Qabil Hüseynli: "Rusiyanın bu təklifini pisləyirəm və hesab edirəm ki, KTMT-yə üzv olan digər normal ölkələr də bu məsələyə etirazını bildirməlidir"
Rusiya xarici işlər naziri Sergey Lavrov bildirib ki, Abxaziyanın təhlükəsizliyinə ən etibarlı şəkildə Rusiya tərəfindən zəmanət verilib: "Biz Abxaziyanın Kollektiv Təhlükəsizlik Müqaviləsi Təşkilatı ilə əməkdaşlığından məmnun olarıq. Abxaziyanın KTMT-yə tamhüquqlu üzv olması və ya müşahidəçi statusu qazanması Alyansın bütün üzvlərinin konsensusundan asılıdır. Bu təşkilatın Abxaziyanın təhlükəsizliyini təmin etməsinə gəlincə, Suxuminin təhlükəsizliyinə ən etibarlı şəkildə Rusiya ilə Abxaziya arasında müqavilələrlə zəmanət verilib".
Rusiyanın bu mövqeyini necə dəyərləndirmək olar?
Politoloq Qabil Hüseynli hesab edir ki, belə mövqe Rusiyanın Dağlıq Qarabağla bağlı vasitəçilik mövqeyi ilə qəti uzlaşmır: "Hamıya bəllidir ki, KTMT elə Rusiya deməkdir. Abxaziyada, faktiki olaraq, separatçı bir rejim fəaliyyət göstərir. Onlar Gürcüstanın ərazi bütövlüyünü pozub. Belə olan halda, Rusiya həmin rejimi özünün ciddi adlandırdığı bir təsisatla əməkdaşlığa necə cəlb etmək istəyir? Rusiyanın Abxaziya və digər separatçı rejimləri himayə etməsini bilirdik. Ancaq onlarla əməkdaşlığı KTMT-yə transfer etmək həmin qurumda təmsil olunan digər müstəqil dövlətlərin də neytrallığını şübhə altına salır. Mənə elə gəlir ki, hazırda Abxaziya ilə Dağlıq Qarabağda formalaşan işğalçı rejimlər arasında heç bir fərq yoxdur. İkisi də eyni mahiyyəti daşıyır. Suveren ölkənin ərazi bütövlüyünü pozaraq bu vəziyyəti yaradıblar. Əslində, bu cür halı bütün normal ölkələr pisləməlidir. Kim zəmanət verə bilər ki, sabah Rusiya Dağlıq Qarabağın da KTMT-yə üzvlük məsələsini təklif etməyəcək? Xüsusilə də separatçılığın mövcud olduğu hansısa bir bölgə ilə bağlı vasitəçilik missiyasını üzərinə götürən ölkə presedent yarada biləcək bütün pis halları rədd etməlidir. Rusiyanın bu təklifini pisləyirəm və hesab edirəm ki, KTMT-yə üzv olan digər normal ölkələr də bu məsələyə etirazını bildirməlidir".
Məhəmmədəli QƏRİBLİ