Türkiyə prezidenti Rəcəb Tayyib Ərdoğan Avropa Şurası Parlament Assambleyasının Türkiyənin monitorinq altına qaytarılması barədə qərarını tənqid edib. APA-nın yerli mətbuata istinadən verdiyi xəbərə görə, Ərdoğan bununla bağlı yazılı açıqlama yayıb.
Açıqlamada qərarın siyasi olduğu bildirilib: "Türkiyə ilə bağlı qəbul edilən qərar tamamilə siyasidir. Bu qərarı tanımırıq, istədikləri qədər qərar qəbul etsinlər".
Ərdoğan "Reuters"ə müsahibəsində isə ötən bazar Fransada keçirilən prezident seçkilərinin fövqəladə vəziyyət şərtləri altında baş tutduğunu deyib: "Fransa ilə bağlı niyə belə bir qərar verilmir? Türkiyədə dövlət çevrilişinin qarşısının alınması məqsədilə fövqəladə vəziyyət elan olunub. Bu çərçivədə ölkədəki FETÖ-çüləri təmizləyirik".
Prezident Suriya və İraqdan Türkiyəyə gələnlərin üzünə qapını bağlamayacaqlarını vurğulayıb: "Bombalardan qaçanları təcrid edə bilmərik".
"AŞ PA-dakı bəzi millət vəkilləri PKK-ya ciddi dəstək verir"
AŞ PA-dakı bəzi millət vəkilləri PKK-ya ciddi dəstək verir. "Trend"in məlumatına görə, bunu Türkiyənin xarici işlər naziri Mövlud Çavuşoğlu deyib.
Nazir qeyd edib ki, rəsmi Ankara AŞ PA ilə münasibətlərinə yenidən baxacaq: "AŞ PA-nın qalmaqallı qərarı gələcək əməkdaşlığımızı zəiflədən qərardır. Münasibətlərimizə yenidən baxacağıq. Bizi buna məcbur etdilər. Mən bunu istəməzdim. Münasibətlərin yaxınlaşması üçün şəxsən çox səy göstərdim".
M.Çavuşoğlu vurğulayıb ki, Avropa ölkələrində artan irqçilik və ksenofobiya bu qurumlara da sirayət edib: "AŞ PA-dakı millət vəkillərinin bir qismi PKK terror təşkilatına ciddi dəstək verir".
Türkiyəli deputatlar AŞ PA-nın sessiyasında iştirak etməyəcək
Avropa Şurası Parlament Assambleyasının (AŞ PA) Türkiyə ilə bağlı monitorinqi bərpa etmək qərarına etiraz əlaməti olaraq Türkiyə nümayəndə heyətinin hakim Ədalət və İnkişaf Partiyası (AKP) və müxalif Milliyyətçi Hərəkət Partiyasından (MHP) olan üzvləri qurumun plenar sessiyasının işində iştirak etməyəcək. Bu barədə AŞ PA-da Türkiyə nümayəndə heyətinin rəhbəri, AKP-dən olan millət vəkili Talib Küçükcan bildirib.
T.Küçükcan deyib ki, rəsmi Ankara AŞ PA-nın bu qalmaqallı qərarını şiddətlə qınayır: "Bu qərar terrorçuları və qiyamçıları cəsarətləndirən bir qərardır".
Türkiyə nümayəndə heyətinin müxalif CHP və HDP-dən olan üzvləri isə plenar sessiyasının işində iştirak edəcəklərini bildiriblər.
Qeyd edək ki, Türkiyənin AŞ PA-da nümayəndə heyətinin 18 üzvü var - 10 AKP, 5 CHP, 2 HDP və 1 MHP.
Rəsmi Ankara AŞ PA-nın qalmaqallı qərarından sonra Brüssel və Strasburqda müzakirələr aparacaq. Bunu Türkiyənin Avropa İttifaqı işləri üzrə naziri Ömər Çelik deyib.
Nazir gələn ay məsələ ilə əlaqədar Brüssel və Strasburqda geniş müzakirələrin aparılacağını vurğulayıb.
AŞ PA-nın qərarı Türkiyənin daha sərt cavab verməsinə səbəb ola bilər
Avropa Şurası Parlament Assambleyasının (AŞ PA) Türkiyə ilə bağlı monitorinqi bərpa etmək qərarı rəsmi Ankaraya siyasi baxımdan nəzarət etmək cəhdi olaraq sərt və Avropa Şurasının üzv ölkəsinə qarşı qəbuledilməz bir qərardır. Bunu isə "Trend" Türkiyənin "Strategic Outlook" Analitika Mərkəzinin rəhbəri Yusuf Çinar bildirib.
