Əli Orucov: "Belə dezinformasiyaların yayılmasında ermənilərin və Rusiyadakı müəyyən dairələrin rolu var"
Aprelin 20-22-də tanınmamış "Krım Respublikası"nın Yalta şəhərində keçirilən III beynəlxalq iqtisadi forumla bağlı qalmaqal yaranıb. Hər şey ondan başlayıb ki, Ukraynanın UNN agentliyi Krım Muxtar Respublikası (KMR) Prokurorluğunun foruma xarici iştirakçıların qatılması faktı üzrə cinayət işi açdığı və bu sırada Azərbaycanın 17 dövlət və özəl şirkətinin nümayəndələri olduğu barədə xəbər yayıb.
KMR mətbuat xidməti vurğulayıb ki, xarici vətəndaşların yarımadanın müvəqqəti işğal olunmuş ərazilərinə getməsi Ukrayna Dövlət Miqrasiya Xidməti tərəfindən verilən xüsusi razılıq əsasında olmalıdır, əks təqdirdə, bu, Ukrayna qanunvericiliyinin pozulması deməkdir. Azərbaycanın tanınmış brendlərinin nümayəndələri dərhal məsələyə reaksiya verərək, Yaltadakı forumda iştirakçı olmadıqlarını bəyan edib. Azərbaycanın Ukraynadakı Səfirliyindən deyiblər ki, məlumat yayıldıqdan sonra onlar bəzi Azərbaycan şirkətlərinin rəhbərliyi ilə əlaqə saxlayıb. Onlar cinayət işinin açılması və işləri ilə əlaqədar hər hansı problemlə bağlı iddianı inkar edib.
Ukrayna Baş Prokurorluğundan da bildirilib ki, idarənin Azərbaycanın 17 dövlət və özəl şirkətinin nümayəndələri barədə cinayət işi başlaması barədə heç bir məlumatı yoxdur. Eyni zamanda, bu forumda iştirak etmiş "İşgüzar Rusiya" ictimai təşkilatının saytında Yaltadakı tədbirdə nümayəndələri təmsil olunmuş 46 ölkənin 200 təşkilatının adı var. Həmin ölkələr arasında Azərbaycan yoxdur. Qeyd edək ki, forumda 100 milyard rubl dəyərində müqavilələr imzalanıb.
Azərbaycanın bu kimi məsələlərdə son dərəcə diqqətli davrandığını nəzərə alsaq, iki ölkənin arasını vurmağa yönəlmiş bu kimi dezinformasiyaların dövriyyəyə buraxılmasında hansı qüvvələrin marağı var? Məsələyə münasibət bildirən AMİP Siyasi Şurasının üzvü Əli Orucovun sözlərinə görə, burada bir sıra dairələrin rolu var: "Əvvəla Azərbaycan-Ukrayna münasibətləri çox yüksək səviyyədə olduğu üçün, bəzi qüvvələr bunu həzm edə bilmir. O üzdən, zaman-zaman həqiqətə uyğun olmayan məlumatlar yayılır. Belə dezinformasiyaların yayılmasında ermənilərin və Rusiyadakı müəyyən dairələrin rolu var. Məqsəd iki ölkə münasibətlərində soyuqluq yaratmaqdır. Çünki iki ölkə bir sıra sahələrdə, o cümlədən hərbi sahədə əməkdaşlıq edir. Azərbaycana silah ixrac edən dövlətlərdən biri də Ukraynadır. Ukrayna da, məlum olduğu kimi, separatizmdən əziyyət çəkir. Mərkəzi hakimiyyət müəyyən ərazilərə, o cümlədən Krıma nəzarət edə bilmir. İki ölkənin arasını vurmağa edilən cəhdlərə rəğmən, hesab edirəm ki, Azərbaycan şirkətləri bu kimi məsələlərdə son dərəcə diqqətli olmalıdır. O zaman bu kimi həqiqətə uyğun olmayan informasiya yayanları daha tez ifşa etmək mümkün olacaq. Nəticədə müəyyən narahatlığın yaranmasına, bir belə rəsmi qurumun izahat verməsinə ehtiyac qalmaz". Vidadi ORDAHALLI