Arzuxan Əlizadə: "Həmin oyunlar mütərəqqi əhəmiyyət kəsb edir"
İslam Həmrəyliyi Oyunları İslam Əməkdaşlıq Təşkilatının üzv ölkələrində böyük idman tədbiridir və təkcə islam həmrəyliyini yox, həm də islamın həqiqi obrazını nümayiş etdirir. Bunu mətbuata açıqlamasında İslam Əməkdaşlıq Təşkilatının (İƏT) baş katibi Yusif bin Əhməd əl-Usaymin deyib.
Onun sözlərinə görə, İƏT-in sülh, inkişaf və həmrəyliyə kömək göstərməsi çox vacibdir: "Ona görə də Azərbaycanda 2017-ci ilin "İslam Həmrəyliyi İli" elan olunması çox mühümdür. Bu, İƏT-in vacib üzv ölkəsi olan Azərbaycanın statusunu, dostluq, birlik və müsəlman dünyasında insanların dinc birgəyaşayışı üçün böyük səylərini vurğulayır".
Məlum olduğu kimi, may ayının 12-dən 22-dək paytaxt Bakıda IV İslam Həmrəyliyi Oyunları keçiriləcək. 2014-cü ilin 24 iyul tarixində Səudiyyə Ərəbistanının Ciddə şəhərində İslam Həmrəyliyi İdman Federasiyasının 8-ci Baş Assambleyasında oyunların Azərbaycanda keçirilməsi barədə qərar qəbul edilib. Yarışlarda 21 idman növü üzrə 57 dövlətin 6000-ə yaxın idmançısının iştirak edəcəyi gözlənir. Oyunlara hazırlıq istiqamətində görülən işlər, həyata keçirilən tədbirlər onu deməyə əsas verir ki, Azərbaycan, hər zaman olduğu kimi, budəfəki yarışları da yüksək səviyyədə təşkil edərək daha bir uğura imza atacaq.
Bütövlükdə, sözügedən oyunların timsalında islamın obrazı necə görünəcək? Məsələyə münasibət bildirən AMİP-in baş katibi Arzuxan Əlizadənin sözlərinə görə, sözügedən oyunların timsalında islam dininin sülhsevər din olduğu bəyan olunacaq: "Bu baxımdan həmin oyunlar mütərəqqi əhəmiyyət kəsb edir. Məsələ ondadır ki, zaman-zaman dünyada müəyyən dairələr islam barəsində mənfi təəssürat yaratmağa çalışır. Guya bu dinə etiqad edənlər terror törətməyə meyllidir, inkişafı qəbul etmir və s. Ancaq reallıqda bununla bağlı vəziyyət tamam fərqlidir. Müsəlman dövlətləri sühün, əminəmanlığın, birgəyaşayışın tərəfdarıdır. O baxımdan Bakıda keçiriləcək İslam Həmrəyliyi Oyunları bir daha sadalanan mənfi stereotipləri dağıdacaq. İslamın həqiqi obrazını bir daha bütün dünyaya göstərəcək. Dünya ölkələri görəcək ki, müsəlman dövlətləri çağdaş dünyaya inteqrasiya olunmaqda maraqlıdır. Eyni zamanda, müsəlman ölkəsi olan Azərbaycanda tolerant mühitin olduğunu görəcəklər. Zatən, Azərbaycan indiyə qədər bir sıra beynəlxalq tədbirlərə ev sahibliyi edib. Ancaq budəfəki idman tədbirinin özünəməxsus əhəmiyyəti olacaq".
Vidadi ORDAHALLI