İsmayıl Ağayev: "Türkiyə öz sözünü demiş ölkədir və inanıram ki, belə təzyiqlərin heç bir faydası olmayacaq"
Aprelin 25-də Avropa Şurası Parlament Assambleyasında (AŞ PA) "Türkiyədə demokratik təsisatların fəaliyyəti" adlı hesabat layihəsi müzakirə olunub. Nəticədə Türkiyənin AŞ PA-nın Montorinq Komitəsinin monitorinqi altına alınması haqqında qərar qəbul edilib. Sessiyada iştirak edən 170 deputatdan 113-ü qərarın lehinə, 45-i əleyhinə səs verib. 12 deputat isə bitərəf qalıb.
Türkiyə Xarici İşlər Nazirliyi AŞ PA-nın qərarına dərhal reaksiya verib. Bəyan edib ki, Ankara Avropa Şurası Parlament Assambleyası ilə münasibətlərə yenidən baxacaq. Türkiyə XİN bu qərarı siyasi motivlərə əsaslanan, ədalətsiz hesab edir.
Ankara, eyni zamanda, parlamentariləri ağılla fəaliyyət göstərməyə, dünyəvi fəlakət olan terrorizmə qarşı prinsipial mövqe nümayiş etdirməyə çağırıb. Bəyanatda vurğulanıb ki, bu addım əməkdaşlıq və dialoq ruhuna tamamilə ziddir və yaranmış vəziyyət Türkiyəni AŞ PA ilə münasibətlərə yenidən baxmağa məcbur edir.
AŞ PA-nın qərarına Türkiyə prezidenti Rəcəb Tayyib Ərdoğanın münasibəti daha sərt olub. O, belə bir qərarı tanımadığını bəyan edib.
AŞ PA niyə məhz Türkiyədə keçirilən referendumdan sonra belə addım atmaq qərarına gəldi?
Beynəlxalq Diaspor Mərkəzinin sədri İsmayıl Ağayev qəzetimizə açıqlamasında bildirdi ki, Türkiyəyə qarşı qəbul edilən bu qərarı biz kəskin şəkildə pisləyirik: "AŞ PA rəhbərliyi, əslində, Türkiyəyə təşəkkür etməlidir. O səbəbdən ki, Türkiyə üç istiqamətdə terrorizmlə - FETÖ, PKK, İŞİD-lə mübarizə aparır. Türkiyə Yaxın Şərq ölkələrindən gələn milyonlarla qaçqına qucaq açıb. Belə ki, Türkiyə onların Avropaya getməsinin qarşısını alıb və bütün yaşayışını təmin edib. Heç bir Avropa ölkəsi bu addımı atmayıb. Əksinə, miqrantları ölkələrinə buraxmırlar. Əslində, bir qədər dərinə getsək, məhz elə Avropa ölkələrinin günahı ucbatından bu qədər qaçqın ordusu meydana gəlib. Amma onların sosial problemlərinin həlli ilə Türkiyə məşğul olur. Hələ də Avropa İttifaqı bunun üçün Türkiyəyə ayırdığı vəsaiti ödəməyib. Türkiyə bu cür təzyiqlərə baxmayaraq, yenə də inkişaf edir. Bu da Avropadakı bəzi dairələrin narahatlığına səbəb olur. Bəzi dairələr hətta Türkiyədə hərbi çevriliş etməyə belə cəhd etdilər. Ancaq Türkiyə bunu adladı. Ən son nəticədə isə dövlətin gələcək rifahı və möhkəmlənməsi üçün referendum keçirildi və xalq indiki hakimiyyəti dəstəklədi. Təbii ki, bu nəticəni gözləməyən Qərb dairələri artıq açıq müstəvidə təzyiqə keçdilər. Türkiyə öz sözünü demiş ölkədir və inanıram ki, belə təzyiqlərin heç bir faydası olmayacaq".
Məhəmmədəli QƏRİBLİ