Fazil Mustafa: "Faşist xanıma çatdırmaq lazımdır ki, heç narahat olmasın..."
İlqar Vəlizadə: "Bu heç də o demək deyil ki, həmin namizədlər real siyasətdə dediklərinə əməl edəcək"
Fransada prezidentliyə namizəd olan Marine Le Pen uydurma erməni soyqırımı, Dağlıq Qarabağ münaqişəsi barədə həqiqətə uyğun olmayan açıqlamalar verir, uydurma soyqırımın tanınması ideyasını dəstəklədiyini bəyan edir.
Fransanın ultrasağçı Milli Cəbhə Partiyasının sədri erməni təəssübkeşliyini açıq şəkildə bildirib: "Yaxın Şərqdə Fransa xristianların müdafiəçisi kimi lider rolunu bərpa etməlidir. Qarabağ konfliktinin həlli üçün Dağlıq Qarabağ Ermənistana birləşdirilməlidir".
Belə şəxs prezident seçilərsə, bu hansı fəsadlara səbəb ola bilər?
Millət vəkili Fazil Mustafanın sözlərinə görə, faşist xanıma çatdırmaq lazımdır ki, heç narahat olmasın, Azərbaycan Ermənistanı özünə birləşdirəndən sonra Dağlıq Qarabağın belə bir dərdi olmayacaq: "Yəni birləşməyə Ermənistan adında dövlət olmayacaq. Le-Penə də deyəcəyik ki, Azərbaycan qanunlarına tabe olmayan ermənilər üçün Paris yaxınlığında bir muxtariyyət yaratsın, ona üz tutan erməniləri öz vəsaiti hesabına qarşılasın ki, yol yorğunluqları canlarından çıxsın".
Politoloq İlqar Vəlizadə isə hesab edir ki, Fransada prezidentliyə namizəd olan şəxslərin bölgədə baş verən proseslərdən xəbəri yoxdur, ona görə bu cür bəyanatlarla çıxış edirlər. Onun fikrincə, onların əsas məqsədi Fransada yaşayan erməni mənşəli seçicilərin rəğbətini qazanmaqdır: "Bildiyimiz kimi, ermənilərin Fransa siyasətinə təsiri kifayət qədərdir. Fransadakı erməni lobbisi siyasətçilərin siyasi proqnozlarını maliyyələşdirir, əvəzində isə namizədlər ermənilərin ünvanına təriflər səsləndirir. Bu heç də o demək deyil ki, həmin namizədlər real siyasətdə dediklərinə əməl edəcək. Hazırkı prezident Fransua Olland da hakimiyyətə gələndə erməni lobbisi ilə sıx əlaqə saxlayıb. Amma reallıq belədir ki, onlar Fransanın maraqlarından çıxış etməlidir. Fransanın regionda iqtisadi və təhlükəsizlik məsələləri ilə bağlı əsas tərəfdaşı isə Azərbaycandır. Ona görə də namizədlər prezident seçildikdən sonra məcbur olub həmin fikirləri unudurlar".
Məhəmmədəli QƏRİBLİ