Qondarma "DQR"ə lobbiçilik edən Avroparlamentin deputatı Sarkisyanın "qulluğunda"...
Mehman Muradlı: "Açılan cinayət işinə dair materiallar Avropa Parlamenti və həmin deputatın təmsil olunduğu ölkənin müvafiq qurumlarına göndərilməlidir"
Erməni mətbuatının yazdığına görə, prezident Serj Sarkisyan İrəvana təşrif buyuran Avropa Parlamentinin deputatı Frank Engeli qəbul edib. Bildirilir ki, Sarkisyan avropalı deputatın Avropa Parlamentində Azərbaycan əleyhinə olan fəaliyyətini, Ermənistanın mövqeyini həmin qurumda qoruduğunu yüksək dəyərləndirib. Sarkisyan, həmçinin, Engelə sistematik olaraq Dağlıq Qarabağa etdiyi səfərlərə görə xüsusi minnətdarlığını bildirib.
Azərbaycan tərəfi bu halla bağlı hansı hüquqi prosedurlara əl ata bilər?
Hüquqşünas Mehman Muradlı qəzetimizə açıqlamasında bildirdi ki, həmin deputatla bağlı bir sıra addımların atılması lazımdır: "Qeyd edim ki, Dağlıq Qarabağa qanunsuz səfərlərlə bağlı hüquqi prosedurun aparılması istiqamətində Azərbaycanın kifayət qədər təcrübəsi var. Artıq bu istiqamətdə konkret nəticələr də ortadadır. Lapşini və Azərbaycandan rəsmi olaraq bağışlanmasını xahiş edənləri bu sıraya aid edə bilərik. Bunu dəfələrlə bildirmişik ki, kimliyindən asılı olmayaraq, Dağlıq Qarabağ ərazisinə Azərbaycanın icazəsi olmadan edilən qanunsuz səfərlərlə bağlı cinayət təqibi nəzərdə tutulur. Digər fəaliyyətini demirəm, yalnız bu hal kifayət edir ki, deyilən deputatla bağlı hüquqi araşdırma başlansın. Ola bilər ki, həmin deputat toxunulmazlıq immunitetinə arxayındır. Ancaq ortaya konkret dəlillər qoyulandan sonra onun təmsil olunduğu ölkənin müvafiq qurumları qarşısında deputat toxunulmazlığının götürülməsilə bağlı məsələ qaldırıla bilər. Hər halda, bu prosedurlara mütləq əl atmaq lazımdır. Çünki bundan sonra avropalı deputat etdiyi əməlin cinayət olduğunun fərqinə varmış olacaq. Bir daha xtırladıram ki, etiraz bəyanatları ilə kifayətlənmək olmaz. Mütləq hüquqi vasitələrdən istifadə olunmalıdır. Açılan cinayət işinə dair materiallar Avropa Parlamenti və həmin deputatın təmsil olunduğu ölkənin müvafiq qurumlarına göndərilməlidir. Bununla Ermənistan prezidenti bir daha sübut etmiş olur ki, o, insanları həm də cinayətə təhrik edən rolunda açıq auditoriya qarşısında çıxış edir".
Məhəmmədəli QƏRİBLİ
