Vəfa Heydərli: "Avropa Türkiyədən heç zaman tam imtina edə bilməz"
Xəbər verildiyi kimi, Avropa Şurası Parlament Assambleyasının (AŞ PA) Strasburqda keçirilən yaz sessiyasının plenar iclasında "Türkiyədə demokratik təsisatların fəaliyyəti" adlı hesabat layihəsi müzakirə olunub. Türkiyədəki son Konstitusiya referendumundan sonra ölkə üzrə məruzəçilərin hazırladığı hesabatda Türkiyənin monitorinq mərhələsinə qaytarılması təklif olunub.
Gərgin müzakirələr zamanı bəzi assambleya üzvləri sənədə əlavə və dəyişikliklər təklif etsə də, bu təkliflərin heç biri qəbul edilməyib və Türkiyənin postmonitorinq prosesindən monitorinq mərhələsinə salınmasına dair müddəa olduğu kimi saxlanıb.
Sonda qətnamə layihəsi tam şəkildə səsə qoyularaq qəbul edilib. Qərarın lehinə 113, əleyhinə 45 parlamentar səs verib.
Qeyd edək ki, Türkiyə 13 il əvvəl monitorinq prosesindən çıxarılıb və postmonitorinq mərhələsində idi. Beləliklə, Türkiyə monitorinq mərhələsindən çıxarıldıqdan sonra yenidən monitorinq altına alınan ilk ölkə olub.
Belə bir qərarın verilməsi son dövrlər Türkiyənin hərbi, iqtisadi inkişafını gözü götürməyən Avropanın bəzi gizli dairələrinin sifarişi ola bilərmi?
Politoloq Vəfa Heydərli qəzetimizə bildirdi ki, bir tərəfdən Türkiyə dialoqun aparılmasına hazır olduğunu bildirir, o biri tərəfdən isə, AŞ PA bu dialoqun, konstruktiv əməkdaşlığın əvəzinə Türkiyəyə qarşı sanksiyalar tətbiq edir: "Bu da o deməkdir ki, assambleyada sanksiyalar tətbiq etmək daha üstün kateqoriya kimi götürülür, nəinki əməkdaşlıq və dialoqun aparılması. AŞ PA-nın qərarı Türkiyə cəmiyyətinə və hakimiyyətinə bir mesajdır, hər kəs nəticə çıxarmalıdır. Bu, Türkiyəni Avropadan təcrid etmək məqsədi güdür. Türkiyə 1953-cü ildən AŞ PA-da təmsil olunur və indiyə kimi belə bir sərt qərarla üzləşməyib. Hesab edirəm ki, məntiqə söykənməyən belə bir qərar ancaq Türkiyənin inkişafını istəməyən gizli dairələrin təsiri ilə verilib. Avropa Türkiyədən heç zaman tam imtina edə bilməz. Ancaq özləri yanıldıqlarını görəcək. Türkiyə həm böyük bir istehlak, eləcə də inkişaf edən bir istehsalçı ölkə olaraq Avropanın önəmli tərəfdaşıdır, coğrafi olaraq əhəmiyyətli bir hissəsi Avropada yerləşir. Uzun illər boyu formalaşmış əlaqələrin kəsilib atılmasının Avropa üçün də zərəri ola bilər. AŞ PA-nın sərt qərarı onsuz da günü-gündən soyuyan münasibətlərə daha pis təsir edəcək. Yəqin ki, bununla bağlı hansısa addımlar atılacaq. Türkiyənin bütün siyasi partiyaları və cəmiyyəti AŞ PA ilə mübarizədə iqtidarla həmrəy olduğunu bildirir. Avropa təsisatı qısa zamanda yanıldığını hiss etmiş olacaq".
Məhəmmədəli QƏRİBLİ