Səyyar Əliyev: "Kənar tədqiqatçıların belə faktları aşkarlaması dünya ictimaiyyəti üçün daha inandırıcı olar"
Azərbaycan Respublikasının Prezidenti İlham Əliyev Qafqazşünasların Birinci Beynəlxalq Forumunun iştirakçılarına təbrik məktubu ünvanlayıb.
Məktubda Qafqazın qədim sivilizasiya mərkəzi kimi əsrlərdən bəri müxtəlif xalqların qaynayıb qarışdığı və bir-birinin adət-ənənələrinə qarşılıqlı ehtiram göstərərək əminamanlıq şəraitində yaşadığı unikal məkan olduğu bildirilir: "Tarixi İpək Yolu üzərində yerləşən və hələ erkən dövrlərdən qüdrətli imperiyaların can atdığı bu region özünün müstəsna coğrafi mövqeyinə, zəngin təbii sərvətlərinə və strateji əhəmiyyətinə görə son əsrlərdə də böyük dövlətlərin geosiyasi maraq dairəsinə düşmüşdür.
Postsovet dövründə tarix elminin ideoloji buxovlardan azad olması, həmçinin, qafqazşünaslıq sahəsində bir sıra mühüm məsələlərin yeni yanaşmalar işığında daha dərindən öyrənilməsi zərurətini meydana çıxarmışdır. Bu isə Qafqazın uzun müddətdir araşdırıcılar tərəfindən diqqət mərkəzində saxlanan keçmişi, mədəniyyəti və eləcə də müasir problemləri ilə bağlı təşkil etdiyiniz ilk belə mötəbər beynəlxalq foruma xüsusi aktuallıq qazandırır. Tədbirinizə dünyanın tanınmış elm mərkəzlərini təmsil edən 150-dən artıq alim və tədqiqatçının qatılması təqdirəlayiq haldır. Çoxtərəfli formatda keçirilən yüksək səviyyəli elmi toplantılar xalqlar və ölkələr, müvafiq elmi-tədqiqat institutları və alimlər arasında əməkdaşlıq əlaqələrinin genişləndirilməsinə kömək edir. Şübhə yoxdur ki, Azərbaycan bundan sonra da müxtəlif ölkələrin qafqazşünas alimləri arasında qarşılıqlı münasibətlərin davam etdirilməsinə töhfəsini əsirgəməyəcəkdir.
Ümidvaram ki, forum çərçivəsində aparacağınız müzakirələr və fikir mübadilələri, irəli sürəcəyiniz tövsiyə və təkliflər qafqazşünaslığın aktual problemlərinin həllində dönüş mərhələsi olacaq, beynəlxalq elmi əməkdaşlığınızın yeni istiqamətlərinin müəyyənləşməsinə xidmət göstərəcək və bütövlükdə, regionda sülhün, əminamanlığın möhkəmləndirilməsinə təkan verəcək".
Ölkə başçısının Qafqaz regionunun daha dərindən öyrənilməsi ilə bağlı fikirləri aktuallıq kəsb edir.
Tarix üzrə fəlsəfə doktoru Səyyar Əliyev qəzetimizə açıqlamasında bildirdi ki, elmi konfrans və simpoziumların keçirilməsi olduqca önəmli hadisədir: "Bilirsiniz ki, məhz bu cür tədbirlərdə elm adamları bir araya gələ bilir. Yeni tanışlıqlar yaranır ki, bu da konkret sahəni tədqiq edən alimlər üçün olduqca vacibdir. Adətən konkret mövzunu əhatə edən elmi-praktik tədbirlərə sırf eyni sahəni araşdıran alimlər dəvət edilir. Qafqazşünaslıq dünya elmi üçün böyük maraq kəsb edir. Belə bir forumun Azərbaycanda keçirilməsi bir daha sübut edir ki, biz ölkə olaraq bütün sahələrin inkişafında maraqlıyıq. Qafqaz bizim üçün həm də ona görə vacib tədqiqat mövzusudur ki, biz məhz bu regionda məskunlaşmışıq. Ölkə başçısının tədbir iştirakçılarına ünvanladığı məktubda doğru olaraq qeyd edilir ki, Qafqaz regionunun SSRİ-nin tərkibində olması həmin sahənin obyektiv araşdırılmasına mane olub. Çünki məlumdur ki, həmin dövrdə aparılan araşdırmalar sovet ideologiyasının qoyduğu direktivlərdən kənara çıxmamalı idi. Bu gün Qafqazın tam obyektiv araşdırılması bizim üçün həm də ona görə önəmlidir ki, bizə əsassız ərazi iddiası irəli sürən ermənilərin bu regiona heç bir aidiyyəti olmaması bir daha təsdiqini tapmış olar. Biz tarixçi kimi buna əminik. Ancaq kənar tədqiqatçıların belə faktları aşkarlaması dünya ictimaiyyəti üçün daha inandırıcı olar. Bu baxımdan da cənab Prezidentin qafqazşünaslıq sahəsinə verdiyi önəm və qiymətə görə ona minnətdarlıq edirəm".
Məhəmmədəli QƏRİBLİ