Avropanın Türkiyəyə qarşı kənarlaşdırma siyasəti apardığını deyən ekspert vurğulayıb ki, Avropa İttifaqı öz üzv ölkələrinin etdiyi səhvləri görmür: "Fransa ölkədə fövqəladə hal elan etdikdə "demokratik ölkə", Türkiyə eyni addımı atdıqda isə "insan hüquqlarını pozan ölkə" adlanır".
Y.Çınar qeyd edib ki, AŞ PA-nın bu qərarı Türkiyənin Avropaya daha sərt cavab verməsinə səbəb ola bilər: "Əvvəl tərəflərin münasibətləri dalğalı şəkildə davam edirdisə, AŞ PA-nın sözügedən qərarından sonra Avropa-Türkiyə əlaqələri tamamilə kəsilə bilər".
AŞ PA-nın qərarı nə Aİ-yə, nə də Türkiyəyə xeyir gətirəcək
Avropa Şurası Parlament Assambleyasının (AŞPA) Türkiyə ilə bağlı monitorinqi bərpa etmək qərarı tərəflərin heç birinə xeyir gətirməyəcək. Türkiyənin "Strategic Outlook" analitika mərkəzinin sədr müavini Mehmet Fatih Öztarsunun sözlərinə görə, ötən il Türkiyə və Avropa İttifaqı (Aİ) sıx əməkdaşlıq ediblər: "Türkiyə Avropa yönündə islahatları əsaslı şəkildə həyata keçirirdi, amma indi həm Aİ-də, həm də Türkiyədə çox şeylər dəyişib. Bu gün Türkiyə regional böhranın mərkəzində yer alıb. Avropa qaçqınlarla bağlı vədlərinə əməl etməyib. Bununla bağlı Türkiyə Aİ-ni məhkəməyə vermək hüququna malikdir".
Ekspert qeyd edib ki, bu gün Avropa Türkiyədən bir sıra öhdəliklərin yerinə yetirilməsini tələb edirsə, Türkiyənin qaçqın böhranı ilə bağlı üz-üzə qaldığı vəziyyəti nəzərə almalı və öz vədləri ilə bağlı cavabdehlik hiss etməlidir.
AŞ PA-nın qərarı Türkiyəyə qarşı kampaniyanın növbəti mərhələsidir
AŞ PA-nın Türkiyə ilə bağlı qərarı bu ölkəyə qarşı aparılan kampaniyanın növbəti mərhələsidir. Bunu Trend-ə Milli Məclisin deputatı Aydın Mirzəzadə deyib.
A.Mirzəzadə bildrib ki, 1963-cü ildən Türkiyənin müraciətinə baxmayaraq, ölkə Avropa Birliyinə qəbul edilmir: "Türkiyənin PKK terror təşkilatına qarşı mübarizəsini Avropa dəstəkləmir. Ötən il Almaniya parlamenti uydurma "erməni soyqırım"ını tanıyaraq, Türkiyəyə qarşı böyük bir haqsızlıq etdi. Bir müddət əvvəl türkiyəli nazirlərin Avropaya buraxılmaması, dünən isə AŞ PA-nın Türkiyəni post-monitorinq mərhələsindən yenidən monitorinq mərhələsinə qaytarması isə Avropa Şurasının özünün öz nizamnaməsini ciddi surətdə pozması deməkdir".
Deputat bildirib ki, Türkiyə sıradan bir ölkə deyil: "Türkiyə dünyanın və regionun nüfuzlu ölkələrindən biridir, dünyanın stabilliyinə və təhlükəsizliyinə ciddi töhfə verir. Türkiyə həm də Avropa Şurasının siyasi xəttini müəyyənləşdirən ölkələrdən biridir və bu ölkənin nümayəndəsi vaxtilə AŞ PA-nın prezidenti olub. Türkiyənin müstəqil daxili və xarici siyasəti Avropada müəyyən dairələrin xoşuna gəlmir. Onlar Türkiyəni zəif, iradəsiz, ən əsası isə Qərb dairələrinin maraqlarına uyğun siyasət aparan bir dövlət kimi görmək istəyir".
