Məhərrəm Zülfüqarlı: "O üzdən, hər il belə tədbirlər keçirilməlidir"
Xəbər verildiyi kimi, Lənkəranda Azərbaycan Milli Elmlər Akademiyasının Rəyasət Heyəti, AMEA-nın Tarix İnstitutu, Türkiyə Cumhuriyyətinin Atatürk Araşdırma Mərkəzi və Lənkəran Şəhər İcra Hakimiyyətinin birgə təşkilatçılığı ilə "XX əsrdə türk-müsəlman xalqlarına qarşı soyqırımları" mövzusunda IV Beynəlxalq elmi konfrans işə başlayıb.
İlk olaraq konfrans iştirakçıları Tarix İnstitutunun sözügedən mövzu ilə bağlı yeni nəşrlərinin sərgisinə baxış keçirib. Millət vəkili, Tarix İnstitutunun direktoru Yaqub Mahmudov bildirib ki, Azərbaycan xalqı ən dəhşətli soyqırıma məruz qalan xalqlardan biridir.
Sonra konfransın təşkilatçılarından biri olan Türkiyənin Atatürk Araşdırma Mərkəzinin başqanı professor Mehmet Ali Beyhan Tarix İnstitutu ilə sıx əməkdaşlıqdan söz açaraq, iki elmi qurumun birgə fəaliyyətini yüksək qiymətləndirib.
Daha sonra AMEA-nın prezidenti Akif Əlizadə və digər tədbir iştirakçıları çıxış edərək erməni vandallarının Azərbaycan ərazisində törətdikləri vəhşiliklərdən danışıb. Eyni zamanda, 1918-ci ildə Lənkəran qəzasının da erməni daşnaklarının zorakılığına məruz qalması tədbir iştirakçılarının diqqətinə çatdırılıb.
Məlumat üçün bildirək ki, Lənkərandan əvvəl iki konfrans Qubada və Şamaxıda keçirilib.
Bütövlükdə, hər il bənzər konfransların ermənilərin Azərbaycanda törətdikləri müxtəlif soyqırımların yerində ənənəvi keçirilməsinə ekspertlər necə yanaşır?
Sözügedən məsələni dəyərləndirən tarix elmləri üzrə fəlsəfə doktoru Məhərrəm Zülfüqarlı, prinsipcə, buna müsbət yanaşır: "Hesab edirəm ki, bu çox düzgün yanaşmadır. Çünki bununla biz erməni yalanlarını ifşa etməklə, bütün dünyaya göstərmiş olarıq ki, əslində, soyqırımı törədən türklər yox, ermənilərdir. Belə ki, zaman-zaman türklər soyqırıma məruz qalıb. Belə elmi konfransların tez-tez keçirilməsinə ehtiyac var. Sözügedən konfranslar vasitəsilə dünya ermənilərin törətdiyi cinayətlər, həyata keçirdikləri soyqırımlarla tanış olacaq. Çünki dünyada erməni həyasızlığı o həddə gəlib çatıb ki, onlar hər vəchlə dünya ictimaiyyətini öz yalanlarına inandırmağa çalışır. Hesab edirəm ki, bu kimi silsilə tədbirlərin keçirilməsi faydalı olacaq. Biz bu minvalla ortaya daha tutarlı faktlar qoyub erməni xislətini ifşa edərik. O üzdən, hər il belə tədbirlər keçirilməlidir".
Vidadi ORDAHALLI