Məhərrəm Zülfüqarlı: "Hərənin öz fikri var. Ona görə də buna hörmətlə yanaşmaq lazımdır"
Məlum olduğu kimi, aprelin 16-da qardaş Türkiyədə referendum keçirilib. Türk xalqı konstitusiyaya təklif edilən 27 dəyişikliyə "hə" deyib.
Referendum, qardaş ölkədə olduğu kimi, ölkəmizdə də yaxından izlənilib. Təsadüfi deyil ki, sosial şəbəkələrdə ən çox müzakirə olunan hadisə məhz Türkiyədəki referendum olub. Ən maraqlı məqam isə ondan ibarətdir ki, son illər ilk dəfə olaraq Azərbaycanda yaşayan türklər hakim partiyaya "yox" deyib. Bütün seçkilərdə Azərbaycandan yüksək səslə qalib ayrılan hakim partiya bu dəfə 20 faiz fərqlə məğlub olub.
Məlumata görə, Azərbaycandakı seçicilərin 38,3 %-i dəyişikliklərə "hə", 61,7 %-i isə "yox" deyib. Digər ölkələr də bu sıradadır. Kanada, ABŞ, Rusiya, Qazaxıstan, Çin, Avstraliya, İran, Əlcəzair, İsveç, Finlandiya, İspaniya, Ukrayna, Polşa, Türkmənistan, Bolqarıstan, Rumıniya kimi ölkələrdə yaşayan türklərin böyük əksəriyyəti dəyişikliklərə "yox" deyib.
Maraqlıdır, Azərbaycanda səs verən türkiyəli seçicilərin çoxunun "yox" deməsi nə ilə bağlıdır? Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, bu, Türkiyə vətəndaşlarının azad seçimi olduğu üçün, burada qeyri-adi bir şey yoxdur: "Türkiyə demokratik dövlətdir. O üzdən, hər bir vətəndaş öz istəyi ilə səs verir. Bu səbəbdən onlar azad şəkildə bu siyasətə öz münasibətini bildirib. Yəni hərənin öz fikri var. Ona görə də buna hörmətlə yanaşmaq lazımdır. Hesab edirəm ki, burada qeyri-adi bir şey yoxdur. Görünür, Azərbaycanda səs verənlərin arasında parlamentli respublikanın tərəfdarları çoxdur. Çünki uzun illərdir Türkiyə parlamentli respublikadır. Bütün hallarda, səsvermədə faiz nisbətinin fərqli olmasına normal yanaşıram".
Vidadi ORDAHALLI