Ramil Hüseynov: "Bununla digər sahilyanı dövlətlərə və orada neft-qaz hasil edən xarici şirkətlərə güc nümayiş etdirir"
Məlum olduğu kimi, Dağıstanda Rusiyanın Xəzər donanmasına aid artilleriya bölmələri təlimlərə başlayıb. Belə ki, Cənub Hərbi Dairəsinin Xəzər donanmasının dəniz piyadalarının artilleriya bölmələri Dağıstanın Adanak poliqonu və Skorpion taktiki meydanında döyüş atəşinin tətbiqi ilə batareya təlimləri keçirir. Təlimlərə 50-dən çox hərbi və xüsusi texnika cəlb edilib.
Cənub Hərbi Dairəsindən bildirilib ki, dəniz piyadaları şərti düşmənin dəniz desantının çıxarılmasının qarşısını alacaq müdafiə yönümlü tədbirlər reallaşdıracaq. Təlimlər zamanı müxtəlif çətinlik dərəcəsi olan 70-dən çox döyüş tapşırığı həyata keçirilməlidir.
Rusiyanın Xəzər hövzəsində hərbi təlimlərə başlaması, üstəlik, ordumuzun hərbi manevrləri fonunda buna start verməsi diqqət çəkməyə bilmir. Bəlkə də təsadüfdür, amma nə qədər olmasa da, bunların üst-üstə düşməsi diqqəti cəlb edir. Bu da, istər-istəməz, müəyyən sualların yaranmasına səbəb olur. Bütün hallarda, hazırda Rusiyanan Xəzərdə təlimlər keçirməsinin məqsədi nədir?
Məsələyə münasibət bildirən Vətəndaş və İnkişaf Partiyasının sədr müavini Ramil Hüseynovun sözlərinə görə, bu təlimlər daha çox güc nümayişinə hesablanıb: "Məsələ ondadır ki, sözügedən təlimlər yeni deyil. Xəzərdə hərbi təlimlərin birinci mərhələsinə aprelin 7-də start verilib. Budəfəki təlimlər də əvvəlkinin, bir növ, davamıdır. Təlimlərin məhz indiki dövrdə keçirilməsi geosiyasi mübarizənin tərkib hissəsidir. Çünki son dövrlər Qərb-Rusiya münasibətləri daha da gərginləşməkdədir. Xəzərin hüquqi statusu ilə bağlı sahilyanı dövlətlərin razılığa gələ bilməməsi sanki Rusiyaya əlavə dividendlər verir. Yaranan vəziyyətdən istifadə etməklə, bununla digər sahilyanı dövlətlərə və orada neft-qaz hasil edən xarici şirkətlərə güc nümayiş etdirir. Çünki Xəzərdə Qərbin iri neft-qaz korporasiyaları işləyir. Bu əzələ nümayişinin kimə qarşı yönəldiyi açıq göstərilmir. Rusiya iddia edir ki, zəngin neft-qaz ehtiyatlarına malik olan Xəzər dənizinə regiondan kənar ölkələrin hərbi qüvvələrinin daxil olması yolverilməzdir. Halbuki, ortalıqda belə bir niyyət yoxdur. Ancaq buna baxmayaraq, müşahidələr göstərir ki, Rusiya son illər Xəzər donanmasını durmadan gücləndirir. Bu kiçik qapalı dənizdə güc nümayişinə əl atır. Məsələn, Rusiyanın Xəzərdən Suriyadakı hədəflərə "Kalibr" qanadlı raketləri ilə zərbələr endirməsi hərbi nöqteyi-nəzərdən heç cür əsaslandırıla bilməzdi. Aydın məsələ idi ki, Moskva bununla güc nümayiş etdirirdi. O baxımdan keçirilən hərbi təlimləri bu kontekstdən dəyərləndirirəm".
Vidadi ORDAHALLI