yaymaqda maraqlıdır. Ümumən götürdükdə forumun böyük uğur qazanacağını demək birmənalı şəkildə mümkündür". Vidadi ORDAHALLI