Qabil Hüseynli: "Marin Le Penin Fransa prezidenti olması Azərbaycan üçün məqbul deyil"
Aprelin 23-də Fransada prezident seçkilərinin ilk turu keçirilib. Səsvermənin son nəticələri yeni prezidentin kimliyini müəyyən edə bilməyib.
Sabiq iqtisadiyyat naziri, "En Marche" hərəkatının lideri Emmanuel Makron 23,75 %, "Milli Cəbhə" partiyasının lideri Marin Le Pen isə 21,53 % səs toplayıb. Respublikaçıların namizədi Fransua Fiyon 19,91 faiz səslə üçüncü, solçu namizəd Jan-Lyuk Melanşon isə 19,64 faiz səslə dördüncü yerdə qərarlaşıb.
Nəticə etibarilə Fransa prezidentliyi uğrunda mayın 7-də keçiriləcək seçkilərin ikinci turunda "En Marche" hərəkatının lideri Emmanuel Makron və "Milli Cəbhə" partiyasının lideri Marin Le Pen mübarizə aparacaq.
Məlum olduğu kimi, ikinci turda mübarizə aparacaq Marin Le Pen seçki kampaniyasında ermənipərəst mövqeyi ilə seçilirdi. Bu namizədlərdən hansının seçilməsinin Dağlıq Qarabağ prosesinə müsbət təsiri ola bilər?
Politoloq Qabil Hüseynlinin sözlərinə görə, qatı sağçı, millətçi, təhlükəli ideyaların daşıyıcısı olan Marin Le Penin Fransa prezidenti olmasını nə Avropa, nə də ABŞ istəyir: "Marin Le Pen Azərbaycanla bağlı açıq şəkildə deyir ki, Dağlıq Qarabağ Ermənistana birləşdirilməlidir. Bu baxımdan hesab edirəm ki, Marin Le Penin Fransa prezidenti olması Azərbaycan üçün məqbul deyil. Emmanuel Makron təmkinli siyasətçidir. Eyni zamanda başqa dövlətlərin, xalqların maraqlarına toxunan bəyanatlar verməyib. Həmçinin o, iqtisadiyyatı dərindən bilən biri kimi Fransa üçün daha faydalı ola bilər. O cümlədən, Azərbaycan üçün. Azərbaycan üçün ATƏT-in Minsk Qrupunun həmsədri olan Fransanın yeni prezidentinin Dağlıq Qarabağ münaqişəsinə münasibətdə obyektivliyi, beynəlxalq hüquq normalarına əməl etməsi lazımdır. Dağlıq Qarabağ münaqişəsinin həlli ilə bağlı ədalətli yanaşma lazımdır. Makron iqtisadçıdır. Başa düşür ki, Azərbaycan regionda lider dövlətə çevrilib. Hazırda humanitar, iqtisadi sahələrdə Azərbaycan-Fransa münasibətləri yüksək səviyyədədir. Makron prezident seçilsə, mütləq bunu nəzərə alacaq. Hesab edirəm ki, o, prezident seçilsə, qeyd olunan sahələrdə münasibətlər yeni mərhələyə qədəm qoya bilər".
Məhəmmədəli QƏRİBLİ