Ermənilərin Cənubi Qafqazda separatçı siyasəti bu gün təkcə Azərbaycan yox, bütün region üçün ciddi təhdid mənbəyinə çevrilib. Hadisələrin gedişi göstərir ki, Dağlıq Qarabağ münaqişəsinin həllinin uzanması fonunda arxayınlığa qapılan, işğala görə heç bir cəza görməyən ermənilər bundan sui-istifadə edib digər dövlətlərə qarşı da ərazi iddialarını genişləndirir.
Məsələn, ermənilərin Türkiyəyə qarşı ərazi iddiaları hələ də qalmaqdadır. Gürcüstana qarşı da ərazi iddialarında olan ermənilər bu xüsusda artıq son günlərdə yenidən fəallaşıblar. Məsələn, ermənilərin yığcam yaşadıqları Gürcüstanın Samtsxe-Cavaxetiya bölgəsində vəziyyət yenə gərgindir. Ermənilər yenə əvvəlki kimi bu bölgəyə ya muxtariyyət, ya da özünüidarə hüququ verilməsini tələb edir. Ermənilər iddia edir ki, bölgəyə muxtariyyət və ya özünüidarə hüququ verilərsə, bu, həmin ərazidə iqtisadi problemlərin aradan qaldırılmasına və əhalinin güzəranının yaxşılaşmasına kömək edər. Halbuki, muxtariyyət iddiasına düşən ermənilərin sonrakı niyyətlərinin nədən ibarət olduğu Tiflisə yaxşı məlumdur. Bununla ermənilər əslində həmin ərazini Gürcüstandan qopartmağa çalışır. Bundan əlavə, heç kimə sirr deyil ki, Ermənistan hökuməti Gürcüstandakı erməni diasporuna çox yaxşı nəzarət edir. Samtsxe-Cavaxetiya bölgəsi məhz İrəvandan idarə olunur. Amma problem təkcə bununla məhdulaşmır. Belə ki, "kavkazplus" saytı ermənilərin Gürcüstanda digər etnik qruplar arasında da separatçılıq toxumu səpməyə çalışdığını, bu istiqamətdə fəaliyyətlərini son dövrldərdə əhəmiyyətli dərəcədə artırdıqlarını bildirir. Bununla bağlı sayt ermənilərin yaxşı təcrübələrinin olduğunu, hadisələrin gedişinin Gürcüstanda yeni separatizmə rəvac verə biləcəyini vurğulayır: "Ermənilər Azərbaycanda talış və ləzgilər arasında satqınları taparaq, onlara maliyyə ayırır, xüsusilə media sahəsində kömək edir. Misal üçün, işğal olunmuş Şuşada yaradılan "Talışıstanın səsi" radiosu belə layihələrdəndir. Bu işi İrəvan rejimi və erməni lobbisi həyata keçirir. Erməni lobbisi analoji addımları Gürcüstana qarşı da atmağa başlayıb". Sayt bu xüsusda ermənilərin əsas diqqətini indi meqrellər və svanlar üzərində cəmləşdirdiyini, bu etnik qruplarla fəal iş apardıqlarını bildirir: "Prinsip etibarilə erməni lobbisinin Gürcüstanda separat Meqreli və Svaneti bölgəsi yaratmaq planı çoxdan var idi. Hələ Zviad Qamsaxurdianın dövründə erməni lobbisinə bağlı media Gürcüstanı bölmək üçün "abxaz-meqrel" layihəsini təklif edirdi. Lakin meqrellər bu fitnəkar təkliflərə qarşı çıxaraq, gürcü xalqı ilə eyni yerdə yaşamağı üstün tutdular. Ermənilər eyni separatizmi svanlarla da bağlı tətbiq etmək niyyətində idi. Lakin orada da heç nə alınmadı. Çünki svanlar tarixən ermənilərə nifrət edir və "Müstəqil Svaneti" fikrini ümumiyyətlə yaxına buraxmadılar".
"Kavkazplyus" yazır ki, əslində ermənilərin meqrel və svanlara münasibəti pis olub: "Svanlar keçmişi əla xatırlayırlar. Erməni vəhşiliyinə ən çox məruz qalan isə meqrellər olub. Abxaziyada meqrellərə qarşı ən dəhşətli cinayətləri Baqramyan adına erməni batalyonunun döyüşçüləri etmişdi. Onlar meqrelləri Qaqridən, Suximidən, Qulripşdən və Oçamçirdən tamamilə qovdular. Hətta separat Abxaziya hakimiyyəti qaçqın meqrellərin Qalski rayonuna qayıtmağına icazə versə də, məhz erməni lobbisinin təşəbbüsü ilə bu insanlar bütün vətəndaş hüquqlarından məhrum edildilər. Lakin indi meqrellərin cəlladları olan erməni millətçilər "unikal meqrel xalqı" haqda danışır, onlara yaltaqlanır. Erməni lobbisinə bağlı media sifarişlə meqrellərin gürcü olmadığı və "müstəqil dövlət qurmaq hüququna malik olması" haqda məqalələr dərc edir. Burada məqsəd aydındır: ermənilər Gürcüstanı "kvazidövlət"lərə bölmək və torpaqlarını tikə-tikə edib əllərinə keçirmək istəyir. Meqreliyada ermənilər heç vaxt yaşamayıb. Lakin erməni apostol kilsəsi burada "erməni kilsələri"nin olduğunu iddia edir. Məlumdur ki, ermənilər separatizm ideyalarını translyasiya etmək üçün meqrellər arasında satqınları tapır. Xüsusilə Rusiyada yaşayanlar arasında onları tapmaq daha asandır. Onlar əvvəlcə sosial şəbəkələrdə, sonra bloqlarda, daha sonra məşhur olmayan saytlarda təbliğat aparır. Belələri Gürcüstanın dövlət quruluşunun dəyişilməsinin vaxtının çatdığını iddia edir. Onlar hansısa "Samqrelo respublikası" ideyasından danışır. Bu da yalnız Gürcüstanın xaricində yaşayan satqınlar tərəfindən müzakirə edilir. Lakin zamanla bu fitnəkar təbliğat gürcü dövlətinin ciddi probleminə çevrilə bilər". Bütün bunlar bir daha təsdiq edir ki, ermənilər gürcü xalqı üçün də ciddi problem yaratmağa başlayır. Elə bu səbəbdən hesab edilir ki, erməni separatizminə qarşı bölgədə daha fəal siyasət yürüdülməsinə ehtiyac var. Bu prosesdə region ölkələrinin bir mövqedən çıxış etməsi də çox vacibdir.
Tahir TAĞIYEV