Aydın Mirzəzadə: "Aİ Azərbaycanın ərazi bütövlüyünün təmin edilməsi üçün rəsmi Bakının apardığı mübarizənin vacib olduğunu nəzərə almalıdır"
Xəbər verildiyi kimi, Prezident İlham Əliyev Avropa İttifaqının (Aİ) Cənubi Qafqaz üzrə xüsusi nümayəndəsi Herbert Salberin başçılıq etdiyi nümayəndə heyətini qəbul edib. Belçikaya səfərini məmnunluqla xatırlayan dövlət başçısı bu səfər çərçivəsində səmərəli görüşlər keçirildiyini və müzakirələr aparıldığını qeyd edib.
Səfər zamanı Azərbaycanla Avropa İttifaqı arasında yeni sazişə start verildiyini deyən Prezident İlham Əliyev həmin sazişin əməkdaşlığımızın daha da inkişaf etdirilməsində mühüm addım olduğunu vurğulayıb. Həmçinin, bu istiqamətdə işlərin fəal şəkildə davam etdiriləcəyinə və vaxtında yekunlaşdırılacağına ümidvar olduğunu bildirib. Tərəflər arasında sazişlə bağlı ümumi anlaşmanın mövcud olduğunu qeyd edən dövlət başçısı işlərin yekunlaşmasının danışıqlar prosesinin gedişindən asılı olacağını vurğulayıb. Azərbaycan ilə Avropa İttifaqı arasında uzun illərdir yaxşı tərəfdaşlıq əlaqələrinin qurulduğunu deyən dövlət başçısı əməkdaşlığın əsas istiqamətlərinin artıq müəyyənləşdirildiyini, Avropa İttifaqının bir sıra ölkələri ilə sazişlər və memorandumlar imzalanması təcrübəsinin olduğunu qeyd edib.
Görüşdə Ermənistan-Azərbaycan, Dağlıq Qarabağ münaqişəsi, təmas xəttində vəziyyət, münaqişənin həlli ilə bağlı gedən danışıqların hazırkı vəziyyəti və perspektivləri ətrafında fikir mübadiləsi aparılıb.
Ümumilikdə, Aİ ilə Azərbaycan arasında sazişin danışıqlar prosesinin gedişindən asılı olduğunu deyən dövlət başçısı nəyi nəzərdə tutur? Sazişin imzalanması nə dərəcədə realdır?
Məsələyə münasibət bildirən millət vəkili Aydın Mirzəzadənin sözlərinə görə, Azərbaycan özünün milli maraqlarını qorumaq üçün dövlətçilik prinsiplərini ortaya atır: "Azərbaycanla Aİ arasında münasibətlər həmişə hər iki tərəfin diqqətində olub. Aİ dünyanın inkişaf etmiş bir regionunun əsas dövlətlərinin bir-birilə və dünya siyasətində xüsusi rol oynayan əsas təşkilatıdır. Azərbaycan isə Cənubi Qafqazda və postsovet məkanında böyük siyasi nüfuza malik olan ölkə kimi bu münasibətlərdə maraqlıdır. Sözügedən münasibətlər ildən-ilə daha çox məsələləri və problemlərin həlli üzrə müzakirələri əhatə edir. Hesab edirəm ki, Azərbaycan özünün milli maraqlarını müdafiə etmək üçün dövlətçilik prinsiplərini ortaya atır. Bu tamamilə düzgün yanaşmadır. Azərbaycan kimi bütün dövlətlər belə hərəkət edir və özlərinin milli maraqlarını qorumağa çalışır. Buna ikitərəfli münasibətlərin inkişaf etdirilməsi, Azərbaycana qarşı ədalətsiz basqıların qarşısının alınması, Azərbaycan vətəndaşları üçün sərbəst gediş-gəlişin yaradılması daxildir. Aİ-nin tələbləri aydındır. Onlar demokratiya, insan hüquqlarının qorunmasını ön plana çəkir. Bu məsələdə Azərbaycan tərəfdən hər hansı bir narazılıq ola bilməz. Hesab edirəm ki, hər iki tərəf danışıqlarda bir-birinin maraqlarını gözləməli, ən əsası isə, Aİ Azərbaycanın ərazi bütövlüyünün təmin edilməsi üçün rəsmi Bakının apardığı mübarizənin vacib olduğunu nəzərə almalıdır".
Vidadi ORDAHALLI