Bu gün dünyada müzakirə edilən ən aktual mövzulardan biri də tarixdə ilk dəfə olaraq nüvə müharibəsinin nə zaman başlana biləcəyidir. Söhbət Şimali Koreya və ABŞ arasında gedərək artan gərginlikdən gedir və rəsmi açıqlamalar nüvə müharibəsinin, əslində, bu gedişlə qaçılmaz olduğunu göstərir. Çünki nə Şimali Koreya, nə də ABŞ mövqeyindən geri çəkilməyi düşünür.
Şimali Koreyanın xarici işlər nazirinin müavini Xan Sonq Rel bildirib ki, Koreya Xalq Demokratik Respublikası (KXDR) beynəlxalq qınağa və Birləşmiş Ştatlarla hərbi gərginliyin artmasına baxmayaraq, raket sınaqlarına davam edəcək: "Biz həftəlik, aylıq və illik əsasda raket sınaqlarını keçirəcəyik". O, həmçinin, ABŞ Pxenyana qarşı hərbi vasitələrdən istifadə edəcəyi halda genişmiqyaslı müharibənin başlanacağı barədə xəbərdarlıq edib.
Daha əvvəl KXDR-nin BMT-dəki daimi nümayəndəsi Kim İn Ren bildirib ki, ABŞ regionda təhlükəli vəziyyət yaradıb və nüvə müharibəsi istənilən vaxt başlaya bilər:"ABŞ regionda nüvə müharibəsinə gətirib çıxara biləcək təhlükəli vəziyyət yaradıb. Bu, dünyada sülh və sabitlik üçün ciddi təhlükə yaradır. Koreya Xalq Demokratik Respublikası Amerikanın istənilən hərbi planlarına cavab verməyə hazırdır. Biz həmçinin lazım bildiyimiz zaman nüvə sınaqlarını davam etdirəcəyik". Rəsmi Vaşinqton isə baş verənlərə seyrçi qalmaq istəmir. ABŞ-ın vitse-prezidenti Mayk Pens bildirib ki, Şimali Koreyanın nüvə təhlükəsinin qarşısını almaq üçün prezident Donald Tramp hərbi gücdən istifadə edə bilər: "Şimali Koreya prezidentin qərarlarını sınağa çəkməmək üçün yaxşı davranmalıdır".
Vitse-prezident bildirib ki, Pxenyan yeni təxribatlara əl atsa, ABŞ-ın sərt cəza tədbirləri ilə qarşılaşacaq. Onun sözlərinə görə, Şimali Koreyanın adi və ya nüvə silahlarından istifadəsinə ABŞ və Cənubi Koreyanın cavabı sarsıdıcı və effektiv olacaq. Mayk Pensin sözlərinə görə, Vaşinqton və Seul artıq Şimali Koreyanın raket və nüvə sınaqlarına dözmək niyyətində deyil. O, Pxenyana məsləhət görüb ki, bu günlərdə Suriyaya endirilmiş "Tomoqavk" zərbələrini nəzərə alsın. ABŞ vitse-prezidenti və Cənubi Koreya prezidenti yarımadada THAAD raketdən müdafiə sisteminin yerləşdirilməsi planının qüvvədə olduğunu deyib və Çinin Seula təzyiq göstərməməsindən təəssüf ifadə edib. Vitse-prezidentin bildirdiyinə görə, Donald Trampın rəhbərlik etdiyi yeni Amerika administrasiyasının Şimali Koreyaya münasibətdə strateji dözüm nümayiş etdirməsinin sonu gəlib çatıb:"Bizim administrasiyanın səbri tükənib və artıq "strateji dözüm" siyasətini davam etdirmək niyyətimiz yoxdur. ABŞ Koreya yarımadasında təhlükəsizliyin danışıqlar və sülh yolu ilə təmin olunmasında qəti şəkildə qərarlıdır. Lakin bütün variantlar masa üzərindədir və Vaşinqtonun Seul qarşısındakı müttəfiqlik öhdəlikləri sarsılmazdır".
Yaponiya da Şimali Koreyaya qarış qüvvələrini səfərbər edib. Amma Çin və Rusiya Şimali Koreyaya qarşı müharibənin başlanmasının əleyhinədir və bunun nüvə savaşını qaçılmaz edəcəyini bildirirlər. Rusiya Federasiya Şurasının üzvü Aleksey Puşkov bildirib ki, ABŞ öz bazalarını Koreya Xalq Demokratik Respublikasının cavab zərbəsindən qoruya bilməyəcək. Senatorun sözlərinə görə, ABŞ Seulu və Cənubi Koreyadakı bazalarını Pxenyanın cavab zərbələrindən tamamilə qorumağa qadir deyil. Qeyd edək ki, Pxenyan, ona qarşı təxribatlar olacağı halda, ABŞ-ın regiondakı bazalarına zərbələr vuracağını açıqlayıb.
Rusiya Xarici İşlər Nazirliyinin başçısı Sergey Lavrov da bu durumda ABŞ-ı Şimali Koreya barəsində birtərəfli hərəkətlərdən çəkinməyə çağırıb: "Pxenyanın nüvə və raket sınaqları BMT Təhlükəsizlik Şurasının çoxsaylı qətnamələrinin pozulmasıdır. Amma bu heç də o demək deyil ki, həmin sınaqların qarşılığında güc tətbiq edərək beynəlxalq hüququ pozmaq olar. Buna görə də ümid edirəm ki, birtərəfli hərəkətlər olmayacaq. Biz bunu bu yaxınlarda Suriyada gördük". Rusiya xarici siyasət idarəsinin başçısı həmçinin ümid etdiyini ifadə edib ki, ABŞ prezident Donald Trampın seçkiqabağı kampaniyası zamanı dəfələrlə səsləndirdiyi xətti izləyəcək. Lakin Donald Trampın özü də Şimali Koreyaya qarşı hərbi əməliyyatları istisna etmir. Artıq ABŞ donanmasının "Karl Vinson" təyyarədaşıyanı başda olmaqla zərbə qruplaşması Şimali Koreya sahillərindədir. Donald Tramp isə bu fonda bildirib ki, Çin lideri Si Tszinpinə zəng vuraraq Şimali Koreya rejiminə təzyiq göstərməyi xahiş edib:"Mən Si Tszinpindən xahiş etdim ki, Şimali Koreya rəhbərliyinə çatdırsın - ABŞ-ın təkcə təyyarədaşıyanları yox, atom sualtı qayıqları da var". Qeyd edək ki, ABŞ-ın 154 "Tomoqavk" raketi ilə silahlanmış "Ohayo" atom sualtı qayığı Şimali Koreya sahillərindədir.
Tahir TAĞIYEV