Günel Fərhadqızı: "Ermənistana yardımın davam etdiriləcəyinə gəldikdə isə, bu onların dilənçi durumunda olması ilə bağlıdır"
Dövlət Departamentinin xətti ilə bir sıra inkişaf edən ölkələrə ayrılan maliyyə yardımı azaldılacaq və ya ümumiyyətlə ləğv ediləcək. Bu barədə Dövlət Departamentinin 15 səhifəlik büdcə sənədində qeyd edilib. Sənədə əsasən, Dövlət Departamentinin xətti ilə Azərbaycan, Qazaxıstan, Türkmənistan, Belarus kimi ölkələrə ayrılan maliyyə yardımının dayandırılması nəzərdə tutulur. Ermənistana ayrılan maliyyə yardımı isə 77,3 %, Moldovaya 47,4 %, Ukraynaya 68,6 % azaldılacaq.
Sənəddə, həmçinin, xaricdə layihələrin həyata keçirilməsi ilə məşğul olan Beynəlxalq İnkişaf üzrə ABŞ Agentliyinin Dövlət Departamenti ilə birləşdirilməsi də nəzərdə tutulub.
Departamentin Azərbaycanla bağlı gəldiyi nəticəni Azərbaycanın kifayət qədər inkişaf etmiş ölkə olması ilə əlaqələndirmək olarmı?
Ekspert Günel Fərhadqızı qəzetimizə bildirdi ki, ABŞ-ın göstərdiyi maliyyə dəstəyilə bağlı biz çox vaxt ikili standartlarla rastlaşmışıq: "Bilirsiniz ki, ABŞ-da qəbul olunan "907 Düzəliş" adlı qanun layihəsinə görə biz 10 il müddətində onlardan maliyyə yardımı ala bilmədik. 2002-ci ildə həmin qərar dondurulsa da, ölkəmizin dəstəyə böyük ehtiyacı olduğu dönəmlərdə bundan məhrum olmuşuq. Halbuki, həmin müddət ərzində ABŞ tərəfindən Ermənistana ciddi maliyyə yardımı göstərilib. Hesab edirəm ki, işğalçı ölkənin belə maddi yardımdan ümumiyyətlə məhrum edilməsi daha ədalətli olardı. Ancaq təəssüf ki, belə bir qərarı işğaldan zərər çəkən bir ölkəyə qarşı qəbul etdilər. Departamentin hazırladığı layihədə bu dəfə Azərbaycana göstərilən yardımın dayandırılmasının nəzərdə tutulmasının heç bir siyasi səbəbi yoxdur. Mən bunu Azərbaycanın iqtisadi cəhətdən inkişaf etməsilə əlaqələndirirəm. Həmin sənəddəki təsnifatlandırmaya baxanda görünür ki, Azərbaycanla yanaşı, maliyyə yardımının dayandırılması nəzərdə tutulan digər ölkələr də normal iqtisadi inkişaf tempinə malikdir. Ermənistana yardımın davam etdiriləcəyinə gəldikdə isə, bu onların dilənçi durumunda olması ilə bağlıdır. Ermənistanın öz təhlilçiləri ölkə iqtisadiyyatının tam tənəzzül həddində olduğunu yazır və bunu konkret rəqəmlərlə ifadə edirlər. Hesab edirəm ki, artıq Azərbaycanın belə yardımlara heç ehtiyacı da yoxdur. Çünki biz regionu əhatə edən böyük meqa layihələri maliyyələşdirən ölkələrdən biriyik".
Məhəmmədəli QƏRİBLİ