Ramil Hüseynov: "Ötən illər ərzində qurum bu məsələ ilə bağlı bəzi deklorativ xarakterli qərarlar qəbul edib"
Azərbaycan 2001-ci ilin yanvarında Avropa Şurası Parlament Assambleyasına üzv olanda bir çoxları ümid edirdi ki, sözügedən qurum ölkənin bir sıra problemlərinin, üzləşdiyi haqsızlıqların həllində vacib rol oynayacaq. Ancaq ötən 16 ilin təcrübəsi göstərdi ki, quruma bəslənən ümidlər özünü doğrultmadı. AŞ PA Azərbaycana ədalətli yanaşmaq əvəzinə, digər "maraqlardan" çıxış etməyə başladı.
Bunun əvəzində nə gördük? Qondarma "siyasi məhbus" oyunu, Kristofer Ştrasserin monitorinqi, bununla bağlı AŞ PA-da aparılan müzakirələr və digər bu kimi məsələlər qurumun siyasi təzyiq vasitəsinə çevrildiyini açıq şəkildə nümayiş etdirdi ki, bütün bunlar ikili standartların, qərəzin açıq göstəricisidir.
Halbuki, Azərbaycana qarşı işğalçılıq siyasəti yürüdən, torpalarımızın 20 faizini zəbt edərək minlərlə soydaşımıza qarşı terror aktı və qeyri-insani vəhşiliklər törədən, 1 milyondan çox azərbaycanlını doğma yurd-yuvalarından didərgin salan Ermənistana təzyiq heç vaxt gündəmdə olmayıb. Avropa dairələrinin həyata keçirdiyi siyasət ötən müddət ərzində Ermənistanın işğalçılığına bəraət qazandırmaq, Dağlıq Qarabağın işğalını rəsmiləşdirmək və onu Azərbaycandan uzaqlaşdırmaq məqsədi güdüb. Azərbaycan AŞ PA-ya üzv olduğu 16 il ərzində yalnız ədalətsizlik və qərəzli təzyiqlərlə üzləşib. Reallıq bundan ibarətdir. Maraqlıdır, bəs siyasilər buna necə yanaşır? Məsələyə münasibət bildirən VİP-in sədr müavini Ramil Hüseynovun sözlərinə görə, ötən illər ərzində quruma bəslənən ümidlər özünü doğrultmadı: "Məsələ ondadır ki, AŞ PA-nın demokratiya, insan hüquqları məsələsinə yanaşması ikili standartlara söykənir. Çünki demokratiyadan, insan hüquqlarının qorunmasından danışan AŞ PA nədənsə Azərbaycanda 1 milyon nəfər qaçqın və məcburi köçkünün uzun illərdir pozulan hüquqlarını görməzdən gəlir. Halbuki, onlar yerindən-yurdundan didərgin düşərək çox çətin vəziyyətdə yaşayır. Ermənistanın işğalçı ordusu tərəfindən bütün yaşayış məntəqələri məhv edilərək yer üzündən silinib. Nədənsə bu onların yadına düşmür. Ötən illər ərzində, ən yaxşı halda, qurum bu məsələ ilə bağlı bəzi deklorativ xarakterli qərarlar qəbul edib. Praktiki olaraq bunun heç nəyi dəyişmədiyi də göz önündədir. Mən demirəm ki, demokratiya, insan hüquqları məsələsində Azərbaycanda heç bir problem yoxdur. Var, ancaq gərək məsələyə obyektiv yanaşasan. Təəssüf ki, ötən müddət ərzində biz bunu görmədik. Ermənistanda seçkilər, insan hüquqları ilə bağlı bir sıra problemlər var. Bu, zaman-zaman özünü göstərib. Ancaq AŞ PA ikili standartlardan çıxış edərək bunlara məhəl qoymur". Vidadi ORDAHALLI