Məlumat verildiyi kimi, Azərbaycanla Rusiya arasında imzalanmış hərbi-texniki əməkdaşlıq müqaviləsinə əsasən şimal qonşumuzdan ölkəmizə silah-sursat və müxtəlif təyinatlı müasir hərbi texnikanın növbəti partiyası gətirilib.
Müdafiə Naziliyi gətirilən silahlarla bağlı qısa videogörüntülər də yayıb. Amma məlum olan odur ki, burada alınan silahların yalnız cüzi hissəsi nümayiş olunub. Yəni Rusiyadan alınan yeni silah partiyasının həcmi və çeşidi daha çoxdur. Aydındır ki, belə vəziyyət Ermənistanda ciddi qorxu yaradır və hadisələrin bu səpkidə inikşafından Ermənistan yenə narazılıq edir. Amma Rusiya və Azərbaycan arasında hərbi sahədə əməkdaşlığa da hansısa maneə yarada bilmir. Əksinə, Azərbaycan müdafiə nazirinin müavini, general-leytenant Kərim Vəliyev bildirir ki, Azərbaycan və Rusiya arasında hərbi-texniki əməkdaşlıq uğurla inkişaf edir. O, "İnterfaks" agentliyinə açıqlamasında qeyd edir: "Biz rusiyalı həmkarlarımızla daim əlaqədəyik. Xüsusən də qarşılıqlı hərbi-texniki əməkdaşlığımız müvəffəqiyyətlə inkişaf edir".
Xatırladaq ki, Rusiyadan gətirilən müasir hərbi texnikanın növbəti partiyasında yer alan yeni məhsullar arasında BTR-82A zirehli transportyorları da var. Ekspertlər isə hesab edir ki, elə bu texnikanın özü Azərbaycanın Ermənistan üzərində üstünlüyünü artıran konkert göstəricidir. İndi Azərbaycan ordusunda xeyli sayda bu silahdan olsa da, Ermənistanda onlardan yoxdur. Məsələ ilə bağlı "AzeriDefence" portalının məlumatına görə, BTR-82A zirehli transportyorları 2013-cü ildən Azərbaycan ordusunun silahlanmasına daxildir. Bu zirehli maşınlar ayrı-ayrı vaxtlarda keçirilən təlimlərdə, o cümlədən 2016-cı ilin aprel ayında cəbhədə baş vermiş döyüşlərdə istifadə olunub.
BTR-82A zirehli transportyorlarının əvvəlki partiyalarını istifadə edən Azərbaycan hərbçilərinin tələbi və təklifi ilə maşınlarda istehsalçı müəssisə tərəfindən bəzi təkmilləşdirmələr aparılıb. Nəticədə zirehli transportyorun döyüş imkanları yüksəldilib. Rusiyanın "Hərbi Sənaye Kompleksi" (VPK) müəssisəsi tərəfindən istehsal olunan BTR-82A zirehli transportyoru 1986-cı ildən silahlanmada yer alan BTR-80 və BTR-80A tipli zirehli transportyorların dərin müasirləşdirilmiş versiyasıdır. Lakin BTR-82A öz sələflərini döyüş və texniki xüsusiyyətlərinə görə praktik olaraq iki dəfədən çox üstələyir.
BTR-82A-nı özündən əvvəlki zirehli transportyorlardan fərqləndirən cəhətlərdən ən əsası isə onun daha güclü mühərriklə təmin olunması və zirehin gücləndirilməsidir. Maşının qəlpələrə qarşı müdafiəsi korpusun daxili səthlərinə əlavə edilmiş müasir sintetik materiallar vasitəsilə yüksəldilib.
Silah arsenalı isə əvvəlkilərindən o qədər də fərqlənmir. Zirehli transportyorun məsafədən idarə olunan döyüş moduluna əsas silah kimi 30 mm-lik 2A72 avtomat top (istifadəçinin istəyindən asılı olaraq 14.5 mm-lik KPVT-də olur) və ikinci silah kimi 7.62 mm-lik PKTM pulemyotu daxildir. 2A72 avtomat topu BMP-2 piyada döyüş maşının əsas silahı olaraq indiyədək dünyanın müxtəlif regionlarında gedən müharibələrdə geniş istifadə olunmaqla özünü doğruldub. 2A72 topunun atış tempi dəqiqədə ən azı 330 mərmi, mərminin başlanğıc sürəti tipindən asılı olaraq saniyədə 960-1120 metr, atış uzaqlığı 4000 metrdən çoxdur. Unifikasiya edilmiş modulda yerli və xarici istehsal olan digər artilleriya silahları da qurula bilər. Döyüş modulunda müasir müşahidə və nişangah sistemləri tətbiq olunub. Əvvəlki nəsil zirehli transportyorlardan fərqli olaraq, BTR-82A kondisioner, beşinci nəsil müasir rabitə vasitələri və "Trona-1" topoqrafiya səmt sistemi ilə təchiz edilib. BTR-82A zirehli transpotyoru, Azərbaycanla yanaşı, Rusiya, Belarus, Qazaxıstanın hərbi texnika parkında yer alır. 2013-cü ilin fevralında BTR-82A tipli zirehli transportyoru rəsmən silahlanmaya qəbul edən Rusiya Müdafiə Nazirliyi Cənub Hərbi Dairəsi, Qara dəniz və Xəzər dəniz donanmalarının istifadəsinə bu texnikanı daxil edib. Təbii ki, indi belə müasir silahın ordumuzda daha çox sayda olması Azərbaycana əlavə hərbi üstünlüklər qazandırır. Azərbaycan döyüş hazırlığı vəziyyətində olan bütün hərbi hissələrini, demək olar ki, BTR-82A ilə təmin edib. Məlumatlar səslənir ki, yaxın zamanlarda Rusiyadan ölkəmizə silah-sursat və müxtəlif təyinatlı müasir hərbi texnikanın növbəti partiyası da gətiriləcək. Bu isə düşmən üzərində hərbi üstünlüyü daha da artırır. Elə bu səbəbdən də Ermənistan Rusiyanın Azərbaycana silah satışından ciddi narazılıq edir. Amma Azərbaycan Rusiya ilə yanaşı Türkiyədən, Pakistandan, Çindən, İsraildən, İrandan, Ukraynadan da silah-sursat alır.
Nahid SALAYEV