A.Mirzəzadə əlavə edib ki, AŞ PA-nın bu qərarı Avropa təşkilatlarının ikili standartlarından xəbər verir: "Ermənistanda seçkilər ciddi qanun pozuntuları ilə keçirilir, AŞ PA bu məsələyə münasibət bildirmir. Ermənistan beynəlxalq hüquq normalarını pozaraq qonşu Azərbaycan torpaqlarının bir hissəsini işğalda saxlayır, ancaq AŞ PA Azərbaycanla Ermənistanı tərəzinin bir gözünə qoyur".
Deputat vurğulayıb ki, antitürk kampaniyası çox əcaib bir xarakter alıb: "Bu heç də Avropaya başucalığı gətirmir. Bu, Avropaya yeni düşüncə gətirilməsinin vacibliyini vurğulayır. Avropa özünün elan etdiyi və dünyaya nümunə göstərdiyi demokratiya, insan hüquqları, qanunun aliliyi prinsiplərinə qayıtmalıdır, ədalətsizliyi və ikili standartları fəaliyyətindən kənarlaşdırmalıdır".
"AŞ PA-nın Türkiyə ilə bağlı qərarı ədalətsiz və qərəzlidir"
"Avropa Şurası Parlament Assambleyasının Türkiyənin monitorinq altına alınması haqda qərarında obyektiv gerçəklik nəzərə almayıb. Qərar qərəzlidir və Avropa Şurasının qəbul etdiyi normaların özünə ziddir". Bu sözləri APA-ya açıqlamasında Milli Məclisin deputatı Hikmət Babaoğlu deyib. O bildirib ki, insan hüquq və azadlıqları o zaman dəyərli olur ki, ona yanaşma və qiymətləndirmədə obyektiv kriteriyalar tətbiq edilir: "Əgər insan hüquq və azadlıqlarına siyasi gözlə baxırsınızsa, insan hüquq və azadlıqları kimi qlobal dəyərləri Qərb imperializminin milli dövlətlərə təzyiq mexanizmi kimi görürsünüzsə, mahiyyət dəyişir. Düşünürəm ki, AŞ PA-nın qəbul etdiyi bu qərar da məhz qərblilərin özlərindən kənarda olan coğrafiyaya imperialist baxışının nəticəsidir. Uzun illərdir ki, Avropada islamofob düşüncə bir ənənə halını alıb. Eyni zamanda, Avropada özündən olmayanları rədd etmə fəlsəfəsi hakimdir. Avropa imperializminin maraqlarına cavab verməyən, onun diktəsi ilə oturub-durmayan dövlətləri cəzalandırmaq məqsədilə bu cür təşkilatlardan istifadə edilir. Belə təşkilatlar imperializmin bir alətinə çevrilir. AŞ PA-nın Türkiyəyə münasibətdə qəbul etdiyi qərar da dediyimiz əsaslara söykənir".
H.Babaoğlu qeyd edib ki, Avropa Şurası xüsusilə müsəlman dövlətlərinə qarşı həmişə insan hüquq və azadlıqları kimi dəyərlərdən bir silah kimi istifadə edib: "O cümlədən, Azərbaycana münasibətdə AŞ PA zaman-zaman qərəzli mövqe tutub. Bizim heç birimizin yaddaşından çıxmayıb ki, AŞ PA-da Kristofer Ştrasserin Azərbaycanda qondarma "siyasi məhbus" məsələsi müzakirə olunub. Onlar tam bir siyasi şou düzəldərək Azərbaycana təzyiq mexanizmi düzəltməyə çalışıblar. Bu, artıq AŞ PA-nın ənənəsidir. Ona görə də, mən düşünürəm ki, bu məsələlərlə AŞ PA-nın qarşısına qoyduğu məqsədə nail olmaq çətindir. Çünki get-gedə bu cür qərarlarla AŞ PA daha çox özünü ifşa edir. Onların qlobal dəyərlərlə nə qədər asan manipulyasiya etdiyi hər kəs tərəfindən dərk olunur. Hesab edirəm ki, belə bir ciddi təşkilat öz nüfuzunu qorumaq istəyirsə, bu cür populist, siyasi məqsədlərə xidmət edən qərarlardan imtina etməyi bacarmalıdır. Təzyiqə məruz qalan Avropa Şurasına üzv ölkələr də buna etiraz əlaməti olaraq birgə sinxron addımlar müəyyənləşdirməli və öz maraqlarını müdafiə edən qərarlar qəbul etməyi bacarmalıdırlar".
Milli Məclisin üzvü, Azərbaycan Respublikasının Prezidenti Yanında Dövlət İdarəçilik Akademiyasının Siyasi Araşdırmalar İnstitutunun direktoru Elman Nəsirov APA-ya deyib ki, AŞ PA-nın aprelin 25-də keçirilmiş sessiyasında Türkiyə ilə bağlı qəbul edilən qərar ədalətsizdir və qərəzlidir: "Bu qərar haqlı olaraq Türkiyə və Azərbaycan ictimaiyyətlərində etiraza səbəb olub. Məlum qərar haqsız və ədalətsizdir. Türkiyə artıq bir dəfə, 1996-2004-cü illərdə monitorinq altına alınıb. Səkkiz il bu proses gedib. 2004-cü ildən başlayaraq Türkiyə post-monitorinq mərhələsinə daxil olub. Türkiyənin apardığı islahatlar, atdığı addımlar müsbət dəyərləndirilib və bu mərhələyə layiq görülüb. Lakin yenidən Türkiyəni 13 il əvvəlki mövqeyinə qaytarmaq, Türkiyəni guya insan hüquqlarının pozulmasında, vətəndaşlarının hüquqlarının tapdanmasında ittiham etmək olduqca qərəzli yanaşmadır və bu bir daha onu göstərir ki, bu gün Avropada islamofob, ksenofob qüvvələr kifayət qədər güclənib. Onlar Türkiyəyə qarşı öz iradələrini yeritmək istəyirlər və çalışırlar ki, Türkiyəni təzyiq altında saxlasınlar. Məqsəd də birdir. Məqsəd odur ki, Türkiyənin inkişafının qarşısını alsınlar. Heç bir vəchlə onlar həzm edə bilmirlər ki, müsəlman Türkiyə bu cür müstəqil siyasət həyata keçirir. Heç bir halda həzm edə bilmirlər ki, Türkiyədə hakimiyyət güclüdür və xalqın hakimiyyətə dəstəyi var. Bütün bunları həzm edə bilmirlər. Reallıqda isə onlar məsələyə obyektiv yanaşsaydılar, Türkiyəyə bəlkə min dəfə təşəkkür etməli idilər. O səbəbdən ki, Türkiyə bu gün Avropa Şurasının üzvü olaraq həm İŞİD-ə, həm PKK-ya qarşı mübarizə aparır. Eyni zamanda, Türkiyə bu gün 3 milyon 200 mindən artıq qaçqına, miqranta qucaq açıb, onların problemlərini həll edir. Bunun əvəzində Türkiyəyə 3 milyard avro vəsait verəcəkdilər. Onun da cəmisi 750 milyon avrosunu ödəyiblər. Budur reallıq. Bütün bunlar bir daha göstərir ki, həqiqətən bu qurumda çox ciddi siyasi islahatlara ehtiyac var. Bu gün Avropa Şurası çox ciddi böhran yaşamaqdadır. Bu qurumda islamofob qüvvələrin sayı həddən artıq artmağa başlayıb. Bundan başqa, qərar qəbul edilərkən çox ciddi qanun, prosedur pozuntusu baş verib. Çünki bu qurumda 324 parlamentar var, amma cəmi 170-i toplanıb, onlardan da 113-ü Türkiyə əleyhinə səs verib. Digərləri bu prosesdə iştirak etməyib. Burada AŞ PA-nın siyasi iradəsi ortaya qoyulmayıb. Bir qrup islamofob, kimlərinsə əlində alət olan qüvvələr Türkiyəni hədəf seçib və beləcə bir sənəd qəbul ediblər".
E. Nəsirov qeyd edib ki, Azərbaycan dövləti də dəfələrlə belə qüvvələrin hədəfində olub: "Bir neçə il əvvəl AŞ PA Azərbaycanla bağlı Kristofer Ştrasser adlı bir məruzəçi təyin etmişdi. O da anti-Azərbaycan, qərəzli, ikili standartlardan yoğurulmuş bir hesabatı hazırlamışdı. Bütün bunlar onu göstərir ki, Avropa Şurasında da, Avropa İttifaqında da bu gün təhlükəli proseslər baş verməkdədir. İndiki halda hər iki təşkilatda sivil qüvvələr birləşməli və öz müttəfiqlərini itirməməlidirlər. Türkiyə Qərb dünyasının müttəfiqidir. Öz müttəfiqinə qarşı belə bir davranış heç bir təşkilata başucalığı gətirməz".
Xəbər xidməti